2 Makani 11

Businsimi bwa Syemaiya

¹ Lehobowamu naakasika mu Jelusalemu, wakaita bantu bali zyuulu zili mwaanda amakumi aali lusele akusala baalumi kuzwa kumisyobo ya Juda a Benjamini, kuti bainke akuyoolwana Baisilayeli kuti baboozye bwami bwa Lehobowamu mwanaa Solomoni.

² Pele Mwami Leza wakaambila Syemaiya musinsimi ³ kuti ainke kuyooambila Lehobowamu mwanaa Solomoni mwami wa Juda abamisyobo yoonse ya Juda a Benjamini kuti, ⁴ “Mwami Leza waamba kuti, mutalwani banabokwanu Baisilayeli pe. Amupilukile kumaanda aanu nyoonse, nkaambo ndime ndacicita eeci!” Nkaako bakaswiilila malailile aa Mwami Leza, bakaleka kuyoolwana Jelobowamu.

Lehobowamu mbwaakakwabilila minzi

⁵ Lehobowamu wakakkede mu Jelusalemu akukwabilila minzi yamu Juda a Benjamini eeyi, ⁶ Betelehemu, Etamu, Tekowa, ⁷ Betizuu, Soko, Adulamu, ⁸ Gati, Malesya, Zifu, ⁹ Adolaimu, Lakisyi, Azeka, ¹⁰ Zola, Aijaloni awa Hebuloni. ¹¹ Wakayaka nkwakwa ziyumu akubikka balailili bankondo mulinzizyo, aaba bakali kubatumina azyakulya, mafuta aaoliva awaini. ¹² Basilumamba babo wakali kubatumina ntobo amasumo muminzi yoonse eeyi kutegwa babe basinguzu. Mbombubo mbwaakakonzya kweendelezya bantu ba Juda a Babenjamini.

Bapaizi a Balevi mbubakainka kucisi ca Juda

¹³ Lino bapaizi a Balevi boonse bakali kunyika bakaza kulubazu lwakwe. ¹⁴ Balevi balo bakasiya macelelo ambono, bakaza mu Juda ku Jelusalemu nkaambo Jelobowamu abana bakwe bakabakaka kuti tabali bapaizi ba Mwami Leza. ¹⁵ Mubusena bwabo wakasala bapaizi bamalende, bampongo amoombe baleza mbaakalipangilide. ¹⁶ Aabo bakali kuyanda kukomba Mwami Leza wa Isilayeli amoyo woonse, bakatobela Balevi ku Jelusalemu kuyoopaizya ku Mwami Leza wabasikale babo. ¹⁷ Bakazooyumya-yumya bulelo bwa Juda akugwasya Lehobowamu mwanaa Solomoni kwamyaka yotatwe, bakakkede mbuli mbubakakkede mubulelo bwa Mwami Devedi a Solomoni.

Zyamukwasyi wa Lehobowamu

¹⁸ Lehobowamu wakakwata Mahalati, mwanaa Jelimoti, mwanaa Devedi. Banyina Jelimoti mbaa Abihaili mwanaa Eliyabu mwanaa Jese. ¹⁹ Mbaaba bana balombe mbaakamuzyalila, mbaa Jewusyi Syemaliya a Zahamu. ²⁰ Amane Lehobowamu wakakwata Maaka mwanaa wa Abisalomu, wakamuzyalila Abija, Atayi, Ziza a Syelomiti. ²¹ Lehobowamu wakali kuyandisya Maaka mwanaa Abisalomu kwiinda bakaintu abamwanakasuwa bakwe bamwi. Antoomwe mukwasyi wakwe wakali abakaintu bali kkumi alusele, abamwanakasuwa bali makumi aali cisambomwe, bana balombe bakali makumi obilo alusele. Basimbi bakali makumi aali cisambomwe. ²² Lehobowamu wakasala Abija mwanaa Maaka kuti akabe ngomwami mubusena bwakwe. ²³ Lehobowamu wakaapaula mumilimo camaanu mutupaanzi twazisi zyoonse zya Juda a Benjamini, akuminzi yoonse yakakwabilidwe. Wakabapa bana bakwe mbono akubakwatila bakaintu banji-banji.