2 Bami 23

Josiya mbwaakalesya bukombi bwakunze

¹ Lino mwami Josiya wakaita bapati bacisi ca Juda abamu Jelusalemu boonse. ² Mwami wakainka kuŋanda ya Mwami Leza, antoomwe abantu bamucisi ca Juda abamu Jelusalemu, bapaizi abasinsimi abantu boonse, kutalikila kubantu buyo abalemekwa. Wakabala majwi aabbuku lyacizuminano eelyo lyakajanwa muŋanda ya Mwami Leza. ³ Mwami wakaliimvwi munsi amusemo, akubukulusya cizuminano kumbele lya Mwami Leza, kuti unootobela majwi amalailile alimwi amilawo ya Leza amoyo wakwe oonse amuuya wakwe woonse, akuccilila majwi aacizuminano eeci mbubonya mbuli mbwaalembedwe mubbuku eeli. Bantu abalo bakazumina mbubonya kuti bayooccilila cizuminano eeco.

⁴ Lino mwami wakalailila Hilikiya mupaizi mupati, abapaizi bamuccilila abalindizi baamulyango, kuti bagwisye muŋanda ya Mwami Leza zibelesyo zyoonse zya Baali a Asyela, azyazyakujulu. Nkabela wakazitenta anze lya Jelusalemu kumyuunda yakkuti lya Kidiloni. Wakabweza twe lyazyo walitola ku Beteli. ⁵ Wakatanda bapaizi bamizimo aabo bami bacisi ca Juda mbindakasalide kuti kabatenta tununkilizyo kumalende muminzi yamucisi ca Juda ayeengelede Jelusalemu, aaba mbambabo bakali kutentela Baali, zuba, mwezi, nyenyezi alimwi azyoonse zyakujulu tununkilizyo. ⁶ Eelyo wakagwisya mutuni wa Asyela kuzwa muŋanda ya Mwami Leza, wuutola kukkuti lya Kidiloni, kunze lya Jelusalemu akuutenta ooko. Wakuusiya mane waba busu oobo mbwaakamwaila azyuumbwe zyabantu buyo. ⁷ Alimwi wakamwaya maanda aabaalumi basibwaamu aakali muŋanda ya Mwami Leza amoomo bakaintu mobakali kulukila majansi abukombi bwa Asyela. ⁸ Mpawo Josiya wakaleta bapaizi ba Mwami Leza boonse bakali muminzi yacisi ca Juda kuti bazoosofwaazye zipaililo zyamalende kwalo ooko bapaizi bazyo nkubakali kutentela tununkilizyo, kuzwa ku Geba kusikila ku Biiyasyeba. Alimwi wakamwaya twaanda twakali kumanjililo aamulyango wa Josyuwa wakali mweendelezi mumunzi uuli kulumwensi lwamunzi. ⁹ Pele bapaizi bamalende tiibakabeleka kucipaililo ca Mwami Leza mu Jelusalemu, nikuba boobo bakali kulya zinkwa zitakwe mimena abapaizinyina.

¹⁰ Josiya wakasofwaazya malende aaku Tofeli mukkuti lya Benihinomu, kuti kutabi muntu walikukonzya kupaizya mwanaakwe mulombe naa musimbi mumulilo wa Moleki. ¹¹ Mpoonya wakagwisya amabbiza kuzwa kumanjililo aaŋanda ya Mwami Leza aayo bami bacisi ca Juda ngibakapede kuzuba. Mabbiza aaya akali mubbuwa lyakali munsi aakaanda ka Natanimeleki umwi wakali wabalupati-pati. Amane wakatenta nkalaki zyakapedwe kuzuba. ¹² Wakamwaya zipaililo zyakali aciluli munsi aaŋanda yamujulu ya Ahazi, eezyo Manase nzyaakayakide mumabbuwa obilo aaŋanda ya Mwami Leza. Zyoonse wakazigwisya akuzipwayaula waakuzisowela mukkuti lya Kidiloni. ¹³ Alimwi Josiya wakasofwaazya zipaililo zyamalende eezyo zyakali kujwe lya Jelusalemu, kumusanza wacilundu calunyonyooko, eezyo Solomoni mwami wacisi ca Isilayeli nzyaakayakila Asyitaloti leza mukaintu wa Basidoni cisesemyo, a Kemosyi leza wa Bamowabu cisesemyo, alimwi a Moleki leza wa Baamoni cisesemyo. ¹⁴ Josiya wakapwayaula mabwe aasalala amituni ya Asyela, eelyo mubusena bwawo wakazuzya zifuwa zyabantu.

