2 Bami 11

Mwami mukaintu Ataliya wacisi ca Juda

¹ Lino ciindi mwami mukaintu Ataliya banyina Ahaziya naakamvwa kuti mwanaakwe wajaigwa, wakalailila kuti bamukwasyi wabwami boonse bajaigwe. ² Pele Jehosyeba, mwana musimbi wamwami Jeholamu, mucizi wa Ahaziya wakabweza Jowasyi mwana wa Ahaziya, wamulobosya kuzwa kumukwasyi wabwami, wabaabo bakeelede kujaigwa, wakamusisa asikumulela kuzyuli lyaŋanda ya Leza kuti Ataliya atamuboni, nkaako taakwe naakajaigwa pe. ³ Wakakkala anguwe kwamyaka iili cisambomwe kamusiside muŋanda ya Leza ciindi Ataliya naakali kulela.

⁴ Pele mumwaka waciloba Jehoiyada wakatumina basilutwe babasilumamba bali mwaanda basikulinda mwami abalindizi baŋanda yabwami, wabanjizya muŋanda ya Mwami Leza. Wakapangana cizuminano ambabo akubakonkya kuŋanda ya Mwami Leza kuti bacite ceeco ncaakali kuyanda. Mpoonya wakabatondezya mwanaa mwami. ⁵ Eelyo wakabalailila kuti, “Mboobu mbomweelede kucita, akati kankamu zyanu zyotatwe zibeleka mubuzuba bwa Sabata, imwi ibelekele kuŋanda yamwami, ⁶ nkamu yabili kiili kumulyango wa Suu, yatatu kiili kusule aamulyango wabalindizi babalizyanya kulanga ŋanda ya Mwami Leza. ⁷ Lino kwaamba ndinywe nonkamu zyobilo nomutabeleki mubuzuba bwa Sabata mukalindile ŋanda ya Mwami Leza kukwabilila mwami. ⁸ Muleelede kuyookwabilila mwami Jowasyi kamumuzingulukide, umwi aumwi kajisi azilwanyo zyakwe mujanza, nkabela kufumbwa ooyo uuyooswena munsi-munsi mukamujaye. Kamuli munsi-munsi amwami kufumbwa nkwaaya.”

⁹ Basilutwe aabo bakacita mbuli Jehoiyada mupaizi mbwaakalailila, umwi aumwi wakaleta bantu bankamu yakwe aabo bakeelede abatakeelede kubeleka mu Sabata, eelyo bakaza kuli Jehoiyada mupaizi. ¹⁰ Mpawo mupaizi wakapa basilutwe masumo antobo zyakali zyamwami Devedi, zyakabikkidwe muŋanda ya Mwami Leza. ¹¹ Eelyo balindizi bakandandama umwi aumwi kajisi azilwanyo zyakwe, kuzwa kubbazu lyakumusanza kusikila kubbazu lyakunyika, kuzinguluka mwami, kumbali aacipaililo aŋanda ya Mwami Leza. ¹² Mpoonya Johoiyanda abana bakwe balombe bakagwisya mwanaa mwami anze bamubikka musini akumupa buku lyamilawo yabwami akumwaamba kuti ngo mwami, aboobo bakamunanika kabakamba kabati, “Aongole mwami!”

¹³ Ataliya naakamvwa kuyobeka kwabalindizi abantu, wakainka wakaakunjila muŋanda ya Mwami Leza mwakali bantu, ¹⁴ naakalanga wakabona mwami uliimvwi munsi aamusemu, mbubonya mbuli cilengwa. Basilutwe abasimyeembo bakaliimvwi kumbali aamwami. Bantu boonse bacisi bakali kusekelela akusiba myeembo. Mpawo Ataliya wakazapaula zyakusama zyakwe mukunyema, wapozomoka wati, “Mbuzangi! Mbuzangi!” ¹⁵ Mpoonya Jehoiyada mupaizi wakalailila basilutwe bankamu zyamyaanda kuti, “Amumukwelele kuli basilumamba, kufumbwa muntu uuti mutobele ajaigwe. Kwaamba zyanguwe mwami mukaintu ooyu mupaizi wakaambide kuti, atajailwi muŋanda ya Mwami Leza pe.” ¹⁶ Aboobo mbwaakasikila buyo kuŋanda yabwami kumanjililo aamulyango wa mabbiza, bakamujaya mpoonya aawo.

Jehoiyada mbwaakabukulusya bukombi bwini-bwini

¹⁷ Lino Jehoiyada mupaizi wakapanga cizuminano akati ka Mwami Leza amwami antoomwe abantu bakwe, kuti balaba ba Mwami Leza. Amane wakapanga cizuminano akati kamwami abantu bakwe. ¹⁸ Bantu boonse bamunyika eeyi bakainka kuŋanda ya Baali akuyooimwaya. Bakapwayaula zipaililo amituni yakwe alimwi bakajaya Matani mupaizi wa Baali mpoonya aawo kumbele lya zipaililo. Alimwi Jehoiyada mupaizi wakabikka balindizi kuŋanda ya Mwami Leza. ¹⁹ Basilutwe bamyaanda, abasikulinda mwami, abalindizi kuŋanda ya Mwami Leza abantu boonse bamunyika antoomwe bakaleta mwami kuzwa kuŋanda ya Mwami Leza, bamuleta kuŋanda yabwami. Bakanjila kumulyango wabalindizi. Aboobo wakakkala acuuno cabwami. ²⁰ Bantu bacisi boonse bakatangala, munzi woonse wakaliliibide nkaambo Ataliya wakajaigwa apanga kuŋanda yabwami.

²¹ Jowasyi wakali aamyaka iili ciloba naakaba mwami.