2 Makani 17

Jehosyafati mbwaakaba mwami

¹ Lino Jehosyafati nguwakalela mubusena bwa Asa wisi. Wakaliyumya kukulwana Baisilayeli. ² Nceeci ncaakacita, wakabikka basilumamba muminzi ya Juda yoonse yakakwabilidwe, akubikka bamwi mumabazu amwi aacisi ca Juda aminzi yaku Efulemu eeyo Asa wisi njaakatola. ³ Mwami Leza wakali aa Jehosyafati nkaambo kakuti mumyaka yakwe yakusaanguna wakatobela nzila zyasikale wakwe Devedi. Taakakomba Baali. ⁴ Pele wakakomba Leza wasikale wakwe akutobela milawo yakwe mubusena cazeezyo zyakali kucita Baisilayeli. ⁵ Mwami Leza wakakkazikizya bwami bwa Jehosyafati cakuti bantu ba Juda boonse bakali kumuletela zipego, aboobo wakavuba akulemekwa. ⁶ Wakalilipede kunzila zya Mwami Leza, kunze aakooko, wakamwaya malende amisumpuululu yaleza mukaintu Asyela kuzwa mucisi ca Juda.

⁷ Mumwaka watatu wakulela kwakwe wakatuma balupati-pati bakwe aaba: Benihaili, Obadiya, Zekaliya, Netaneli a Mikaiya kuyooiisya muminzi ya Juda. ⁸ Balevi bamwi bakainka ambabo mbaa: Syemaiya, Netaniya, Zebadiya, Asaheli, Syemilamoti, Jehonatani, Adonija, Tobiya, a Tobadonija antoomwe abapaizi ba Elisyama a Jeholamu. ⁹ Bakaiisya bantu bamucisi ca Juda muminzi yabo bbuku lyamulawo wa Mwami Leza.

Kulemekwa kwa Jehosyafati

¹⁰ Lino Mwami Leza wakacita kuti zisi amanyika oonse aakazingulukide Bajuda ayoowe kulwana amwami Jehosyafati. ¹¹ Bamwi Bafilisiti bakalikuletela Jehosyafati zipego ansiliva mbuli mutelo. Baalabu bakaleta zipego eezi: mbelele zili zyuulu zili ciloba amyaanda iili ciloba mpongo zili zyuulu zili ciloba amyaanda iili ciloba. ¹² Aboobo Jehosyafati wakali kuya buyuma. Wakayaka zikwabilizyo aminzi yaziyobwedo mu Juda. ¹³ Muziyobwedo wakayobola zintu zinji. Alimwi wakabikka basilumamba bacibwene mu Jelusalemu. ¹⁴ Mbubakalembwa kweendelana amikwasyi yabo mboobu, Adina nguwakali mulailili wabasilumamba baciinga ca Juda. Wakali kulanga basilumamba bali zyuulu zili myaanda yotatwe. ¹⁵ Munsi aanguwe kwakali Jehohanani wakali aabasilumamba bali zyuulu zili myaanda yobilo amakumi aali lusele. ¹⁶ Munsi aayooyu kwakali Amasiya mwanaa Zikili wakali kulanga basilumamba bali zyuulu zili myaanda yobilo. Amasiya ngonguwe wakalyaabide kubelekela Mwami Leza. ¹⁷ Eliyada nguwakali mulailili wabasilumamba baciinga ca Benjamini, wakali silumamba uucibwene. Wakali kulanga basilumamba bali zyuulu zili myaanda yobilo bakali kubelesya ntobo amata. ¹⁸ Munsi aayooyu kwakali Jehozabadi wakali kulanga basilumamba bali zyuulu zili mwaanda amakumi aali lusele, bakalizulizizye muzilwanyo. ¹⁹ Aaba baalumi mbabakali kubelekela mwami mu Jelusalemu. Kunze aabaaba kwakali baabo bakabikkidwe muminzi iikwabililidwe mucisi ca Juda.