¹⁵ Kuzwa aawo cipaililo cakumalende aaku Beteli, Jelobowamu mwanaa Nebati ncaakayaka walo, wakasolwedela Baisilayeli kuti babisye, cipaililo amalende aaco wakazimwaya. Wakatenta malende akwaaziya, kumane wakatenta mutuni wa Asyela. ¹⁶ Lino Josiya naakalanga-langa, wakabona zyuumbwe zyakali ooko kucilundu, mpawo wakatuma bantu kuti bagwisye zifuwa muzyuumbwe oomo, wazitenta aacipaililo kuti cisofwaale, mbubonya mbuli Mwami Leza mbwaakaambide kwiindila mumuntu wakwe musinsimi. ¹⁷ Mpoonya mwami wakabuzya kuti, “Ino ncuumbwe cani ciya ncebwene?” Mpawo bantu bamumunzi ooyo bakamwaambila kuti, “Ncuumbwe camuntu wa Leza wakazwa mucisi ca Juda wakazooamba ziyoocitika ku cipaililo caku Beteli eezyo nzyoocita.” ¹⁸ Eelyo wakati, “Amumuleke, mutagwisyi mafuwa aakwe pe.” Aboobo bakaleka mafuwa aayuulya musinsimi wakazide ku Samaliya. ¹⁹ Josiya wakamwaya akusofwaazya twaanda twamalende ooto bami ba Isilayeli ntubakayakide muminzi ya Samaliya akunyemya Mwami Leza mbubonya mbwaakacitide ku Beteli. ²⁰ Eelyo wakajaya bapaizi boonse bamalende azipaililo. Wakatenta mafuwa aabantu alinzizyo. Amane wakapilukila ku Jelusalemu.

Josiya mbwaakasekelela Pobwe lya Kwiindilila

²¹ Lino Josiya wakalailila bantu boonse kuti, “Amusekelele Pobwe lya Kwiindilila lya Mwami Leza wanu mbubonya mbuli mbokulembedwe mubbuku eeli lyacizuminano.” ²² Nkaambo Pobwe lya Kwiindilila tiilyakali kucitwa kuzwa ciindi babetesi nibakali kusololela Isilayeli, nikuba kuciindi cabami ba Isilayeli aba Juda. ²³ Pele mumwaka wakkumi alusele wakulela kwa Josiya, Pobwe lya Kwiindilila lyakasekelelwa ku Mwami Leza mu Jelusalemu.

²⁴ Kwiinda waawa Josiya wakatanda basondi abalozi antoomwe abakomba baleza bapange bamuŋanda, mituni azimwi zisesemyo zyakali kujanika mu Juda amu Jelusalemu. Wakacita oobo kuti azuzikizye majwi aamulawo aalembedwe mubbuku eelyo Hilikiya mupaizi ndyaakajana muŋanda ya Mwami Leza. ²⁵ Taakwe mwami wakamusaangunina naa wakali musule lyakwe wakali mbuli Josiya, wakapilukila ku Mwami Leza amoyo wakwe woonse, amuuya wakwe woonse, anguzu zyakwe zyoonse, kweendelana amulawo wa Mozesi woonse.

²⁶ Nikubaboobo Mwami Leza taakwe naakaleka kunyemena ba Juda, azeezyo zyakacita Manase. ²⁷ Nkaako Mwami Leza wakati, “Njoogwisya ba Juda kulindime mbwindakacita Baisilayeli, awalo Jelusalemu ngwindakalisalila njoomukaka aŋanda eeyi njindakati mulinjiyo mweyoobikka zina lyangu.”

Mamanino aakulela kwa Josiya

²⁸ Lino eezyo zyoonse Josiya nzyaakacita azimwi zililembedwe mubbuku lyamakani aabami ba Juda. ²⁹ Ciindi Josiya naakali mwami, Falo Neko mwami wa Ijipiti wakainka kuyoogwasya mwami waku Asiliya. Wakainda nzila yamulonga wa Yufuletisi. Mwami Josiya wakainka kuyoomulwana, eelyo Falo Neko wakajaya Josiya ku Megido. ³⁰ Nkabela balupati-pati bakwe bakabweza mutumba wakwe munkalaki kuzwa ku Megido bamuleta ku Jelusalemu akumuzikka mucuumbwe cakwe mwini. Eelyo bantu bacisi bakananika Jehowahazi mwanaa Josiya kuti abe mwami mubusena bwakwe.

Mwami Jehowahazi wa Juda

³¹ Jehowahazi wakali amyaka iili makumi obilo aitatu naakatalika kulela. Nkabela wakalela kwamyezi yotatwe mu Jelusalemu. Banyina bakali ba Hamutali mwanaa Jelemiya waku Libuna. ³² Awalo ooyu wakabisizya Mwami Leza mbubonya mbuli basikale bakwe mbubakacita. ³³ Mpawo Falo Neko wakamwaanga ku Libula munyika ya Hamati kutegwa atakaleli mu Jelusalemu pe, alimwi wakatezya ba Juda matalenta aansiliva aali mwaanda alimwi atalenta lyangolida. ³⁴ Mpawo Falo Neko wakabikka Eliyakimu mwanaa Josiya kuti abe mwami mubusena bwa Josiya wisi, akusandula zina lyakwe akumwiita kuti Jehoiyakimu. Pele Jehowahazi wakamutolelezya ku Ijipiti ooko nkwaakaakufwida.

Mwami Jehoiyakimu wa Juda

³⁵ Lino Jehoiyakimu wakali amyaka iili makumi obilo aisanu naakaba mwami, wakapa nsiliva angolida nzyaakayanda Falo Neko. Pele mukuti acite boobo wakatezya bantu bakwe ngolida ansiliva mbubonya mbuli mbwaakalailila Falo.

³⁶ Jehoiyakimu wakali amyaka iili makumi obilo aisanu naakatalika kulela. Nkabela wakalela mu Jelusalemu kwamyaka iili kkumi aumwi. Banyina bakali ba Zebida mwanaa Pedaiya wakumunzi waku Luma. ³⁷ Awalo ooyu wakabisizya Mwami Leza, mbubonya mbuli basikale bakwe mbubakacita.