2 Bakolinti 9
Zipego zyakugwasya Bakilisitonyina
1 Lino kumakani aamulumbo wakugwasya basyomi ku Judiya, taceelede kuti ndimulembele majwi manji pe. 2 Nkaambo ndizi kuti mulilibambilide kugwasya, aboobo ndilamulumbaizya kubantu baku Masedoniya. Ndilabaambila kuti bantu baku Akeya bakalilibambilide kale kuzwa mwakali kuti bagwasye, nkabela busungu bwanu bwayumya banji-banji. 3 Pele lino ndatuma bakwesu aaba kutegwa kulikankaizya kwesu kutabi kwabuyo, pele kuti mulibambilile ncobeni mbuli mbwindakaambide kale. 4 Kuti naa ndaboola abamwi bantu baku Masedoniya, bamana bajana kuti tamunalibambila, tulagunwa swebo alwanu nobeni kuti twamusyomede kapati. 5 Nkaako ndakayeeya kuti ndeelede kukumbila bakwesu kuti bandisaangunine kuza kulindinywe kuzoobamba mulumbo wanu ngomwakasyomezya. Ndendilyo mulumbo ooyo nuuti bambililwe limwi alimwi uzooba cipego cini-cini, citali capegwa cakusinikizigwa.
6 Amuyeeye eeci, ooyo uusyanga cakucesya ulatebula kuce, pele ooyo uusyanga cakuvuzya ulatebula kunji. 7 Umwi aumwi uleelede kupa mbuli mbwayanda mumoyo wakwe, kutabi cakunyonosya moyo nikuba cakusinikizigwa, nkaambo Leza uyanda yooyo uupa calumwemwe. 8 Leza ulakonzya kumupa zileleko cakuvuzizya limwi kuti lyoonse mukabe aazintu zyakuligwasya nobeni, azintu zinji zyakucita milimo yoonse mibotu. 9 Mbubonya mbuli mbokulembedwe kuti,
“Ulaminza koonse-koonse,
ulaabila bacete,
bululami bwakwe tabumani.”
10 Ooyo waabila mulimi mbuto azilyo, uyoomwaabila anywebo mbuto, alimwi uyoozivuzya akuyooyungizya kutebula kwabwaabi bwanu. 11 Muyoovubizigwa muzintu zyoonse kuti mube baabi, cakuti banji bayoolumba Leza nkaambo kazipego zyanu nzyotuyoobatolela. 12 Nkaambo mulimo wamulumbo ooyu tuukagwasyi buyo basyomi aabo muli nzyobabulide, pele ciyooccilila ncakuti banji bayoolumba Leza. 13 Mulimo ooyu ngoocibikka antangalala kuti mulasyomeka, nkaako uyoocitya kuti banji bakalumbaizye Leza nkaambo kakuswiilila kwanu kweendelana a Makani Mabotu aa Kilisito. Alimwi bayoolumbaizya Leza nkaambo kabwaabi bwakwaabana zipego ambabo abantu bamwi boonse. 14 Lino bayoomukombela cakumuyeeya kapati, nkaambo Leza wakamubeda aaluse kwiindilila. 15 Leza aalumbwe nkaambo kacipego cakwe citaambiki!