2 Makani 15

¹ Lino muuya wa Leza wakasikila Azaliya, mwana wa Obedi. ² Mpawo wakanyamuka kuyooswaanganya Asa. Wakati, “Ndiswiilila, yebo Asa, kubikkilizya a Bajuda alimwi a Babenjamini. Mwami Leza unooli aanduwe kwaciindi coonse nconooli aanguwe, olikumulangaula unoomujana, pele kuti wamukaka awalo ulakukaka.” ³ Kwaciindi cilamfu Baisilayeli tiibakajisi Leza wini-wini, mupaizi wakubaiisya, alimwi amulawo. ⁴ Pele nibakanjila mumapenzi, bakapilukila ku Mwami Leza wa Isilayeli, bamulangaula akumujana. ⁵ Kwamazuba aayo kwakanyina wakali kukonzya kweenda cakuliiba, nkaambo kwakali mapenzi amanyongwe mumanyika. ⁶ Musyobo umwi wakali kumwaya musyobo uumwi, munzi umwi wakali kumwaya uumwi. Leza nguwakali kubaletela mapenzi amapyopyongano aaya. ⁷ Lino kwaamba nduwe, koyuma utalilekeleli milimo yako iyoolumbulwa.

⁸ Ciindi Asa naakamvwa businsimi bwa Azaliya mwana wa Obedi wakaba aacamba. Wakagwisya mituni iisesemya kuzwa muzisi zyoonse zya Juda a Benjamini kubikkilizya aminzi njaakazunda munyika yatulundu-lundu ya Efulemu. Wakayakulula cipaililo ca Mwami Leza eeco cakali mubbuwa lya ŋanda ya Leza.

⁹ Bantu banji-banji kuzwida ku Efulemu, Manase a Simiyoni bakaba kulubazu lwa Manase. Bakakkala mubwami bwakwe nkaambo bakabona kuti Mwami Leza wakalaanguwe. Asa wakabunganya Bajuda a Babenjamini boonse. ¹⁰ Bakazoobungana ku Jelusalemu mumwezi watatu mumwaka wakkumi aisanu wakulela kwakwe. ¹¹ Ciindi eeco bakapaizya ku Mwami Leza butanga bwaŋombe zili myaanda iili ciloba, ambelele ampongo zili zyuulu zili ciloba kuzwida kuli zeezyo nzibakasaala. ¹² Bakapanga cizuminano cakuti banookomba Mwami Leza wabasikale babo amoyo amuuya wabo woonse. ¹³ Boonse batakooyookomba Mwami Leza wa Isilayeli baleelede kuyoojaigwa nobakomena, nibaba basyoonto, baalumi nibaba bakaintu. ¹⁴ Cakupozomoka bakakonkezya muzina lya Mwami Leza kuti bayoobamba cizuminano eeci. Kuzwa waawo bakayobeka akusiba myeembo ampeta. ¹⁵ Bajuda boonse bakatangala nkaambo bakakonkezya, kulumbila amoyo woonse. Bakalangaula Mwami Leza cabunkutwe akumujana. Nkaako Mwami Leza wakabapa luumuno kumabazu oonse.

Zyamwami Asa wa Juda

¹⁶ Mwami Asa wakatanda banyinakulu ba Maaka acuuno camwami mukaintu, nkaambo bakapangide musumpuululu uusesemya waleza mukaintu Asyela. Asa wakuugonka wuukosoola, waakuuumpa mukkuti lya Kidiloni. ¹⁷ Nikuba kuti taakamwaya malende aamu Isilayeli, moyo wa Asa wakali ku Mwami Leza mubuumi bwakwe boonse. ¹⁸ Wakaleta muŋanda ya Leza, nsiliva, ngolida azibelesyo eezyo awisi nzibakapede ku Mwami Leza. ¹⁹ Kwakanyina nkondo aimbi kusikila mumwaka wamakumi otatwe aasanu wakulela kwa Asa.