2 Bami 10

Balunyungu lwa Ahabu mbubakajaigwa

¹ Lino kwakali balunyungu lwa Ahabu bali makumi aali ciloba bakali kukkala mu Samaliya. Aboobo Jehu wakalemba magwalo akwaatumizya ku Samaliya, kuli balupati-pati bamunzi, akuli bakali kulela bana ba Ahabu wati, ² “Mwalutambula buyo lugwalo oolu, alimwi mbomujisi nkalaki amabbiza, lukwakwa lwamunzi azilwanyo, alimwi mbokuli kuti ndinywe mulela bana basimalelo wanu, ³ amusale mwanaa simalelo wanu uulimvwa kuti abe mwami mubusena bwawisi. Mwamana mukalwanine simalelo wanu.”

⁴ Pele bapati baku Samaliya bakayoowa kapati bakati, “Naa bami bobilo tiibakamuyumina, ino swebo inga twamukonzya buti?” ⁵ Nkabela mupati wabalindizi baŋanda yabwami, amweendelezi wamunzi antoomwe abalupati-pati abakali kulela lunyungu lwa Ahabu, bakatumina kuli Jehu bati, “Swebo tuli babelesi bako, alimwi tulacita kufumbwa ncotitwaambile, tatutibikke mwami pe, nkaako yebo ucite kufumbwa ncoyeeya kuti ncibotu.”

⁶ Lino aawo wakabalembela lugwalo lwabili wati, “Kuti naa kamuli kulubazu lwangu alimwi kuti naa kamulibambilide kundiswiilila amukosoole mitwe yabalunyungu lwasimalelo wanu, mwamana mukaboole kulindime kuno ku Jezuliili juunza mbuli eeno.” Lino balunyungu lwa mwami Ahabu bali makumi aali ciloba, bakali antoomwe abapati bamunzi bakali kubalela. ⁷ Ciindi lugwalo nilwakasika baalumi aaba bakajaya balunyungu aaba bakabajaya boonse bakali makumi aali ciloba. Bamane babikka mitwe yabo muzinzuma, baitumizya kuli Jehu ku Jezuliili.

⁸ Mutumwa naakasika akumwaambila kuti, “Baileta mitwe yabalunyungu lwa Ahabu,” walo wakaingula kuti, “Amukailundike muzilwi zyobilo kumanjililo aamunzi kusikila buce.” ⁹ Lino nibwakaca, Jehu wakazwida anze. Wakaambila bantu boonse kuti, “Nywebo tamujisi mulandu pe. Mebo lwangu ndime ndakabukila simalelo wangu akumujaya, pele ino nguni wajaya aaba boonse? ¹⁰ Amuzibe kuti taakwe majwi aa Mwami Leza ngaakaamba kujatikizya zya Ahabu aakawida ansi, Mwami Leza nguwacita eeco ncaakasyomezya kwiindila mumubelesi wakwe Elija.” ¹¹ Musule akooku Jehu wakajaya balunyungu lwa Ahabu boonse bakasyeede mu Jezuliili antoomwe abapati mbaakali kusyoma abeenzinyina abapaizi bakwe boonse.

Baluzubo lwa mwami Ahaziya mbubakajaigwa

¹² Mpoonya Jehu wakaya ku Samaliya. Naakacili munzila, ku Betiekedi Wabeembezi, ¹³ Jehu wakaswaangana abamwi baluzubo lwa Ahaziya mwami wacisi ca Juda, wakababuzya kuti, “Ndinywe bani?” Bakaingula kuti, “Tuli baluzubo lwa Ahaziya, twaboola kuzooswaya bana bamwami mukaintu Jezebeli abamukwasyi wa mwami.” ¹⁴ Mpawo wakaambila bantu bakwe kuti, “Amubajate.” Bakabajata, wabajaya kumulindi waku Betiekedi. Bantu bakajaigwa bakali makumi one ababili, aboobo taakwe naba omwe wakasyaala pe.

¹⁵ Lino naakazwa kooko wakaswaangana a Jehonadabu mwanaa Lekabu kaboola kuzoomucingauzya, wakamujuzya wati kulinguwe, “Sena uli kulubazu lwangu mbuli ndime kulinduwe?” Jehonadabu wakati, “Iiyi.” Mpoonya Jehu wakati, “Kuti naa mbombubo, ndipa janza lyako.” Aboobo wakamupa janza lyakwe. Mpawo Jehu wakamutansika munkalaki mwaakabede. ¹⁶ Eelyo wakati, “Atweende anduwe ubone busungu bwangu mbwendijisi mu Mwami Leza, wakatanta munkalaki mwaakabede. ¹⁷ Jehu naakaakusika ku Samaliya, wakajaya boonse aabo bakasyeede bamukwasyi wa Ahabu mu Samaliya, mane kusikila boonse naakabamaninizya kweendelana amajwi aa Mwami Leza ngaakaamba kwiindila muli Elija.”

