2 Joni

¹ Mebo ndemunene ndembela mukaintu wakasalwa a Leza antoomwe abana bakwe aabo mbeyandisisya kapati. Kutali buyo ndime endikke, pele abaabo bazi zyabwini. ² Tulamuyanda nkaambo kakasimpe kali muli ndiswe alimwi kanooli muli ndiswe kwalyoonse alyoonse.

³ Leza Taata a Jesu Kilisito Mwanaakwe atubede aaluse, lweengelelo, aluumuno, zikkale andiswe mukasimpe amuluyando.

Zyakasimpe aluyando

⁴ Ndakakondwa kapati kujana kuti bana bako bamwi baccilila zyabwini, mbubonya mbuli bwakatulailila Taata. ⁵ Lino ndakukumbila omukaintu uuyandwa kuti twiindilizye kuyandana toonse. Takuli kuti ndakulembela mulawo mupya pe, pele ngoonya ngutwakajisi kuzwa kumatalikilo. ⁶ Luyando ndweamba ndwakuti tubambe milawo ya Leza. Ooyu mulawo ngwemwaambila, mbuli mbumwakamvwa kusaanguna ngwakuti amuyandane.

⁷ Nkaambo kuli babeji banji-banji bamwaikide kale munyika, aabo batazumini kuti Jesu Kilisito wakaba muntu ncobeni. Ooyo muntu uukaka zeezi mmucengi alimwi ngosinkondonyina a Kilisito. ⁸ Amucenjele kuti mutasweekelwi cintu ncomwakabelekela, kutegwa mukatambule bulumbu bwanu buzwide.

⁹ Muntu uuli woonse uutabambi njiisyo ya Kilisito, pele kayungizya zimbi tajisi Leza pe. Pele ooyo uubamba njiisyo eeyo ulijisi boonse Taata a Mwana. ¹⁰ Kuti umwi waboola kuli ndinywe kataiisyi eezi, mutamutambuli muŋanda yanu. Mutamujuzyi akumujuzya. ¹¹ Ooyo uumujuzya ulazumina micito yakwe mibi.

Majwi aamamanino

¹² Zyakumwaambila nzinji, pele nsikoomulembela mulugwalo. Njeeya buyo kuzoomuswaya nkamwaambile buya amulomo mpande kutegwa tukakondwe buzwide. ¹³ Bana bamucizi wako uusalidwe bakujuzya.