2 Bami 16

Mwami Ahazi wacisi ca Juda

¹ Mumwaka wakkumi aciloba wakulela kwa Peka mwanaa Lemaliya, Ahazi mwanaa Jotamu mwami wa Juda wakatalika kulela. ² Ahazi wakali aamyaka iili makumi obilo naakatalika kulela, nkabela wakalela mu Jelusalemu kwamyaka iili kkumi acisambomwe. Pele taakacita ziluleme ku Mwami Leza, mbuli Devedi sikale wakwe. ³ Wakatobela nzila zyabami ba Isilayeli, wakapa mwanaakwe mulombe kuti cibe cipaizyo cakutenta mbubuli zisesemyo zyamisyobo eeyo Mwami Leza njaakatandila Baisilayeli. ⁴ Wakapaizya akutenta tununkilizyo mumalende, mutulundu, amunsi aamasamu.

⁵ Lino Lezini mwami waku Alamu a Peka mwanaa Lemaliya mwami waku Isilayeli bakasika kuzoolwana munzi wa Jelusalemu, bazoosinkilizya Ahaziya, pele bakakacilwa kumuzunda. ⁶ Ciindi eeco nciconya Lezini mwami waku Alamu wakaboozya munzi wa Elati, naakatanda bantu baku Juda. Baedomu mbabakazookkala ku Elati, nkobacibede asunu. ⁷ Aboobo Ahazi wakatumya kuli Tigilatipilesa mwami waku Asiliya kuti, “Boola kuno, uzoondivune, ndemubelesi wako, kuzwa kumwami waku Alamu awaku Isilayeli bandilwana.” ⁸ Alimwi Ahazi wakabweza nsiliva angolida zyakali muŋanda ya Mwami Leza amuziyobwedo zyamuŋanda yabwami, wakazitumya mbuli cipego kumwami waku Asiliya. ⁹ Mpawo mwami waku Asiliya wakazuminina Ahazi, waakulwana munzi wa Damasikasi, akuutola, eelyo wakatola bantu bawo ku Kii akujaya Lezini.

¹⁰ Lino mwami Ahazi naakainka ku Damasikasi kuyooswaangana a Tigilatipilesa mwami waku Asiliya, wakaakubona cipaililo cakali mu Damasikasi. Mpawo mwami Ahazi wakatumizya Uliya mupaizi buyake bwacipaililo eeco. ¹¹ Eelyo Uliya mupaizi wakayaka cipaililo, mbubonya mbuli mbwaakamutumina mwami Ahazi kuzwa ku Damasikasi. Wakacimana katanapiluka kuzwa ku Damasikasi. ¹² Ciindi mwami naakaboola kuzwa ku Damasikasi akubona cipaililo eeco wakatanta kuya kuli ncico. ¹³ Wakapa zipaizyo zyakutenta azyamaila, zyazyakunywa akusansaila bulowa bwacituuzyo calumvwano ali ncico. ¹⁴ Nkaako mwami Ahazi wakagwisya cipaililo camukuba ca Mwami Leza, kuzwa akati kacipaililo cakwe eeco aŋanda ya Mwami Leza, wakaciswenya kubbazu lyakunyika lyacipaililo cakwe. ¹⁵ Mwami Ahazi wakalailila Uziya kuti, “Acipaililo cipya eeci cipati kopa cipaizyo cakutenta cifumo-fumo, alimwi acamaila kumangolezya alimwi akupa cipaizyo cakutenta acamaila camwami lwakwe kubikkilizya acipaizyo cakutenta cabantu boonse bamunyika, antoomwe acipaizyo cabo camaila acacakunywa. Kosansaila bulowa boonse bwazipaizyo zyakutenta azituuzyo. Pele cipaililo camukuba ncenoosondya.” ¹⁶ Aboobo Uliya mupaizi wakacita mbubonya mbwaakalailila mwami Ahazi.

¹⁷ Nkabela mwami Ahazi wakakosoola myeendo akugwisya mutiba wakali aciimino alimwi wakagwisya cibumbe caziba cakali abasune bamukuba bakacikwabililide akucibikka antalisyo yamabwe. ¹⁸ Eelyo mukuyanda kubotezya mwami wa Asiliya, Ahazi wakagwisya nzila iivumbidwe ya Sabata njaakayakide muŋanda ya Leza, alimwi wakajala mulyango wakali kunjila mwami muŋanda ya Mwami Leza. ¹⁹ Lino eezyo zyoonse Ahazi nzyaakacita azimwi, zililembedwe mubbuku lyamakani aabami ba Juda. ²⁰ Aboobo Ahazi wakafwa akuzikkwa abasikale bakwe mumunzi wa Devedi, nkabela Hezekiya wakalela mubusena bwakwe.