2 Bami 15

Mwami Azaliya wacisi ca Juda

¹ Mumwaka wamakumi obilo aciloba wakulela kwa Jelobowamu mwami wacisi ca Isilayeli, Azaliya mwana wa Amaziya mwami wacisi ca Juda wakatalika kulela. ² Wakali aamyaka iili kkumi acisambomwe naakaba mwami, nkabela wakalela mu Jelusalemu kwamyaka iili makumi osanwe aibili. Banyina bakali ba Jekoliya bamu Jelusalemu. ³ Ooyu wakali kucita ziluleme ku Mwami Leza, mbuli Amaziya wisi. ⁴ Nikuba boobo malende taakaamwaya, aboobo bantu bakacili kupaizya akutenta tununkilizyo ooko. ⁵ Lino Mwami Leza wakasubula Azaliya, wakaba sicinsenda mane do kusikila kulufu lwakwe. Wakali kukkala muŋanda yakwe alikke. Eelyo Jotamu mwanaa mwami nguwakali kulanga zyaŋanda yabwami, akweendelezya bantu bamucisi. ⁶ Lino eezyo zyoonse Azaliya nzyaakacita azimwi zililembedwe mubbuku lyamakani aabami ba Juda. ⁷ Azaliya wakafwa akuzikkwa abasikale bakwe mumunzi wa Devedi. Mpawo Jotamu mwanaakwe nguwakaba mwami mubusena bwakwe.

Mwami Zekaliya wacisi ca Isilayeli

⁸ Mumwaka wamakumi otatwe alusele wakulela kwa Azaliya mwami wacisi ca Juda, Zekaliya mwanaa Jelobowamu wakaba ngomwami wa Baisilayeli mu Samaliya kwamyezi iili cisambomwe buyo. ⁹ Awalo wakabisizya Mwami Leza mbubonya mbuli basikale bakwe. Taakwe naakasiya zibi zya Jelobowamu mwanaa Nebati, eezyo nzyaakasolweda Baisilayeli kuti babisye. ¹⁰ Lino Syalumu mwanaa Jabesyi wakabukila Zekaliya wamulwana akumujaya bantu kabalangilila, ucimana waba mwami mubusena bwakwe. ¹¹ Eezyo Zekaliya nzyaakacita zililembedwe mubbuku lyamakani aabami ba Isilayeli. ¹² Eeci cakaba mbubonya mbuli Leza mbwaakaambila Jehu kuti, “Lunyungu lwako lunoolela mu Isilayeli kwamazyalani one.”

Mwami Syalumu wacisi ca Isilayeli

¹³ Syalumu mwanaa Jabesyi wakatalika kulela mumwaka wamakumi otatwe afuka wabwami bwa Uziya mwami wacisi ca Juda, nkabela wakalela mu Samaliya kwamwezi omwe. ¹⁴ Mpoonya Menahemu mwanaa Gadi wakazwida ku Tiiza wakaza ku Samaliya, wazoolwana Syalumu mwanaa Jabesyi wamujaya, waba mwami mubusena bwakwe. ¹⁵ Eezyo Syalumu nzyaakacita ambwaakabukila mwami, zililembedwe mubbuku lyamakani aabami ba Isilayeli. ¹⁶ Ciindi eeco Menahemu wakalwana kuzwa ku Tiiza mane waakusika kumunzi wa Tapuwa. Wakasaala zyoonse zyakali mulinguwo atunzi twawo, nkaambo bakakaka kujalula milyango yamunzi. Wakaandula bamakaintu aabo bakaminsi.

Mwami Menahemu wacisi ca Isilayeli

¹⁷ Mumwaka wamakumi otatwe afuka wakulela kwa Azaliya mwami wacisi ca Juda, Menahemu mwanaa Gadi wakaba mwami wa Isilayeli. Wakalela mu Samaliya kwamyaka iili kkumi. ¹⁸ Awalo wakabisizya Mwami Leza. Mukulela kwakwe koonse taakwe naakasiya zibi zya Jelobowamu mwanaa Nebati eezyo nzyaakasolweda Baisilayeli kuti babisye. ¹⁹ Mpawo Tigilatipilesa mwami wacisi ca Asiliya wakayanda kusaala cisi ca Isilayeli, nkaako Menahemu wakamupa matalenta aansiliva aali cuulu kuti amugwasye mukuyumya-yumya bwami bwakwe. ²⁰ Mali aaya Menahemu wakaajana ku Baisilayeli. Bantu boonse bakali bavubi wakabalailila kuti babbadele masyekeli aansiliva aali makumi osanwe kutegwa apegwe kumwami waku Asiliya. Nkaako mwami ooyu taakasaala cisi eeci.

