2 Bami 8
Mukaintu waku Syunemu mbwaakabweeda
1 Lino Elisya wakaambila mukaintu waku Syunemu ooyo uuli aamwana ngwaakabusya kuzwa kubafu kuti, “Amuzwe mukwasyi woonse mukkale-kkale kufumbwa nkomukonzya, nkaambo Mwami Leza waambilizya kuti kuyooba nzala munyika iino kwamyaka iili ciloba.” 2 Aboobo mukaintu ooyo wakanyamuka mbubwakamwaambila muntu wa Leza, wakainka abamukwasyi wakwe waakukkala munyika ya Bafilisiti kwamyaka iili ciloba.
3 Lino myaka eeyi niyakainda, mukaintu ooyo wakapilukila. Wakaya kumwami kuyookumbila ŋanda amuunda wakwe. 4 Ciindi eeco mwami wakali kukanana a Gehazi mubelesi wamuntu wa Leza kati, “Kondaambila zintu zyoonse zipati Elisya nzyaakacita.” 5 Lino naakacili kwaambila mwami mbuli mbwaakabusya mufu, mukaintu ooyo Elisya ngwaakabusizya mwana wakaima kumbele lyamwami kalomba ŋanda amuunda wakwe. Mpawo Gehazi wakati, “O mwami wangu ngonguwe ooyu mukaintu amwanaakwe ooyo Elisya ngwaakabusya.” 6 Mwami naakabuzya mukaintu ooyo wakamwaambila mbubonya. Eelyo mwami wakalailila umwi wabalupati-pati bakwe kuti, “Ubone kuti mukaintu ooyu wapilusigilwa lubono lwakwe loonse kubikkilizya ampindu yakazwa mumuunda wakwe kuzwa buzuba oobo naakazwa mucisi muno kusikila sunu.”
Elisya amwami Benihadadi waku Alamu
7 Lino Elisya wakasika ku Damasikasi. Nkabela ciindi eeci Benihadadi mwami waku Alamu wakali kuciswa, eelyo naakaambilwa kuti, “Kwakasika muntu wa Leza kuno,” 8 mwami wakaambila Hazayeli kuti, “Tolelela acipego uunke ukabonane amuntu wa Leza. Ukabuzye Mwami Leza kwiindila mulinguwe kuti, ‘Sena ndilapona kubulwazi oobu?’” 9 Aboobo Hazayeli wakainka kuyoobonana a Elisya, wakatolelela azintu zibotu zyamu Damasikasi zyakayumwidwe nkamela zili makumi one. Naakasika akwiima kumbele lyakwe wakati, “Mwanaako Benihadadi mwami wa Alamu wandituma kulinduwe kuti ndibuzye kuti, ‘Sena ndilapona kubulwazi oobu?’”
10 Elisya wakamwaambila kuti, “Mwami Leza wandiyubunwida kuti ulafwa. Pele yebo ukamwaambile kuti ulapona ncobeni.” 11 Aboobo Elisya wakalangisisya Hazayeli mane limwi waba aasoni. Amane muntu wa Leza wakalila. 12 Mpawo Hazayeli wakabuzya kuti, “Ino ulila nzi simalelo wangu?” Wakamwiingula kuti, “Nkaambo ndabona bubi mboyoocita ku Baisilayeli, uyootenta minzi yabo iikwabililidwe, uyoonyonyoona bakubusi babo apanga, uyooumputa twana twabo ansi akwaandula bakaintu boonse baminsi.”
13 Mpawo Hazayeli wakati, “Ino mebo ndemubelesi wako ndimeni kuti nkacite zili boobu?” Elisya wakati, “Mwami Leza wandiyubunwida kuti uyooba mwami wacisi ca Alamu.”
14 Mpoonya wakazwa kumbele lya Elisya, waakusika kuli simalelo wakwe, walo ooyo wakabuzya kuti, “Ino Elisya wakwaambila kuti nzi?” Wakati, “Wandaambila kuti ulapona ncobeni.” 15 Pele nibwakaca wakabweza sani demu walinyika mumaanzi, akumuvumba ameso mwami aboobo mwami wakafwa. Mpoonya Hazayeli wakaba ngomwami mubusena bwakwe.
Mwami Jeholamu wakucisi ca Juda
16 Mumwaka wasanu wa Jolamu mwana wa Ahabu mwami wacisi ca Isilayeli, Jeholamu mwanaa Jehosyafati, mwami wacisi ca Juda wakatalika kulela. 17 Wakali aamyaka iili makumi otatwe aibili ciindi naakaba mwami, nkabela wakalela mu Jelusalemu kwamyaka iili lusele. 18 Wakatobela nzila zyabami ba Isilayeli, mbubonya mbuli bwakacitide mukwasyi wa Ahabu, alimwi wakakwete mwana wa Ahabu. Wakabisizya Mwami Leza. 19 Nikuba boobo Mwami Leza taakwe naakayanda kunyonyoona cisi ca Juda pe, nkaambo ka Devedi mubelesi wakwe, nkaambo wakamusyomezya kuti alunyungu lwako uyoolela lyoonse.
20 Mumazuba aa Jeholamu, Baedomu bakazangila cisi ca Juda, akulibikkila mwami wabo beni. 21 Mpoonya Jeholamu wakainka ku Zaiya ankalaki zyakwe zyoonse ooko Baedomu nkubakamuzinguluka pele wakabuka masiku, wabapola, nkaako basilumamba bakwe bakatijila kumaanda aabo. 22 Mbombuboobu Baedomu mbobacizangide asunu. Ciindi nciconya eeci awalo munzi wa Libuna wakazanga.
23 Lino zyoonse Jeholamu nzyaakacita azimwi, zililembedwe mubbuku lyamakani aabami ba Juda. 24 Jeholamu wakafwa akuzikkwa mumunzi wa Devedi abasikale bakwe, eelyo Ahaziya mwanaakwe nguwakaba mwami mubusena bwakwe.
Mwami Ahaziya wacisi ca Juda
25 Mumwaka wakkumi aibili wakulela kwa Jolamu, mwana wa Ahabu, mwami wacisi ca Isilayeli, Ahaziya mwanaa Jeholamu mwami wacisi ca Juda wakatalika kulela. 26 Ahaziya wakali aamyaka iili makumi obilo aibili ciindi naakatalika kulela, nkabela wakalela kwamwaka omwe mu Jelusalemu. Banyina bakali ba Ataliya, muzyukulu wa Omuli mwami wacisi ca Isilayeli. 27 Mukuti Ahaziya wakalisweene a Ahabu mukukwata, wakatobela nzila yamukwasyi wa Ahabu. Wakabisizya Mwami Leza mbubonya mbuli bwakali kucita mukwasyi wa Ahabu.
28 Wakainka a Jolamu mwana wa Ahabu kuyoolwana a Hazayeli mwami waku Alamu ku Lamotigiliyadi. Ooko Baalamu bakayasa Jolamu. 29 Mpoonya wakapiluka kuti akalimvwe kabotu kuzwa kuzilonda nzyaakayaswa a Baalamu ciindi nibakalikulwana Hazayeli mwami wa Baalamu ku Laama. Mpawo Ahaziya mwanaa Jeholamu mwami wacisi ca Juda wakainka kuyoobona Jolamu mwana wa Ahabu ku Jezuliili, nkaambo wakaliliciside.