2 Bami 2

Elija mbwaakatolwa kujulu

¹ Lino Mwami Leza naakali aafwiifwi kutola Elija kujulu mukambizi, Elija a Elisya bakali kuya bweenda ku Giligali. ² Mpawo Elija wakaambila Elisya kuti, “Kosyaala aano, nkaambo Mwami Leza wandituma ku Beteli.”

Pele Elisya wakati, “Mbubuli Mwami Leza mbwali muumi, ayebo mboli muumi, nsikookusiya pe.” Mpawo bakainka ku Beteli antoomwe.

³ Lino nkamu yabasinsimi aabo bakali mu Beteli yakaboola kuli Elisya akumwaambila kuti, “Sena ulizi kuti Mwami Leza sunu ulamutola simalelo wako?” Wakaingula kuti, “Iiyi ndilizi oobo, pele atwaaumune buyo.”

⁴ Mpawo Elija wakamwaambila kuti, “Elisya, syaala aano, nkaambo Mwami Leza wandituma ku Jeliko.” Pele walo wakati, “Mbubuli Mwami Leza mbwali muumi, ayebo mboli muumi nsikookusiya pe.” Eelyo bakainka ku Jeliko. ⁵ Akwalo ooko nkamu yabasinsimi aabo bakali ku Jeliko yakaboola kuli Elisya akumwaambila kuti, “Sena ulizi kuti Mwami Leza sunu ulamutola simalelo wako?” Wakaingula kuti, “Iiyi ndilizi oobo, pele atwaaumune buyo.”

⁶ Mpoonya Elija wakaambila Elisya kuti, “Syaala aano, nkaambo Mwami Leza wandituma ku Jolodani.” Pele walo wakati, “Mbubonya mbuli Mwami Leza mbwali muumi ayebo mboli muumi, nsikookusiya pe.” Eelyo boonse bobilo bakainka. ⁷ Lino kwakainka nkamu yabasinsimi bali makumi osanwe, bakaima kulaale kabalangide kwakaimvwi Elija a Elisya ku Jolodani. ⁸ Mpawo Elija wakabweza jansi lyakwe, walivunga wauma maanzi andilyo, mpoonya maanzi akaandaana, aawo boonse bobilo bakazubuka anyika njumu. ⁹ Nibakazubuka, Elija wakaambila Elisya kuti, “Kumbila ncoyanda kuti nkucitile nentanatolwa kuzwa kulinduwe.” Elisya wakati, “Ndikumbila kuti nditambule kobilo caabilo camuuya wako ngopedwe.”

¹⁰ Eelyo Elija wakati, “Wakumbila cintu ciyumu, nikuba boobo kuti naa undibone nentitolwe kuzwa kulinduwe cilaba mbubonya mbookumbila, pele kuti naa utandiboni, totitambule pe.”

¹¹ Lino kabaciya bweenda akukanana kwakaboneka nkalaki yamulilo amabbiza aamulilo, yakabaandaanya. Mpawo Elija wakatanta mukambizi kuya kujulu. ¹² Elisya naakabona wakapozomoka kati, “Taata, Taata! nkalaki zya Isilayeli abasimabbiza bazyo!” Taakwe naakamubona limbi Elija pe.

Mpoonya wakajata zisani zyakwe wazizapula muzipaanzi zyobilo. ¹³ Amane wakabweza jansi lya Elija lyakaloka, eelyo wakapiluka waakwiima kunkomwe yamulonga wa Jolodani. ¹⁴ Ajansi lya Elija eelyo lyakaloka wakauma maanzi aamulonga wati, “Ino O Mwami Leza wa Elija uli kuli?” Mpawo naakaauma maanzi akaandaana wazubuka.

¹⁵ Lino nkamu yabasinsimi bazwa ku Jeliko yakali kulangilide yakati, “Nguzu zya Elija zyaya kuli Elisya.” Eelyo bakaboola kuzoomucinga bakotama kumbele lyakwe cakumulemeka. ¹⁶ Nkabela bakamwaambila kuti, “Bona lino kuno swebo tobabelesi bako toonse notuli makumi osanwe tulilimvwide, nkaako tukumbila kuti tukayandaule simalelo wako, nkaambo ambweni inga Muuya wa Leza wamubweza akuyoomusowela mucilundu cimwi nimuba mukkuti.” Walo wakaingula kuti, “Mutainki pe.”

¹⁷ Pele bakamusungilizya cakuti wakafwa nsoni, eelyo wakati, “Mbubo kamuya.” Mpawo bakainka boonse bali makumi osanwe, nkabela bakamuyandaula kwamazuba otatwe pele taakwe nibakamujana pe. ¹⁸ Eelyo bakaboola kuli Elisya ku Jeliko nkwaakabede, wakababuzya kuti, “Sena taakwe nindakamwaambila kuti mutainki?”

Maleele aa Elisya

¹⁹ Lino bantu bamwi bamumunzi bakaambila Elisya kuti, “Bona, simalelo wesu munzi ooyu uyakidwe aabotu mbuli mbobwene, pele maanzi mmabi ayalo nyika tiikuzyi micelo pe.”

²⁰ Mpawo wakati, “Amundeetele mutiba mupya, mubikke munyo mulinguwo.” Aboobo bakuuleta kulinguwe. ²¹ Mpoonya wakainka kukasensa kamaanzi akuwaala munyo mulinkako kaamba kuti, “Mboobu mbwaamba Mwami Leza, ndasalazya maanzi aaya, aboobo taaciyoojayi naa kutazyazya limbi nyika. ²² Mpoonya maanzi akabota abwakoosunu kweendelana abwakaamba Elisya.”

²³ Elisya naakazwa ooko wakainka ku Beteli, nkabela kaya bweenda bamwi bakubusi bakazwa mumunzi, bazoomuwelela, bati, “Koya syaalubala! Koya syaalubala!”

²⁴ Mpawo wakacenguluka, naakababona, wakabasinganya muzina lya Mwami Leza. Mpoonya kwakazwa banyama babutambo bobilo musokwe, bakakwamauna bakubusi bali makumi one ababili.

²⁵ Kuzwa kooko wakaya kucilundu ca Kaameli, azwe kooko wakapiluka ku Samaliya.