2 Makani 12

Nkondo mu Juda yakacitwa a Baijipiti

¹ Ciindi Lehobowamu naakakkazikika akubaanguzu mbuli mwami walo abantu bakwe boonse bakasiya mulawo wa Mwami Leza. ² Akaambo kakuti tiibakasyomeka ku Mwami Leza, Syisyaki mwami waku Ijipiti wakalwana munzi wa Jelusalemu mumwaka wasanu wakulela kwa Lehobowamu. ³ Wakajisi nkalaki zili cuulu amyaanda yobilo abasimabbiza bali zyuulu zili makumi aali cisambomwe kubikkilizya abasilumamba batabaliki baku Libya, Suki a Kusyi aabo mbaakaletelezya kuzwa ku Ijipiti. ⁴ Wakatola minzi yakakwabilidwe yamu Juda mane wazoosika aku Jelusalemu.

⁵ Lino aawo Syemaiya musinsimi wakaboola kuli Lehobowamu abasololi ba Bajuda bakabungene mu Jelusalemu kabayoowede Syisyaki wazooti, “Mboobu mbwaamba Mwami Leza, ‘Mwandisiya nkaako ambebo ndamusiila Syisyaki.’”

⁶ Mwami abasololi bakalisyimuna bati, “Mwami Leza uliluleme.” ⁷ Mwami Leza naakabona kulisyimuna kwabo, wakati kuli Syemaiya, “Mukuti beempa nsikoobanyonyweda limwi bayoofutuka. Alimwi nsikooleka Syisyaki kuti azunde Jelusalemu. ⁸ Nikuba boobo unoobeendelezya kuti babone kuti ncili cibotu kwiinda, mukubelekela ndime naa mwami wacisi cimbi.” ⁹ Ciindi Syisyaki mwami waku Ijipiti naakalwana Jelusalemu wakatola zyakali muziyobwedo zyaŋanda ya Mwami Leza azyaŋanda yabwami. Wakatola zyoonse, kubikkilizya antobo zyangolida Solomoni nzyaakapangide. ¹⁰ Mubusena bwazyo mwami Lehobowamu wakapanga ntobo zyamukuba nzyaakapa kubalailili baamulyango bakuŋanda yabwami. ¹¹ Ciindi mwami naakali kuya kuŋanda ya Mwami Leza, balindizi bakali kuunka anguwe kabajisi antobo eezyo, kuzwa kooko bakali kuzibikka mukaanda kabalindizi. ¹² Nkaambo kakuti Lehobowamu wakalibombya Mwami Leza wakaleka kumunyemena taakamunyonyweeda limwi, nkaako zintu zyakacili kabotu.

¹³ Mwami Lehobowamu wakakkalikila ncobeni mu Jelusalemu kalela. Wakajisi myaka iili makumi one aumwi naakaba mwami. Wakalela kwamyaka iili kkumi aciloba mu Jelusalemu, munzi Mwami Leza ngwaakasala kuzwa kumisyobo yoonse ya Isilayeli, kuti kakombelwa mumo. Banyina bakali ba Naama baku Amoni. ¹⁴ Wakabisya nkaambo taakakomba Mwami Leza amoyo woonse. ¹⁵ Lino eezyo zyoonse Lehobowamu nzyaakacita kuzwa naakatalika kulela kusikila kumamanino zililembedwe mumabbuku aa Syemaiya musinsimi amuli Ido musinsimi naamba zyamazyalani. Kwakali mazwanga lyoonse akati ka Lehobowamu a Jelobowamu.

¹⁶ Wakafwa akuzikkwa abasikale bakwe mumunzi wa Devedi, eelyo Abija mwanaakwe nguwakalela mubusena bwakwe.