2 Bami 13

Mwami Jehowahazi wamu Isilayeli

¹ Mumwaka wamakumi obilo aitatu wakulela kwa Jowasyi mwana wa Ahaziya, mwami wacisi ca Juda, Jehowahazi mwanaa Jehu wakatalika kulela Isilayeli mu Samaliya, nkabela wakalela kwamyaka iili kkumi aciloba. ² Lino ooyu wakabisizya Mwami Leza mukutobela zibi zya Jelobowamu mwanaa Nebati eezyo nzyaakasolweda Baisilayeli mukubisya taakazisiya pe. ³ Nkaako Mwami Leza wakanyemena Baisilayeli, wakabaaba kwaciindi cilamfu kuli Hazayeli mwami waku Alamu akumwanaakwe Benihadadi. ⁴ Mpoonya Jehowahazi wakakomba ku Mwami Leza, eelyo Mwami Leza wakamuswiilila. Wakabona bwakadyaminidwe Baisilayeli. ⁵ Nkaako Mwami Leza wakabapa muvuni, aboobo bakaangununwa kuzwa kunguzu zyamwami waku Alamu. Eelyo Baisilayeli bakalikkalila mbubuli kaindi. ⁶ Pele tiibakasiya zibi Jelobowamu nzyaakasolweda Baisilayeli kuti babisye. Bakacili kuzicita alimwi tiibakamwaya misumpuululu ya Asyela leza mukaintu. ⁷ Kwakacinyina zyabasilumamba ba Jehowahazi, kwakali buyo basimabbiza bali makumi osanwe, ankalaki zili kkumi, abasilumamba beenda aamaulu bali zyuulu zili kkumi, nkaambo Baalamu bakabanyonyweede limwi akubasyobaula mbuli vu lyaacuumino.

⁸ Lino eezyo zyoonse Jehowahazi nzyaakacita, azimwi a milimo yakwe ya nguzu zililembedwe mubbuku lyamakani aabami ba Isilayeli. ⁹ Aboobo Jehowahazi wakafwa akuzikkwa abasikale bakwe mu Samaliya, nkabela Jowasyi mwanaakwe nguwakalela mubusena bwakwe.

Mwami Jehowasyi wacisi ca Isilayeli

¹⁰ Mumwaka wamakumi otatwe aciloba wakulela kwa Jowasyi mwami wacisi ca Juda, Jehowasyi, mwanaa Jehowahazi, wakatalika kulela Isilayeli mu Samaliya, wakalela kwamyaka iili kkumi acisambomwe. ¹¹ Awalo mbubonya wakabisizya Mwami Leza, taakwe naakasiya niciba comwe cazibi zya Jelobowamu mwanaa Nebati, eezyo nzyaakasolweda Baisilayeli kuti babisye wakacili kuzicita. ¹² Lino eezyo zyoonse Jehowasyi nzyaakacita azimwi amilimo yakwe kubikkilizya ambwaakalwana Amaziya mwami wa Juda zililembedwe mubbuku lyamakani aabami ba Isilayeli. ¹³ Aboobo Jehowasyi wakafwa akuzikkwa abasikale bakwe, mu Samaliya nkabela mwanaakwe Jelobowamu nguwakalela mubusena bwakwe.

Lufu lwa Elisya

¹⁴ Lino Elisya wakaciswa bulwazi oobo bwakamutola, Jehowasyi mwami wacisi ca Isilayeli wakainka kulinguwe kuyoomubona walila wati, “Taata, taata! Nkalaki zya Isilayeli abasimabbiza bazyo!” ¹⁵ Mpawo Elisya wakamwaambila kuti, “Bweza buta amivwi, aboobo wakabweza buta amivwi.” ¹⁶ Mpoonya Elisya wakaambila mwami wa Isilayeli kuti, “Bujate,” kabujisi, Elisya wakabikka maanza aakwe amaanza aamwami. ¹⁷ Mpawo wakamwaambila kuti, “Jalula mpulungwido yakujwe eelyo wakiijula.” Mpoonya Elisya wakati, “Fusa,” eelyo wakafusa. Mpawo Elisya wakati, “Muvwi wa Mwami Leza waluzundo muvwi wakazunda Baalamu! Elisya wakaindilizya akuti, ‘Uyoobanyoonyweeda limwi Baalamu ku Afeki.’” ¹⁸ Mpawo wakati, “Bweza aimwi mivwi” wakiibweza. Wakaambila mwami wacisi ca Isilayeli kuti, “Umanyika.” Eelyo wakayuumanya ziindi zyotatwe waleka. ¹⁹ Mpoonya muntu wa Leza wakamunyemena wati, “Weelede kuuma ziindi zyosanwe naa zili cisambomwe, ndendilyo noolikunga uyoozunda Baalamu akubanyonyweeda limwi, pele ono uyoobazunda buyo ziindi zyotatwe.”

²⁰ Elisya wakafwa akuzikkwa. Lino basilumamba ba Bamowabu bakali kusaala cisi ca Isilayeli mwaka amwaka. ²¹ Bumwi buzuba nibakali kuzikka muntu, bakabona mpi yabasilumamba, mpawo bakawaala mutumba ooyo mucuumbwe ca Elisya, mutumba uciyooguma buyo mafuwa aa Elisya, muntu wakabuka kuzwa kubafu waimikila.

Baisilayeli a Baalamu mbubakalwana

²² Lino mwami Hazayeli wacisi ca Alamu wakali kudyaminina Baisilayeli mukulela kwa Jehowahazi koonse. ²³ Pele Mwami Leza wakali aaluse ku Baisilayeli wakabafwida nkumbu akubeetelela akaambo kacizuminano ncaakapangana a Abulahamu, Izaka a Jakobo, kusikila sunu tabalekeli kuti banyonyoonwe nikuba kugwisya kulinguwe pe.

²⁴ Hazayeli mwami wacisi ca Alamu naakafwa, Benihadadi mwanaakwe nguwakalela mubusena bwakwe. ²⁵ Mpoonya Jehowasyi mwanaa Jehowahazi wakatola kuzwa kuli Benihadadi mwanaa Hazayeli minzi eeyo njaakatolede munkondo kuzwa kuli Jehowahazi wisi. Kwaziindi zyotatwe Jehowasyi wakazunda akutola minzi ya Isilayeli.