2 Bami 25

Munzi wa Jelusalemu mbuwakawa

¹ Lino mumwaka wafuka wakulela kwa Zedekiya, mubuzuba bwakkumi bwamwezi wakkumi, Nebukadineza mwami waku Babuloni wakaya kuyoolwana munzi wa Jelusalemu abasilumamba bakwe boonse. Wakayaka zivuka anze lyamunzi akuyaka zitantaala zyakuusinkilizya kuuzinguluka woonse. ² Munzi ooyu wakalisinkilizidwe mane kusika mumwaka wakkumi aumwi wakulela kwa mwami Zedekiya. ³ Eelyo mubuzuba bwafuka bwamwezi wane nzala yakabbebba kapati cakuti bantu mumunzi bakabula cakulya. ⁴ Mpoonya bakaandula bwaanda, nikuba kuti Bababuloni bakazingulukide munzi, balo basilumamba ba Zedekiya boonse bakatija ciindi camasiku, bakainda kumulyango uuli akati kabwaanda bobilo kumbali aamuunda wa mwami. Bakatijila kufwiifwi aku Alaba. ⁵ Pele basilumamba ba Bakalodiya bakatandaanya mwami akuyoomweenzya kumabanda aa Jeliko. Nibakabona boobo basilumamba bakwe bakamumwaika akutija, ⁶ walo wakajatwa. Wakatolwa kumwami waku Babuloni ku Libula ooko nkubakaakumupeda mulandu. ⁷ Zedekiya kalangilila bakajaya bana bakwe balombe. Bamane walo bakamudonkola meso akumwaanga ankeetani zyamukuba, bamutola ku Babuloni.

Ŋanda ya Mwami Leza mbuyakamwaigwa

⁸ Lino mubuzuba bwaciloba, bwamwezi wasanu mumwaka wakkumi afuka wakulela kwa Nebukadineza mwami waku Babuloni, Nebuzaladani mulailili wabalindizi uuli ngoumwi wabalupati-pati bamwami wa Babuloni, wakasika ku Jelusalemu. ⁹ Wakatenta ŋanda ya Mwami Leza, ŋanda yabwami, alimwi amaanda naali buti oonse mu Jelusalemu. Wakatenta amaanda aabalemenede oonse. ¹⁰ Basilumamba ba Bakalodiya boonse bakali kusolwedwa amulailili wabalindizi, bakamwaya bwaanda bwakazingulukide munzi wa Jelusalemu. ¹¹ Mpawo Nebuzaladani mulailili wabo wakatola bantu mubuzike aabo bakasyeede mumunzi abamwi kubikkilizya abaabo bakalyaabide kumwami waku Babuloni. ¹² Pele mulailili ooyu wakasiya bamwi bacete babacete munyika kuti kabalima mumisaansa amyuunda.

¹³ Lino Bakalodiya bakapwaya zicinda zyamukuba, zikkazikilo, acibumbe caziba eezyo zyakali muŋanda ya Mwami Leza. Bamane bakabweza mukuba wazyo akuutola ku Babuloni. ¹⁴ Alimwi bakatola azibiya, mafocolo, tuzimyo twamalambe, mitiba, tulongo twatununkilizyo azibelesyo zyoonse zyamukuba zyakali kubelesegwa muŋanda ya Mwami Leza. ¹⁵ Mulailili ooyu wakatola ankaye zyoonse alimwi amitiba yakusansaizya yakali yangolida naa yansiliva. ¹⁶ Mukuba wakali wazicinda zyobilo, wazipumpu alimwi awacibumbe caziba eezyo Solomoni zyaakapangilide ŋanda ya Mwami Leza, tiiwakali kukonzeka kweelekwa bulemu bwawo pe. ¹⁷ Cicinda comwe-comwe cakali kulampa tukokola tuli kkumi alusele. Cipumpu cakali atala lyacicinda cakali kulampa tukokola totatwe, alimwi cakabotezegwa atubulo tupatangene amapomegileneti aamukuba kucizinguluka. Cicinda cimwi acalo cakali mbubonya, cakali atubulo tupatangene.

Bantu ba Juda mbubakatolwa ku Babuloni

¹⁸ Lino mulailili wabalindizi wakatola Selaiya mupaizi mupati a Zefaniya uumuccilila mumulimo, alimwi abalindizi baamilyango botatwe mubuzike. ¹⁹ Akati kabaabo bakasyeede mumunzi, wakatola awakali mupati wabasilumamba kubikkilizya abalailili bamwami bosanwe. Wakatola yooyo amulembi wakali mupati wampi yakulemba, wakatolelezya beelede munkondo abamwi bamwi bamugwasya bali makumi aali cisambomwe. ²⁰ Nebuzaladani mulailili wakatola bantu aaba boonse akuyoobasisya kumwami waku Babuloni ku Libula. ²¹ Ooko ku Libula mucisi ca Hamati mwami wakasungula kuti bajaigwe.

Mbombuboobu bantu ba Juda mbubakatolwa mubuzike kulaale anyika yabo.

Gedaliya mweendelezi wacisi ca Juda

²² Lino mwami Nebukadineza wakasala Gedaliya mwana wa Ahikamu mwanaa Syafani kuti eendelezye bantu aaba bakasyeede mu Juda. ²³ Bapati babasilumamba baku Juda abamwi nibakamvwa kuti mwami waku Babuloni wakasala Gedaliya kuti abe mweendelezi, bakaboola antoomwe abasilumamba babo kuli Gedaliya ku Mizipa. Bapati babasilumamba aaba mbaa: Isyimayeli mwanaa Netaniya, Johanani mwanaa Kaleya, Selaiya mwanaa Tanumeti Munetofati, a Jaazaniya mwanaa Mumaakati. ²⁴ Gedaliya wakasyomezya baalumi aabo abantu babo, “Mutayoowi kubelekela ba Kalodiya, amukkale munyika muno mubelekele mwami waku Babuloni, ndendilyo zyoonse nozitimweendele kabotu.”

²⁵ Pele mumwezi waciloba, Isyimayeli mwanaa Netaniya, mwana wa Elisyama waciinga cabwami, wakaboola abaalumi bali kkumi wazoojaya Gedaliya abamwi bamu Juda alimwi a Bababuloni aabo bakali aanguwe ku Mizipa. ²⁶ Eeci nicakacitika, bantu boonse kutalikila kubantu buyo kuyoosika kuli balupati-pati antoomwe abapati babasilumamba bakatijila ku Ijipiti akaambo kakuyoowa Bababuloni.

Jehoiyakini mbwaakaangununwa

²⁷ Lino mumwaka wamakumi otatwe aciloba Jehoiyakini mwami waku Juda katoledwe mubuzike, mumwaka ooyo Evilimelodaki wakaba mwami wacisi ca Babuloni, wakaangununa Jehoiyakini kuzwa muntolongo mubuzuba bwamakumi obilo aciloba mumwezi wakkumi aibili. ²⁸ Wakaamba calubomba anguwe wakamusumpula akumupa cuuno cabulemu kwiinda baminyina mbaakali aabo mu Babuloni. ²⁹ Nkaako Jehoiyakini wakasamununa zyantolongo, alimwi mumazuba aabuumi bwakwe boonse wakali kulida antoomwe amwami. ³⁰ Buzuba abuzuba mwami wakali kupa Jehoiyakini zyakuvola kwakwe kwabuumi bwakwe boonse.