2 Bami 20

Mwami Hezekiya mbwaakaciswa akupona

¹ Lino ciindi eeco mwami Hezekiya wakaciswa calufu. Eelyo Izaya musinsimi, mwana wa Amozi, wakasika kulinguwe wati, “Mboobu mbwaamba Mwami Leza, ‘Bamba kabotu zyoonse nkaambo ulafwa, totipone pe.’”

² Mpoonya Hezekiya wakafutatuka walanzya kubwaanda, wakomba ku Mwami Leza wati, ³ “O Mwami Leza koibaluka lino mbuli mbundakakutobela cakusyomeka akulipa kulinduwe cakumaninina alimwi ambundakacita zikubotela.” Amane wakalila kapati.

⁴ Lino majwi aa Mwami Leza akasika kuli Izaya aakuti, ⁵ “Piluka alimwi, waambile Hezekiya musololi wabantu bangu kuti ‘Mboobu mbwaamba Mwami Leza wa Devedi sikale wako’ ulati, ‘Ndamvwa kukomba kwako alimwi ndabona misozi yabuumba bwako, lino ndilakuponya. Aboobo mubuzuba bwatatu kuzwa sunu uyoonjila muŋanda ya Mwami Leza. ⁶ Ndilayungizizya buumi bwako myaka iili kkumi aisanu. Ndilakuvuna yebo amunzi ooyu kuzwa kumwami waku Asiliya, ndiluukwabilila munzi ooyu akaambo kangu akamubelesi wangu Devedi.’”

⁷ Mpoonya Izaya wakati, “Amubambe cibunge cankuyu.” Bakacita oobo akucibikka aacuute, eelyo wakapona.

⁸ Hezekiya wakabuzizye Izaya kuti, “Ino kuyooba citondezyo nzi cakuti ndiyooinka kuŋanda ya Mwami Leza mubuzuba bwatatu?”

⁹ Eelyo Izaya wakati, “Nceeci citondezyo cakuti Mwami Leza uyoocita mbwaasyomezya. Sena cimvule cilaya kumbele ntaamo zili kkumi naa cilaya munsi ntaamo zili kkumi?” ¹⁰ Hezekiya wakaingula kuti, “Ncuubauba kuti cimvule ciye kumbele ntaamo zili kkumi, tubone acipiluke musule ntaamo zili kkumi.” ¹¹ Mpawo Izaya musinsimi wakalilila Mwami Leza, nkabela wakapilusya cimvule ntaamo zili kkumi nzicakaindide kale kweendelana acipimyo ca Ahazi.

Batumwa bakazwa ku Babuloni

¹² Ciindi eeco Melodakibaladani mwanaa Baladani mwami waku Babuloni wakatuma batumwa amagwalo, acipo kuli Hezekiya nkaambo wakamvwa kuti Hezekiya wakali kuciswa cakufwa. ¹³ Nkabela Hezekiya wakatambula batumwa aabo cakukondwa, akubatondezya ziyobwedo zyansiliva, ngolida, tununkilizyo amafuta aakeengwa kabotu, aciyobwedo cazilwanyo azimwi zyoonse zyakali muziyobwedo. Taakwe nociba comwe camuŋanda yabwami naa bulelo Hezekiya ncaatakabatondezya pe. ¹⁴ Mpoonya Izaya musinsimi wakasika kumwami Hezekiya akubuzya kuti, “Ino bantu aaba baamba nzi, alimwi bazwida kuli?”

Lino Hezekiya wakaingula kuti, “Bazwa ku Babuloni.”

¹⁵ Walo wakabuzya kuti, “Ino ncinzi ncibabona muŋanda yako?”

Hezekiya wakati, “Bazibona zintu zyoonse zili muŋanda yangu, taakwe cintu neciba comwe ncindatabatondezya muziyobwedo.”

¹⁶ Mpawo Izaya wakaambila Hezekiya kuti, “Swiilila, mboobu mbwaamba Mwami Leza ulati, ¹⁷ ‘Bona, mazuba ayoosika, zintu zyoonse basikale bako nzibakayobwede kusikila sunu niziyootolwa ku Babuloni. Taakwe ciyoosyaala mbwaamba Mwami Leza. ¹⁸ Nkabela bamwi balunyungu lwako abamukowa wako bayootolwa, bayooba bazike muŋanda yamwami waku Babuloni.’” ¹⁹ Mpoonya Hezekiya wakaambila Izaya kuti, “Majwi aa Mwami Leza aayo ngooamba mabotu.” Mukwaamba boobo Hezekiya wakali kuyeeya kuti, “Kunooli luumuno alukwabililo mubuumi bwakwe.”

Mamanino aakulela kwa Hezekiya

²⁰ Lino eezyo Hezekiya nzyaakacita amilimo yakwe yoonse, ambwaakasya ciziba kankolola kakuleta maanzi kumunzi, zililembedwe mubbuku lyamakani aabami ba Juda. ²¹ Hezekiya wakafwa akuzikkwa abasikale bakwe, eelyo Manase mwanaakwe nguwakaba mwami mubusena bwakwe.