2 Bami 4

Elisya mbwaakagwasya mukamufu mucete

¹ Lino umwi mukaintu wabankamu yabasinsimi wakalilaukila Elisya, wati, “Mebo ndemubelesi wako, mulumi wangu wakafwa, alimwi ulizi kuti wakali kulemeka Mwami Leza, pele ngwaakakweletede ulaboola kuzootola bana bangu bobilo balombe kuti babe bazike bakwe.”

² Mpoonya Elisya wakamwaambila kuti, “Ino ndikucitile nzi? Ino ujisi nzi muŋanda?” Mukaintu wakati, “Mebo ndemubelesi wako taakwe ncejisi pe, pele buyo tufuta munsazi.” ³ Mpawo Elisya wakati, “Koya ukumbile zibiya zinji kuli basimunzinyoko. ⁴ Wamana unjile muŋanda abana bako, mujale kumulyango, utile mafuta muzibiya cimwi acimwi, cazula ucibikke ambali.”

⁵ Eelyo mukaintu wakamusiya, waakulijalila walo abana bakwe. Bakamuletela zibiya zyakuti katila mafuta mulinzizyo. ⁶ Zibiya nizyakazula wakaambila mwanaakwe umwi kuti, “Ndiletela acimbi cibiya.” Walo wakaingula kuti, “Kucinyina cimbi.” Aawo mafuta akaleka kuzwa. ⁷ Mpoonya mukaintu wakaboola kuzooambila muntu wa Leza, pele walo wakati, “Koya ukauzye mafuta ukabbadele zikwelete zyako, aatikasyaale ngaako abana bako.”

Elisya amukaintu muvubi waku Syunemu

⁸ Bumwi buzuba Elisya wakainka ku Syunemu, ooko kwakali kukkala mukaintu muvubi, wakali kumusungilizya kuti alye. Aboobo lyoonse naakali kwiinda kooko, wakali kuleya. ⁹ Mpoonya mukaintu ooyo wakaambila mulumi wakwe kuti, “Bona lino, ndabona kuti ooyu muntu wiinda waawa muntu uusalala wa Leza. ¹⁰ Atuyake kaanda atala aaŋanda, tubikke bulo, tebule, cuuno alambe, kuti kufumbwa ciindi ncaatuswaya kaonena mumo.”

¹¹ Bumwi buzuba Elisya wakasika ooko, eelyo wakaya mukaanda kakwe kamujulu kuyooona. ¹² Mpawo wakaambila mubelesi wakwe Gehazi kuti, “Kamwiite Musyunemu uulya.” Naakamwiita mukaintu ooyo wakaima kumbele lya Elisya. ¹³ Eelyo Elisya wakaambila Gehazi kuti, “Mwaambile kuti watupengela caba ciindi, ino uyeeya kuti inga twamucitila nzi? Sena tumwaambilile kabotu kumwami naa kuli silutwe wabasilumamba?” Pele walo wakaingula kuti, “Ndikkede akati kabantu bangu.” ¹⁴ Elisya wakabuzya kuti, “Ino ncinzi nceelede kucitilwa?” Gehazi wakati, “Tajisi mwana mulombe alimwi mulumi wakwe ulicembeede.” ¹⁵ Mpawo wakati, “Aaswene afwiifwi.” Nkabela naakamwiita wakazooima amulyango. ¹⁶ Elisya wakati, “Bona mwakali mbuli sunu unoolela mwana mulombe muvwanda.” Mukaintu wakati, “Peepe, simalelaangu, omuntu wa Leza utandeeni ndemubelesi wako.” ¹⁷ Pele mukaintu ooyo wakamita ncobeni akuzyala mwana mulombe ciindi nciconya eeco Elisya ncaakaamba.

¹⁸ Lino mwana ooyu naakakomena, bumwi buzuba wakaya kuli wisi ooko nkwaakali kulanga batebula. ¹⁹ Mpoonya wakaambila wisi kuti, “Ndafwa mutwe, ndafwa mutwe.” Mpawo wisi wakaambila mubelesi wakwe kuti, “Mutole kuli banyina.” ²⁰ Naakamutola akumusiya kuli banyina mwana wakakkala amubili alibanyina mane kusikila acilungu-lungu, mpoonya wakafwa. ²¹ Eelyo bakamutola muŋanda yamujulu bamulazika abulo bwamuntu wa Leza, bazwa bamujalila. ²² Mpawo wakaita mulumi wakwe, wamwaambila kuti, “Nditumina umwi wababelesi bako ambongolo kuti ndifwambaane kuunka kumuntu wa Leza akupiluka.” ²³ Pele mulumi wakati, “Ino nkaambo nzi ncoyandila kuunka sunu? Kayi sunu tabuli buzuba bwamwezi mupya nibuba bwa Sabata.” Pele walo wakati, “Taakwe mbocibede.” ²⁴ Mpoonya wakabikka cuuno ambongolo, akwaambila mubelesi wakwe kuti, “Solola utandilindili ccita nkwaambile.” ²⁵ Aboobo wakanyamuka, waakusika kumuntu wa Leza kucilundu ca Kaameli.

