2 Bami 22

Mwami Josiya wacisi ca Juda

¹ Josiya wakajisi myaka iili lusele ciindi naakatalika kulela, wakalela mu Jelusalemu kwamyaka iili makumi otatwe aumwi. Banyina bakali ba Jedida mwana wa Adaiya uuzwa ku Bozikati. ² Walo ooyu wakacita ziluleme ku Mwami Leza alimwi wakeenda munzila zyasikale wakwe Devedi, taakazisiya pe.

Bbuku lyamulawo mbulyakajanwa

³ Lino mumwaka wakkumi alusele wakulela kwakwe, Josiya wakatuma Syafani mwana wa Azaliya, mwanaa Mesyulamu, mulembi kuŋanda ya Mwami Leza wakati, ⁴ “Koya kuli Hilikiya mupaizi mupati, ukati ali ongaye mali aaletwa kuŋanda ya Mwami Leza aayo balindizi bamilyango ngibakatambula kuzwa kubantu, ⁵ apegwe kuli basikulanga basikubeleka kuŋanda ya Mwami Leza, balo bakape basimilimo aabo babambulula ŋanda eeyo. ⁶ Bali mbabezi, bayaki a basikubeza mabwe. Alimwi baleelede akuula mapulanga amabwe aabezedwe aakubambuluzya ŋanda ya Mwami Leza. ⁷ Pele tabeelede kupandulula mbubakabelesya mali aayo nkaambo balasyomeka.”

⁸ Lino Hilikiya mupaizi mupati wakati kuli Syafani mulembi, “Ndajana bbuku lyamulawo muŋanda ya Mwami Leza.” Nkabela Hilikiya wakapa bbuku eelyo kuli Syafani, wakalibala. ⁹ Mpawo Syafani mulembi wakaboola kumwami, waambila mwami makani aakuti, “Balupati-pati bako bagwisya mali aakali muŋanda ya Leza, akwaapa kubabelesi abalangi kuŋanda ya Mwami Leza.” ¹⁰ Eelyo Syafani mulembi wakaambila mwami kuti, “Hilikiya mupaizi wandipa bbuku.” Mpawo Syafani wakalibala mwami kamvwide.

¹¹ Lino mwami naakamvwa majwi aabbuku lyamulawo wakazapaula zisani zyakwe mukutyompwa. ¹² Mpawo mwami wakalailila Hilikiya mupaizi, Ahikamu mwanaa Syafani, Akibo mwanaa Mikaiya, Syafani mulembi a Asaiya mugwasyi wa mwami wakati, ¹³ “Kamuya mukandibuzizye mebo antoomwe abantu ba Juda boonse ku Mwami Leza, akaambo kazilembedwe mubbuku eeli lyakajanika, nkaambo bukali bwa Mwami Leza bwatusikila mbupati mukuti basikale besu tiibakatobela majwi aabbuku eeli pe, tiibakacita kweendelana azyoonse zilembedwe mulindilyo kwaamba zya ndiswe.”

¹⁴ Hilikiya mupaizi, Ahikamu, Akibo, Syafani, a Asaiya bakainka kuli Huluda musinsimi mukaintu, mukaintu wa Syalumu mwanaa Tikiva mwanaa Halihasi, wakali kulanga zyakusama. Mukaintu ooyo wakali kukkala mubusena bupya bwa Jelusalemu. Bakamwaambila zyakacitika. ¹⁵ Eelyo mukaintu ooyo wakati, “Mboobu mbwaamba Mwami Leza wa Isilayeli, amukamwaambile ooyo wamutuma kuti Mwami Leza ulati, ¹⁶ ‘Mboobu mbwaamba Mwami Leza. Bona ncobeni ndiyooleta mapenzi mubusena oobu abantu bali muli mbubo mbubonya mbuli bwaamba bbuku eelyo mwami wa Juda ndyaakabala.’ ¹⁷ Nkaambo bakandisiya akutentela baleza bambi tununkilizyo bandinyemya, amituni yoonse eeyi njibakalibambila nkaako bukali bwangu bwabukila busena oobu, nkabela tabutimane pe. ¹⁸ Amukaambile mwami wa Juda wamutuma kuzoobuzya Mwami Leza kuti, ‘Mboobu mbwaamba Mwami Leza wa Isilayeli, kwaamba zyamajwi aaya ngoomvwa.’ ¹⁹ Nkaambo kakuti wasungwaala akulibombya ku Mwami Leza, nomvwa mbundaamba akaambo kabusena oobu antoomwe abantu bali muli mbubo kuti buyooba tongo akusinganyizigwa alimwi mukuti wakazapaula zyakusama akulila kumbele lyangu, ambebo ndakumvwa, mbwaamba Mwami Leza. ²⁰ Nkaako yebo, uyoofwa akuzikkwa abasikale bako muluumuno, tokooyoobona mapenzi ngendiyooletela busena oobu pe.” Eelyo mwami bakazoomwaambila majwi aaya.