2 Bami 3
Nkondo yakali akati ka Isilayeli a Mowabu
1 Mumwaka wakkumi alusele wakulela kwa Jehosyafati mwami wacisi ca Juda, Jolamu mwana wa Ahabu wakaba ngomwami wa Baisilayeli mu Samaliya, nkabela wakalela kwamyaka iili kkumi aibili. 2 Wakabisizya Mwami Leza, nikuba kuti taakali mbuli wisi abanyina, nkaambo wakagwisya mutuni wa Baali wisi ngwaakayakide. 3 Nikuba boobo wakakakatila kuzinyonyoono zya Jelobowamu mwanaa Nebati, ooyo wakasolweda Baisilayeli muzinyonyoono, taakazileka pe.
4 Lino Mesya mwami wacisi ca Mowabu wakavubide mbelele, mwaka amwaka wakali kutela kumwami wa Isilayeli tubelele tuli zyuulu zili mwaanda, aboya bwambelele zili zyuulu zili mwaanda. 5 Pele ciindi Ahabu naakafwa, mwami wacisi ca Mowabu wakazangila mwami wa Isilayeli. 6 Kuciindi eeco mwami Jolamu wakazwa mu Samaliya, wabunganya basilumamba Baisilayeli boonse. 7 Mpoonya wakatumya majwi kuli Jehosyafati mwami wacisi ca Juda akumwaambila kuti, “Mwami wacisi ca Mowabu wandizangila, sena ulayanda kuunka andime kuti tukalwane Bamowabu?”
Jehosyafati wakati, “Ndilainka nkaambo mebo ndili mbuli nduwe, bantu bangu bali mbuli bantu bako, amabbiza aangu ali mbuli mabbiza aako.” 8 Mpawo wakabuzya kuti, “Ino tutole nzila iili?”
Jolamu wakaingula kuti, “Tutole nzila iiinda munkanda ya Edomu.”
9 Eelyo mwami wa Isilayeli, mwami wacisi ca Juda amwami waku Edomu bakainka. Nkabela nibakeenda cakuzinguluka kwamazuba aali ciloba, maanzi akabamanina basilumamba antoomwe abanyama. 10 Mpoonya mwami wa Isilayeli wakati, “Maawe! Mwami Leza watwiita totatwe toonse swebo kuti atwaabe ku Bamowabu.”
11 Jehosyafati wakati, “Sena taakwe musinsimi wa Mwami Leza okuno kuti atubuzizye ku Mwami Leza?”
Mpawo umwi wabalupati-pati bamwami wa Isilayeli wakati, “Mpali Elisya mwanaa Syafati wakali mugwasyi wa Elija.” 12 Jehosyafati wakati, “Nkokuti mmusinsimi.” Mwami wa Isilayeli a Jehosyafati amwami waku Edomu bakainka kulinguwe.
13 Nkabela Elisya wakaambila mwami wa Isilayeli kuti, “Ino ndikugwasizye nzi? Koya kubasinsimi bauso ababanyoko.” Pele mwami wa Isilayeli wakamwaambila kuti, “Peepe, Mwami Leza nguwatwiita swebo tobami botatwe kuti atwaabe ku Bamowabu.” 14 Elisya wakati, “Mwami Leza Singuzuzyoonse mbwali muumi, ooyo ngwebelekela, nikwatali kuti kuli Jehosyafati mwami wacisi ca Juda ngwendilemeka, nindatakulanganya pe. 15 Lino ndiletela sikalumbu.” Lino sikalumbu naakali kuuma nguzu zya Mwami Leza zyakasikila Elisya. 16 Mpoonya wakati, “Mboobu mbwaamba Mwami Leza, ‘Ndacita kuti aaka kalonga kayuminide kazule maanzi. Mufumbe tunkolola mukalonga aaka kayuminide.’ 17 Mboobu mbwaamba Mwami Leza, ‘Tamukoobona luuwo niiba mvula pele kalonga aaka kalazula maanzi, eelyo nywebo, ŋombe abanyama banu mulanywa.’ 18 Eeci ncitu cuuba-uba ku Mwami Leza, alimwi walo uyooaba Bamowabu kulindinywe. 19 Nkabela muyoozunda minzi yoonse yankwakwa mibotu, muyoogonka misamu yoonse iizyala micelo, muyoosinka tusensa toonse twamaanzi, alimwi muyoowaala mabwe mumyuunda yabo.”
20 Lino nibwakaca, cifumo-fumo ciindi cakupaizya kacili aafwiifwi kwakakunka maanzi kuzwa kulubazu lwaku Edomu. Kalonga kazoofwasuka.
21 Lino Bamowabu boonse nibakamvwa kuti bami basika kuzoobalwana, bakabunganya boonse bakonzya kulwana, bakubusi abapati, bakaakundandama kumunyinza. 22 Nibakabuka cifumo-fumo, zuba nilyakabala amaanzi, Bamowabu bakabona mbuli kuti maanzi asalala bulowa. 23 Mpawo bakati, “Tee mbulowa oobu, nkokuti bami balwana akujayana mulicabo. Lino casyaala Nobamowabu nkusaala buyo!”
24 Pele nibakasika kuzivuka zya Baisilayeli, Baisilayeli bakanyamuka akubalwana kusikila batija, nkabela bakabatandaanya kumwi kabaya bubajaya mane kusikila kucisi cokwabo. 25 Alimwi bakanyonyoona minzi. Kumane muntu amuntu wakawaala bbwe mumuunda mubotu kusikila muunda nuwakazula mabwe. Bakagonka misamu iizyala micelo mibotu akusinka tusensa twamaanzi. Bakasiya munzi wa Kilihaleseti. Basinkwibba buyo mbabakuuzinguluka akuulwana. 26 Lino mwami waku Mowabu naakabona kuti nkondo yamuyumina, wakatola basikulwana amapanga bali myaanda iili ciloba kuti bakapole mumundando wa Basinkondonyina mukuti atijile kumwami waku Edomu pele wakakacilwa. 27 Abone boobo wakatola mwanaakwe wakusaanguna, weelede kuba mwami mubusena bwakwe, wamupaizya alukwakwa kuli leza wa Bamowabu lwamunzi ooyo. Baisilayeli nibakabona kuti bukali bupati bwabasikila, bakapilukila kunyika yokwabo.