2 Bami 14

Mwami Amaziya wacisi ca Juda

¹ Mumwaka wabili wakulela kwa Jowasyi mwanaa Jowahazi wacisi ca Isilayeli, Amaziya mwanaa Jowasyi, mwami wacisi ca Juda wakatalika kulela. ² Wakali aamyaka iili makumi obilo aisanu naakaba mwami, nkabela wakalela kwamyaka iili makumi obilo afuka mu Jelusalemu. Banyina bakali ba Jehowadini bakali kuzwa ku Jelusalemu. ³ Amaziya wakacita ziluleme ku Mwami Leza nikutali mbuli Devedi sikale wakwe. Muli zyoonse wakacita mbubuli Jowasyi wisi. ⁴ Nikuba boobo zipaililo zyamalende taakwe naakazimwaya pe, bantu bakacili kupaizya akutenta tununkilizyo ali nzizyo.

⁵ Lino bwami bwakwe nibwakakkazikika, wakajaya balupati-pati aabo bakajaya wisi naakali mwami. ⁶ Pele taakwe naakabajaya bana babajayi aabo pe, mbubonya mbuli mbokulembedwe mubbuku lyamulawo wa Mozesi oomo Mwami Leza mwalailila kuti, “Bamawisi tabeelede kujaigwa akaambo kabana nikuba bana kujaigwa akaambo kamawisi pe. Umwi aumwi uleelede kufwida cinyonyoono cakwe mwini.”

⁷ Amaziya wakajaya basilumamba ba Baedomu bali zyuulu zili kkumi mukkuti lya munyo akutola munzi wa Sela walo ngwaakaulika kuti Jokiteeli, mbuuciitwa asunu.

⁸ Lino mwami Amaziya wakatuma bantu kuti atalike kulwana Jehowasyi mwanaa Jehowahazi mwanaa Jehu mwami wa Isilayeli wakati, “Uboole tubone mwaalumi.” ⁹ Pele Jehowasyi mwami wa Isilayeli wakaingula Amaziya mwami wacisi ca Juda wakati, “Kwakali ciyasa bavwimi ku Lebanoni, cakatumina mukamba waku Lebanoni cati, Ukwasye mwanaako kumwanaangu, kumane cilumbu-lumbu wakaboola akulyatauka ciyasa bavwimi.” ¹⁰ Ndizi kuti wakazunda Baedomu eeco cakupa ntunda. Kotangala mukuzunda kwako ooko wamana kokkede kuŋanda, ino nkaambo nzi noyandaula mapenzi aati kuwisye yebo abantu bacisi ca Juda.

¹¹ Pele Amaziya taakwe naakaswiilila pe. Nkaako Jehowasyi waku Isilayeli wakalwana mwami wacisi ca Juda bakalwana ku Betisyemesyi mucisi ca Juda. ¹² Eelyo cisi ca Juda cakazundwa a Baisilayeli, cakuti basilumamba bakatijila kumaanda aabo. ¹³ Jehowasyi mwami wa Isilayeli wakajata Amaziya mwami wacisi ca Juda mwana wa Ahaziya ku Betisyemesyi. Amane Jehowasyi wakaya ku Jelusalemu waakumwaya lukwakwa lwamunzi ooyo, kutalikila kumulyango wa Efulemu kuyoosika kumulyango wacooko. Busena oobo mbwaakamwaya bwakali kulampa ntaamo zili myaanda yobilo. ¹⁴ Amane wakatola ngolida, nsiliva azibelesyo zyamuŋanda ya Mwami Leza kubikkilizya azyakali muziyobwedo zyaŋanda yabwami, wakatolelezya abaange ku Samaliya.

¹⁵ Lino eezyo zyoonse Jowasyi nzyaakacita azimwi, amilimo yakwe kubikkilizya ambwaakalwana a Amaziya mwami wa Juda, zililembedwe mubbuku lyamakani aabami ba Isilayeli. ¹⁶ Aboobo Jehowasyi wakafwa akuzikkwa abasikale bakwe mu Samaliya, nkabela Jelobowamu mwanaakwe nguwakaba mwami mubusena bwakwe.

Lufu lwa mwami Amaziya waku Juda

¹⁷ Lino Amaziya mwanaa Jowasyi wacisi ca Juda, wakapona myaka iili kkumi aisanu, kuzwa lyakafwa Jowasyi mwanaa Jehowahazi mwami wacisi ca Isilayeli. ¹⁸ Lino eezyo zyoonse Amaziya nzyaakacita zililembedwe mubbuku lyamakani aabami ba Juda. ¹⁹ Amaziya bakamubukila mu Jelusalemu, nkaako wakatijila ku Lakisyi. Akwalo ooko bakamutobela baakumujaila nkuko. ²⁰ Mutumba wakwe wakaletwa amabbiza ku Jelusalemu munzi wa Devedi ooko nkwaakazoozikkilwa. ²¹ Mpoonya bantu boonse bacisi ca Juda bakasala Azaliya wakali aamyaka iili kkumi acisambomwe, wakaba ngomwami mubusena bwa Amaziya wisi. ²² Ooyu nguwakayakulula munzi wa Elati naakuutola alimwi musule aalufu lwa Amaziya.

Jelobowamu wacisi ca Isilayeli

²³ Mumwaka wakkumi aisanu wakulela kwa mwami Amaziya mwanaa Jowasyi mwami wacisi ca Juda, Jelobowamu mwanaa Jehowasyi mwami wacisi ca Isilayeli, wakaba ngomwami wa Isilayeli mu Samaliya, wakalela kwamyaka iili makumi one aumwi. ²⁴ Ooyu awalo wakabisizya Mwami Leza, taakwe naakasiya niciba comwe cazibi zya Jelobowamu mwanaa Nebati eezyo nzyaakasolweda Baisilayeli kuti babisye. ²⁵ Ooyu nguwakaboozya alimwi minyinza yakali ya Isilayeli kuzwa ku Lebanoni kuyoosika kulwizi lwa Alaba, mbubonya mbuli Mwami Leza wa Isilayeli mbwaakaambide kuli Jona mwanaa wa Amitayi mubelesi wakwe ooyo wakali musinsimi ku Gatihefa. ²⁶ Mwami Leza wakabona mapenzi mapati aa Baisilayeli boonse. Kwakanyina muzike naba muzyale wakali kukonzya kugwasya mweenzinyina. ²⁷ Mukuti Mwami Leza taakajisi muzeezo wakuti amwaye zina lya Isilayeli ansi aano, wakabavuna kwiindila muli Jelobowamu mwanaa Jehowasyi. ²⁸ Lino eezyo zyoonse Jelobowamu nzyaakacita azimwi amilimo yakwe yankondo kubikkilizya ambwaakaboozya minzi ya Damasikasi a Hamati yakali ya Isilayeli, zililembedwe mubbuku lyamakani aabami ba Isilayeli. ²⁹ Jelobowamu wakafwa akuzikkwa abasikale bakwe bami ba Isilayeli, Zekaliya mwanaakwe nguwakaba mwami mubusena bwakwe.