2 Bami 7

¹ Elisya wakati, “Amuswiilile majwi aa Mwami Leza, ‘Ulati juunza mbuli eeno cisuwo cabusu cinooulwa syekeli lyomwe azisuwo zyobilo zyabusu bwabbali zinooulwa syekeli lyomwe kumanjililo aamunzi wa Samaliya.’” ² Mpawo silutwe ooyo mwami ngwaakali kusyoma wakati kumuntu wa Leza, “Nikuba kuti Mwami Leza watuleleka acakulya kuzwa kujulu, sena inga cintu eeci cacitika?” Pele walo wakati, “Ulalibonena ameso omwini, pele tokooyoocilya pe.”

Basilumamba baku Alamu mbubakatija

³ Lino kwakali baalumi bone bakali basicinsenda bakakkede aamulyango, kabaambauzyanya muli cabo kuti, “Ino tukkalide nzi kuno limwi tufwe?” ⁴ Kuti naa twaambe kuti, “Atweende mumunzi, mmuli nzala amwalo tuyoofwa, alimwi kuti katukkede aano ncimwi buyo tulafwa. Nkaako atweende kuzivuka zya Baalamu tukalyaabe, kuti naa bakatuleke katuli baumi ncibotu, kuti naa bakatujaye mbubo.” ⁵ Mpoonya bakanyamuka ciindi cakulubundu-bundu kuya kuzivuka zya Baalamu, ciindi nibakaakusika kutalikila zivuka bakajana taakwe amuntu naba omwe pe. ⁶ Nkaambo Mwami Leza wakacita kuti basilumamba ba Baalamu bamvwe kulila kwankalaki amambalakata aamabbiza akuyoba kwampi mpati, bakalyaambauzya muli cabo bati, “Amubone, mwami wa Baisilayeli watamba bami ba Bahiti aba Baijipiti kuti bazootulwane.” ⁷ Aboobo bakatija ciindi calubundu-bundu basiya matente, mabbiza, ambongolo zyabo, bakasiya zivuka mbubakaziyakide balivuna lwabo.

⁸ Lino basicinsenda aaba nibakasika kutalikila zivuka bakanjila mutente limwi, balya akunywa babweza nsiliva, ngolida azisani batola baakuzisisa, alimwi bakapilukila banjila mutente limwi bakabweza zintu baakusisa. ⁹ Bamane bakalyaambauzya muli cabo bati, “Tiitwacita kabotu pe. Aaya makani mabotu sunu, tatweelede kwaaumuna buyo, naa tulindile buce tuzoosubulwa, nkaako lino atweende tukaambe kuli baŋanda yabwami.” ¹⁰ Mpawo bakainka baakusika kubalindizi baamulyango wamunzi, babaambila kuti, “Twali kuzivuka zya Baalamu, pele taakwe muntu ngutwabona nikuba kumvwa pe, taakwe ciliko pele buyo mabbiza ambongolo, amatente mbubakaasimpila.”

¹¹ Mpoonya balindizi baamulyango bakaambilizya makani aaya kuŋanda yabwami. ¹² Mpawo mwami wakabuka ciindi camasiku, waambila balupati-pati bakwe wati, “Ndiyanda kumwaambila ncibacita Baalamu. Balizi kuti tufwide nzala, nkaako bazwa muzivuka zyabo bayubilila kabati, ‘Bazwa buyo mumunzi tubajate tuunjile kabotu.’”

¹³ Mpoonya umwi wabalupati-pati bakwe wakati, “Bantu bali mumunzi uuno bali mbuli Baisilayeli baya bafwa kale, nkaako tuma baalumi bamwi amabbiza aaya osanwe aasyeede kuti bakabone cacitika ooko.” ¹⁴ Aboobo bakasala nkalaki zyobilo amabbiza aazyo, mwami wakatuma kuti batobele mpi ya Baalamu. Wakati kuli basikweenzya nkalaki, “Kamuya mukalange.” ¹⁵ Aboobo bakabatobela mane baakusika ku Jolodani, bakajana kuti munzila moonse mwakali zisani azilwanyo eezyo Baalamu nzibakali kuya bulosya nibakali kutija. Eelyo batumwa aabo bakapiluka akwaambila mwami. ¹⁶ Bantu bamvwe bakainka kuyoosaala zivuka zya Baalamu. Aboobo cisuwo cabusu cakaulwa syekeli lyomwe, zisuwo zyobilo zyabusu bwabbali zyakaulwa syekeli lyomwe, mbubonya mbuli Mwami Leza mbwaakaamba. ¹⁷ Lino mwami wakalibikkide silutwe ooyo ngwaakali kusyoma kuti alange zyamulyango, bantu bakamulyatauka aamulyango ooyo aboobo wakafwa, mbubonya mbuli bwakaambide muntu wa Leza ciindi mwami naakasikide kuŋanda yakwe. ¹⁸ Zyoonse zyakacitika mbubuli bwakaambide muntu wa Leza ku Mwami naakati, “Junza mbuli eeno cisuwo cabusu cinooulwa syekeli lyomwe azisuwo zyobilo zyabusu bwabbali zinooulwa syekeli lyomwe kumanjililo aamunzi wa Samaliya. ¹⁹ Ooyu silutwe kumanjililo aamunzi wa Samaliya wakaambide kuti, ‘Nikuba kuti Mwami Leza watuleleka acakulya kuzwa kujulu, sena cintu inga eeci cacitika?’” Nkabela muntu wa Leza wakamwiingwide kuti, “Ulalibonena ameso aako omwini, pele tokooyoocilya pe.” ²⁰ Eeci ncencico ncobeni cakacitika. Bantu bakamulyatauka amulyango, wakafwa.