Lino muntu wa Leza naakamubona kaza buza alaale wakati kuli Gehazi mubelesi wakwe, “Langa nguulya Musyunemu ulaza, ²⁶ zuza ukamucingauzye ukabuzye kuti, ‘Sena uli kabotu? Uli kabotu amulumi wako na? Awalo mwana sena uli kabotu?’” Walo wakaingula kuti, “Pe, bali kabotu.” ²⁷ Naakasika kucilundu ooko kwakakkede muntu wa Leza wakamujata kumaulu. Mpawo Gehazi wakayanda kuti amutonke. Pele muntu wa Leza wakati, “Komuleka, nkaambo ulipengede mumoyo, pele Mwami Leza taandiyubunwida pe.”

²⁸ Mpoonya mukaintu wakabuzya kuti, “Sena ndakakumbila simalelo wangu kuti ndipegwe mwana? Sena taakwe nindakaamba kuti, utandeeni?”

²⁹ Mpawo Elisya wakaambila Gehazi kuti, “Funka jansi lyako ulyaange mucibuno, utoleele amusako wangu uzuze. Kuti naa ukaswaangane muntu munzila, utakamujuzyi, kuti naa wakujuzya utamuvuwi pe, eelyo waakusika ukalazike musako wangu abusyu bwamwana.”

³⁰ Mpoonya banyina mwana bakati, “Mbuli Mwami Leza mbwali muumi, ayebo mboli muumi, nsikookusiya pe.” Mpawo Elisya wakanyamuka wamutobela. ³¹ Pele Gehazi wakasolola, wakaakulazika musako abusyu bwamwana, pele taakwe naakaputauka. Mpawo Gehazi wakapiluka kuyooswaanganya Elisya, waakuti, “Mwana taakwe naaputauka pe.”

³² Lino Elisya naakasika kuŋanda wakajana kuti mwana ulilede abulo bwakwe kafwide. ³³ Eelyo wakalijalila amwana wakomba ku Mwami Leza. ³⁴ Wakaakulala amubili wamwana, wakajinsika mulomo wakwe amulomo wamwana, ameso aakwe ameso amwana, amaanza aakwe amaanza amwana, lino mbwaakalyoolweda buyo mubili wamwana wakatalika kukasaala. ³⁵ Amane oobo, wakabuka alimwi weendeenda muŋanda, eelyo wakaakulyoolola amwana lwabili, nkabela mwana wakeesemuka ziindi zili ciloba, mpawo wakanamuna meso. ³⁶ Mpoonya Elisya wakaita Gehazi kuti, “Ita mukaintu ooyu Musyunemu.” Aboobo wakamwiita. Naakasika wakamwaambila kuti, “Ngooyu mwanaako.” ³⁷ Mpawo wakawa kumaulu aakwe wamukotamina, wabweza mwanaakwe wazwida anze.

Maleele aambi obilo

³⁸ Lino Elisya wakaboola alimwi ku Giligali ciindi kakuli nzala mucisi. Eelyo bankamu yabasinsimi nibakakkede kumbele lyakwe, wakaambila mubelesi wakwe kuti, “Sibika bbiya, ubajikile musinza.” ³⁹ Lino umwi wabo wakaya musokwe kuyoocela cisyu nkabela wakajana basijatwa, wakabavunga mujansi, wabaleta akuzoobakosoola wababikka mubbiya katabalabide. ⁴⁰ Eelyo wakaungula kuti bantu balye. Pele nibakali kulya bakapozomoka bati, “Omuntu wa Leza muli ncefu mumusinza!” Tiibakali kukonzya kulya pe. ⁴¹ Mpawo Elisya wakati, “Amulete busu eelyo wakabutila mubbiya wati, ‘Amuungule balye bantu.’” Kwakacinyina ncefu pe.

⁴² Lino kwakasika umwi mwaalumi uuzwa ku Baalisyalisya wakaletela muntu wa Leza zinkwa zyamaila mataanzi, makumi obilo, ampunga zyamaila. Elisya wakati, “Zyaabile bantu kuti balye.” ⁴³ Pele mubelesi wakwe wakati, “Ino inga ndabaabila buti bantu aaba bali mwaanda?” Walo wakati, “Baabile buyo bantu balye, nkaambo mboobu mbwaamba Mwami Leza, ‘Balalya, bakkute, basiye.’”

⁴⁴ Aawo wakabaabila nkabela bakalya akuzisiya mbubonya mbuli majwi aa Mwami Leza.