2 Batesalonika 1

¹ Ndiswe ba Paulu, Siluvano, a Timoti, tulamujuzya nombungano yaku Tesalonika iili njiya Leza Taata a Mwami Jesu Kilisito. ² Leza Taata a Mwami Jesu Kilisito, bamubede aaluse akumupa luumuno.

Zyalubeta Kilisito aakuboola

³ Tuleelede kulumba Leza lyoonse akaambo kandinywe, nobakwesu. Tuleelede kucita oobo nkaambo lusyomo lwanu luyabukomena kapati, nkabela aluyando ndomuyandana luyabuvula. ⁴ Nkankakaako ncotulisumpula nkaambo kanu kumbungano zya Leza. Tulacita oobo nkaambo kakukakatila alusyomo lwanu mumakatazyo amumapenzi oonse ngomupenga. ⁵ Zyoonse eezi zilatondezya kuti Leza ubeteka cabululami. Ncayanda ncakuti mweelede kunjila mubwami bwa Leza mbomupengela. ⁶ Leza uyoobonya bululami bwakwe nayoobasubula amapenzi aabo bamupenzya. ⁷ Pele nywebo nomupenga lino uyoomupa kulyookezya antoomwe andiswe. Uyoocita oobo ciindi Mwami Jesu aakuboola kuzwa kujulu antoomwe abangelo bakwe basinguzu. ⁸ Uyooboola amulilo uuvwilima akuzoosubula aabo batazi Leza abaabo bataswiilili Makani Mabotu aaamba zya Mwami wesu Jesu. ⁹ Cisubulo cabo ncakuti bayoonyonyoonwa akutamani. Bayootandwa kuzwa ku Mwami akubulemu bwakwe bwanguzu. ¹⁰ Ziyooba boobo buzuba mbwayooboola kuti basalali bakwe bamulemeke, iiyi, basyomi bakwe bamulemekezye. Anywebo muyooba ambabo nkaambo mwakasyoma bumboni bwesu.

¹¹ Tulamukombela ciindi coonse kuti Leza amucitye kuti mweelele kwiitwa kwanu. Alimwi tulalomba kuti munguzu zyakwe amuyumye-yumye kuti mucite zibotu zyoonse nzyomuyanda kucita amilimo iitondezya lusyomo lwanu. ¹² Ndendilyo Mwami wesu Jesu nayoolemekwa mulindinywe, eelyo anywebo muyoolemekwa nkaambo muli bakwe. Zyoonse eezi ziyooba ankaambo kaluse lwa Leza wesu alimwi alwa Mwami Jesu Kilisito.