Bakutaukila Baali mbubakajaigwa

¹⁸ Jehu wakabunganya bantu boonse, akubaambila kuti, “Ahabu wakakomba Baali aasyoonto buyo, pele mebo ndamukomba cakumaninina. ¹⁹ Lino mundiitile boonse basinsimi, bapaizi ba Baali aboonse bamukomba kuti baboole, nkaambo ndijisi cipaizyo cipati cakutuula kuli Baali, kufumbwa ooyo uutakabooli uyoojaigwa.” Pele Jehu wakabaunina mukuti anyonyoone boonse bakomba Baali. ²⁰ Eelyo Jehu wakalailila kuti, “Amuzoobungane mukulemeka Baali.” Bakacita oobo. ²¹ Nkabela Jehu wakatuma muzyooko zyoonse zya Isilayeli, nkaako bapaizi ba Baali bakasika, taakwe naba omwe muntu wakasyeede pe. Eelyo bakalundana muŋanda ya Baali, cakuti yakazula nku. ²² Mpoonya wakaambila ooyo wakali kulanga zyakusama wati, “Gwisya majansi aabapaizi waape kubapaizi ba Baali boonse.” Aboobo wakabapa. ²³ Mpawo Jehu wakanjila muŋanda ya Baali a Jehonadabu mwanaa Lekabu, wakaambila bapaizi ba Baali kuti, “Amulange-lange kuti kutajaniki naba omwe uukomba Mwami Leza akati kanu, pele balikke bakomba Baali. Mpoonya bakanjila mukati kuti bapaile akupa zipaizyo zyakutenta.”

²⁴ Lino Jehu wakasiide baalumi bali makumi aali lusele anze, akubacenjezya kuti, “Kufumbwa wanu uutilekele umwi wabaaba kuti atije nguutifwe mubusena bwayooyo.”

²⁵ Lino Jehu mbwaakamanina buyo kupaizya, wakalailila balindizi abalupati-pati kuti, “Amunjile mubajaye kutabi naba omwe wabo uutitije pe.” Eelyo bakabajaya amapanga nibakamana kubajaya, bakabasowela anze. Bamane bakanjila muŋanda ya Baali yamukati, ²⁶ bakagwisya musumpuululu wamutuni wakali muŋanda ya Baali buutenta. ²⁷ Bamane bakamwaya aŋanda ya Baali, biicita cimbuzi asunu mbocibede.

²⁸ Mbombubo oobu Jehu mbwaakamanya bukombi bwa Baali mu Isilayeli. ²⁹ Pele Jehu taakwe naakazileka nzila zyacibi zya Jelobowamu mwanaa Nebati, nzyaakacitya kuti Baisilayeli babisye nibakakomba boombe bangolida bakali ku Beteli aku Dani. ³⁰ Eelyo Mwami Leza wakaambila Jehu kuti, “Akaambo kakuti wandicitila kabotu mukunyonyoona mukwasyi wa Ahabu mbwindakali kukanza lunyungu lwako lunoolela mu Isilayeli kwamazyalani one. ³¹ Pele Jehu taakatobela milawo ya Mwami Leza wa Isilayeli amoyo woonse pe. Taakaleka nzila zya Jelobowamu zyakacitya kuti Baisilayeli babisye.”

Jehu mbwaakafwa

³² Mumazuba aayo Mwami Leza wakatalika kucesya Baisilayeli. Hazayeli wakazunda mucisi ca Isilayeli. ³³ Kuzwa kujwe lyamulonga wa Jolodani acisi coonse ca Giliyadi nkokuti Bagadi, Balubeni, a Bamanase, kutalikila ku Aloyeli kumumpata wa Anoni ngooyo waakwiinda ku Giliyadi mane kuyoosika ku Basyani. ³⁴ Lino eezyo zyoonse Jehu nzyaakacita, azimwi amilimo yakwe zililembedwe mubbuku lyamakani aabami ba Isilayeli. ³⁵ Jehu wakafwa akuzikkwa abasikale bakwe mu Samaliya. Mpawo Jehowahazi mwanaakwe nguwakalela mubusena bwakwe. ³⁶ Jehu wakali mwami wa Isilayeli mu Samaliya kwamyaka iili makumi obilo alusele.