²¹ Lino eezyo zyoonse Menahemu nzyaakacita azimwi zililembedwe mubbuku lyamakani aabami ba Isilayeli. ²² Menahemu wakafwa akuzikkwa abasikale bakwe, Pekahiya mwanaakwe wakaba mwami mubusena bwakwe.

Pekahiya mwami wacisi ca Isilayeli

²³ Mumwaka wamakumi osanwe wakulela kwa Azaliya mwami wacisi ca Juda, Pekahiya mwanaa Menahemu, wakaba mwami wacisi ca Isilayeli mu Samaliya, nkabela wakalela kwamyaka yobilo. ²⁴ Awalo wakabisizya Mwami Leza taakwe naakasiya zibi zya Jelobowamu mwanaa Nebati eezyo nzyaakasolweda Baisilayeli kuti babisye. ²⁵ Mpawo Peka mwanaa Lameliya, umwi wabalupati-pati bakwe wakamubukila. Wakatola baalumi Bagiliyadi bali makumi osanwe baakujaya Pekahiya antoomwe a Agobu a Aliye muciyubilo camuŋanda yabwami ku Samaliya. Wakaba ngomwami mubusena bwakwe. ²⁶ Eezyo Pekahiya nzyaakacita azimwi zililembedwe mubbuku lyamakani aabami ba Isilayeli.

Mwami Peka wacisi ca Isilayeli

²⁷ Mumwaka wamakumi osanwe aibili yakulela kwa Azaliya wacisi ca Juda Peka mwanaa Lemaliya wakalela Isilayeli mu Samaliya. Nkabela wakalela kwamyaka iili makumi obilo. ²⁸ Awalo ooyu wakabisizya Mwami Leza, taakwe naakasiya zibi zya Jelobowamu mwanaa Nebati eezyo nzyaakasolweda Baisilayeli kuti babisye.

²⁹ Mubwami bwa Peka, mwami wacisi ca Isilayeli, Tigilatipilesa mwami waku Asiliya wakaboola akuzoosaala Ijoni, Abelabetimaaka, Janowa, Kedesyi, a Hazoo. Wakasaala zisi zya Giliyadi, Galilii, acisi coonse ca Nafutali, nkabela wakatola bantu ku Asiliya mubwaange. ³⁰ Mpoonya Hosyeya mwana wa Ela wakabukila Peka mwanaa Lemaliya, wakamulwana akumujaya, eelyo wakaba mwami mubusena bwakwe, mumwaka wamakumi obilo wakulela kwa Jotamu mwana wa Uziya. ³¹ Lino eezyo zyoonse Peka nzyaakacita azimwi, zililembedwe mubbuku lyamakani aabami ba Isilayeli.

Mwami Jotamu wacisi ca Juda

³² Mumwaka wabili wakulela kwa Peka mwanaa Lemaliya mwami wacisi ca Isilayeli, Jotamu mwana wa Uziya mwami wa Juda wakalela. ³³ Wakali aamyaka iili makumi obilo aisanu naakatalika kulela. Nkabela wakalela mu Jelusalemu kwamyaka iili kkumi acisambomwe. Banyina bakali Jelusya mwanaa Zadoki. ³⁴ Ooyu wakacita ziluleme ku Mwami Leza mbuli Uziya wisi. ³⁵ Nikuba boobo taakamwaya malende pe, bantu bakacili kupaizya akutenta tununkilizyo ooko. Jotamu wakayakulula mulyango wakutala waŋanda ya Mwami Leza. ³⁶ Lino eezyo zyoonse Jotamu nzyaakacita azimwi, zililembedwe mubbuku lyamakani aabami ba Juda. ³⁷ Mumazuba aayo Mwami Leza wakatalika kutuma Lezini mwami wacisi ca Alamu a Peka mwanaa Lemaliya kuzoolwana cisi ca Juda. ³⁸ Jotamu wakafwa akuzikkwa abasikale bakwe mumunzi wa Devedi, eelyo Ahazi wakalela mubusena bwakwe.