2 Bami 5
Naamani mbwaakaponyezegwa
1 Lino Naamani silutwe wabasilumamba bamwami waku Alamu, wakali muntu uusyomeka kapati kumwami wakwe alimwi wakali kumuyandisya, nkaambo kwiindila mulinguwe Mwami Leza wakazundya Baalamu. Wakali mwaalumi singuzu, pele wakali sicinsenda. 2 Cimwi ciindi Baalamu bakalwana a Baisilayeli eelyo bakatola kasimbi kamwi ka Baisilayeli mubuzike. Kasimbi aaka kakali kubelekela muka Naamani. 3 Mpawo kakaambila muka Naamani kuti, “Nicabota naalizi simalelo wangu kuti kuli musinsimi ku Samaliya! Naaya kumuponya cinsenda cakwe.” 4 Mpoonya Naamani wakainka kuyooambila mwami zyakaamba kasimbi aaka kaku Isilayeli. 5 Eelyo mwami waku Alamu wakati, “Koya ndakulembela lugwalo kumwami wa Isilayeli.”
Aboobo wakainka, watolelela amatalenta aansiliva aali kkumi amasyekeli aangolida aali zyuulu kkumi, alimwi azisani zili kkumi zibotu. 6 Eelyo wakatola lugwalo kumwami waku Isilayeli, lwakali kwaamba kuti, “Alugwalo oolo ndatumina Naamani mubelesi wangu kuti umuponye kucinsenda cakwe.”
7 Lino mwami waku Isilayeli naakabala lugwalo wakazapaula zyakusama zyakwe mukunyema akwaamba kuti, “Sena mebo ndime Leza uukonzya kujaya akuponya? Ino nkaambo nzi muntu ooyu naanditumina yooyu kuti mmuponye? Amubone kuti ooyu uyandaula nzwanga andime.”
8 Pele Elisya muntu wa Leza naakamvwa kuti mwami wacisi ca Isilayeli wazapaula zyakusama zyakwe, wakatumina makani aaya kulinguwe wakati, “Nkaambo nzi noozapaula zyakusama zyako? Mutumine kulindime kuti azoozibe kuti kuli musinsimi mucisi ca Isilayeli.”
9 Aboobo Naamani wakainka amabbiza ankalaki zyakwe, wazooima amulyango waŋanda ya Elisya. 10 Mpoonya wakatuma mubelesi wakwe akumwaambila kuti, “Koya ukasambe mumulonga wa Jolodani kwaziindi zili ciloba, eelyo mubili wako ulapilukila mbuli kaindi, ulapona.” 11 Pele Naamani wakanyema, wainka wati, “Amubone ndali kuyeeya kuti ulazwida anze kundibona akukomba ku Mwami Leza wakwe kavukauzya jansi lyakwe aaziziki zyacinsenda akundiponya. 12 Sena Abana a Faapaa milonga yaku Damasikasi tiijisi maanzi mabotu kwiinda aamu Isilayeli? Sena nindatakakonzya kusamba mulinjiyo akusalazigwa?” Aboobo wakapiluka akweenda kanyemede.
13 Pele babelesi bakwe bakamwaambila kuti, “Akaka taata, kuti musinsimi naakulailila kucita cimwi cintu cipati, sena nootacicita? Ino mbuti ono kuti wati, ‘Samba upone?’” 14 Mpawo wakainka, wadubbuka mumaanzi aa Jolodani kwaziindi zili ciloba, mbubonya mbuli mbwaakaamba muntu wa Leza. Mubili wakwe wakapilukila waba mbuli wamwana muniini, wapona. 15 Aawo Naamani ababelesi bakwe wakapilukila kumuntu wa Leza, wasika waima kumbele lyakwe akuti, “Lino ndaziba kuti taakwe Leza munyika yoonse ccita buyo mucisi ca Isilayeli, aboobo lino ndakukumbila kuti utambule cipego cangu ndemubelesi wako.”
16 Pele Elisya walo wakati, “Mbuli Mwami Leza mbwali muumi ooyo ngwebelekela, taakwe ncetitambule pe.” Nikuba kuti Naamani wakamukombelezya walo wakakaka. 17 Mpoonya Naamani wakati, “Mbookaka cipego cangu mebo ndemubelesi wako ndakumbila kuti nditolelezye bulongo bukonzya kunyamuna mamyuulu obilo kuti mbutole kumunzi nkaambo mebo ndemubelesi wako nsikapaizyi limbi kuli baleza bambi ccita buyo ku Mwami Leza alikke. 18 Mwami Leza andilekelele akaambo kakuti neunka amwami wangu kuyookomba kuŋanda ya leza wakwe Limoni, mebo ndavuntama oomo, nkaako Mwami Leza andilekelele mebo ndemubelesi wako akaambo kaceeci.” 19 Mpawo Elisya wakati kulinguwe, “Koya muluumuno.”
Pele Naamani naakeenda buyo kasinzo-sinzo, 20 Gehazi mubelesi wa Elisya muntu wa Leza wakalyaambauzya wati, “Amubone simalelo wangu walekela Naamani Mualamu katatambuli nzyaaletede. Mbuli Mwami Leza mbwali muumi ndilamutandila mebo nkajane zintu kulinguwe.” 21 Aboobo Gehazi wakatandila Naamani. Lino Naamani naakabona muntu uuza buzuzaana, wakaseluka munkalaki mwaakabede kuti amuswaanganye wati, “Sena kuli kabotu?” 22 Wakaingula kuti, “Kuli kabotu. Pele simalelo wangu wandituma, nkaambo mboozwida buyo kwasika bakubusi bobilo bazwa kunkamu yabasinsimi ya mucisi catulundu-lundu ca Efulemu, ndakukumbila bape talenta lyansiliva lyomwe azyakusama zyobilo.”
23 Naamani wakati, “Tola aabili.” Aboobo wakamukombelezya, waanga matalenta aansiliva obilo aayo mutusaka tobilo azyakusama zyobilo, wazipa babelesi bakwe, kuti banyamwide Gehazi. 24 Lino Gehazi naakasika kucilundu, wakatola zintu eezyo akuyoozisisa muŋanda yakwe, wabaambila kuti bainke, eelyo bakainka. 25 Amane wakainka waakwiima kumbele lya Elisya simalelo wakwe, Elisya wakati kulinguwe, “Ino wali kuli?” Walo wakaingula kuti, “Mebo ndemubelesi wako taakwe nkundabede.” 26 Pele Elisya wakamwaambila kuti, “Eee, ndaliko mumuuya ciindi Naamani naaseluka munkalaki kuzookucingauzya? Sena eeci nceciindi cakutambula mali, zisani, myuunda yamaoliva, myuunda yamisaansa, matanga aaŋombe naa aabakaintu bazike? 27 Nkaambo kaako cinsenda ca Naamani cilaza kulinduwe akulunyungu lwako mane kukabe kutamani.” Aboobo Gehazi wakazwida anze waba sicinsenda watuba buu mbuli caanda.