2 Bami 24

¹ Lino Jehoiyakimu kacilela mwami Nebukadineza waku Babuloni wakasaala cisi cakwe, wakamucita kuti abe mutwanga wakwe kwamyaka yotatwe. Pele wakazangila Nebukadineza. ² Mwami Leza wakamutumina mpi yaku Babuloni, Baalamu, Bamowabu alimwi a Baamoni kuzoomulwana. Wakabatuma kuzoonyonyoona cisi ca Juda, mukweendelana amajwi Mwami Leza ngaakaamba kwiindila mubabelesi bakwe basinsimi. ³ Ncobeni eeci cakacitika mu Juda kweendelana ambwaakaamba Mwami Leza, amukuti abagwisye kulinguwe, nkaambo kazibi zya Manase azyoonse nzyaakacita, ⁴ alimwi akaambo kabulowa mbwaakatila bwabantu batakwe mulandu. Wakazuzya Jelusalemu abulowa bwabantu batakwe mulandu, nkaako Mwami Leza taakalekelela pe. ⁵ Lino eezyo zyoonse Jehoiyakimu nzyaakacita azimwi, zililembedwe mubbuku lyamakani aabami ba Juda. ⁶ Aboobo Jehoiyakimu wakafwa akuzikkwa abasikale bakwe, nkabela mwanaakwe Jehoiyakini wakaba ngomwami mubusena bwakwe. ⁷ Eelyo mwami wacisi ca Ijipiti taakwe naakaya limbi kukulwana nkaambo mwami wacisi ca Babuloni wakatola cisi coonse kuzwida kumulonga wa Ijipiti kusikila kumulonga wa Yufuletisi.

Mwami Jehoiyakini wacisi ca Juda

⁸ Jehoiyakini wakali aamyaka iili kkumi alusele naakatalika kulela, wakalela kwamyezi yotatwe mu Jelusalemu. Banyina bakali ba Nehusyita mwana wa Elinatani waku Jelusalemu. ⁹ Awalo ooyu wakabisizya Mwami Leza, mbubonya mbuli bwakacita wisi.

¹⁰ Lino ciindi eeco balupati-pati babasilumamba ba Nebukadineza mwami wacisi ca Babuloni bakasika ku Jelusalemu akuzoosinkilizya munzi. ¹¹ Mpawo Nebukadineza mwami wacisi ca Babuloni wakaboola kumunzi ooyo, ciindi balupati-pati bakwe aaba kabasinkilizizye munzi ooyu. ¹² Eelyo Jehoiyakini mwami wacisi ca Juda wakalyaaba walo kumwami wacisi ca Babuloni abanyina, bagwasyi bakwe, balemekwa alimwi abalupati-pati bakwe. Lino mwami wacisi ca Babuloni wakatola Jehoiyakini mubuzike mumwaka walusele wakulela kwakwe. ¹³ Alimwi wakagwisya zintu muziyobwedo zyaŋanda ya Mwami Leza, aŋanda yabwami akutola zintu zyoonse zyangolida eezyo mwami Solomoni wa Isilayeli nzyaakabambilide ŋanda ya Mwami Leza, mbubonya mbuli Mwami Leza mbwaakaamba. ¹⁴ Wakatola bantu boonse bamu Jelusalemu, nkokuti balupati-pati, abaalumi bakali kukonzya kulwana basibuuya abafuzi antoomwe bakali zyuulu zili kkumi. Wakasiya buyo bacete mucisi. ¹⁵ Nebukadineza wakatolelela a Jehoiyakini, banyina, bakaintu bakwe, balupati-pati, abantu balaampuwo ku Babuloni. ¹⁶ Alimwi mwami wacisi ca Babuloni wakatola bazike ku Babuloni, baalumi basinguzu beelede kulwana, bakali zyuulu zili ciloba. Wakatolelezya abasibuuya abafuzi bali cuulu. ¹⁷ Mpawo wakabikka Mataniya wisi musyoonto Jehoiyakini kuba mwami mubusena bwakwe, amane wakasandula zina lyakwe akumwiita kuti Zedekiya.

Mwami Zedekiya wacisi ca Juda

¹⁸ Zedekiya wakajisi myaka iili makumi obilo aumwi naakatalika kulela. Wakalela kwamyaka iili kkumi aumwi mu Jelusalemu. Banyina bakali ba Hamutali, mwanaa Jelemiya waku Libuna. ¹⁹ Awalo ooyu wakabisizya Mwami Leza mbubonya mbuli Jehoiyakimu mbwaakacita. ²⁰ Eeci cakacitika kumunzi wa Jelusalemu akucisi ca Juda akaambo kakunyemya Mwami Leza, mpawo wakabatanda kuzwa kulinguwe.