2 Bakolinti 8
Milumbo ya Bakilisito
1 Lino nobakwesu, tuyanda kuti muzibe makani aaluse lwa Leza ndwaakatondezya kumbungano zyaku Masedoniya. 2 Bantu bambungano eezyo bakasunkwa kapati amapenzi, nikuba boobo tiibakaleka kukondwa kwabo kupati. Bakali kupa amaanza obilo, nikuba kuti bakali bacete kapati. 3 Bakapa mbuli mbobakali kukonzya, kutali boobo buyo, alimwi ndakonzya kubaambilila kuti bakapa kwiindilila mbobakali kukonzya. 4 Bakatukumbila camoyo woonse kuti tubazumizye kuti abalo bagwasye bantu ba Leza baku Judiya. 5 Bakacita mbutwatakali kubayeeyela, nkaambo kusaanguna bakalipa ku Mwami alimwi bakalipa akulindiswe mbuli mukuyanda kwa Leza. 6 Ncenciceeco ncitwakalailila Taitasi kuti mbwali nguwakatalisya kale mulimo ooyu waluse, uleelede kuumanizizya limwi akati kanu. 7 Lino mbuli mbomwiinda muli zyoonse, mulusyomo, mukunongosola kwaamba, muluzibo, mubusungu amuluyando ndomutuyanda, nkaako amukainde kucita kabotu amumulimo ooyu waluse.
8 Ndamwaambila eeci kutaamba mbuli mulawo pe. Nemwaambila zyabusungu bwabamwi njanda buyo kuziba naa luyando lwanu ndwini-lwini. 9 Mulizi mbolubede luse lwa Mwami wesu Jesu Kilisito, kuti nikuba kuti wakali muvubi, wakaba mucete akaambo kanu, kuti bucete bwakwe bumuvubye nywebo.
10 Lino malailile aangu kumakani aaya ngaaya, ncintu cibotu kuti mumanizye eeco ncimwakatalika mwakali, kutali kucicita buyo, pele akuyandisisya. 11 Amulibambile kuti mumanizye mulimo ooyo. Kayi mwakali basungu, musungu bwanu amumanizizye limwi eeco ncomuceelede kumanizya. 12 Kuti naa muntu kalibambilide, Leza ulatambula cakutangala ncapa muntu ooyo, Leza takakatizyi kuti muntu ape ncatajisi pe.
13 Nsiindaamba kuti bamwi balemununwe, nywebo kamulemedwe pe. 14 Pele kumakani akweelana, ndaamba kuti mbuli mbomujisi kunji ciindi cino, amugwasye babulide kuti kumbele baakuba aazinji abalo bakamugwasye. Aboobo muleelana. 15 Mbuli mbokulembedwe kuti, “Ooyo wakatola kunji, tiicakavula, pele ooyo wakatola kuce buyo, taakwe ncaakabula.”
Zya Taitasi abeenzinyina
16 Pele aalumbwe Leza, ooyo wasungwaazya Taitasi mbubonya mbotumusungwaalila aswebo. 17 Nkaambo taakacita buyo nzitwakamulailila, mukuti wakalisungweede lwakwe mwini kuza kulindinywe. 18 Twamutuma a Taitasi mukwesu umwi uuzizilwe kapati mumbungano zyoonse akaambo kamulimo wakukambauka Makani Mabotu. 19 Kutali buyo boobo, pele mbungano zyakamusala kuti akandisindikile mukutola zipego zyaluse. Tulacita zyoonse eezi kuti tupe Mwami bulemu akutondezya moyo mubotu.
20 Tatuyandi kupa bantu ciindi cakutwaamba zibi mubweendelezi bwazipego zinji zili boobu pe. 21 Nkaambo tuyanda kucita ziluleme, kutali buyo ku Mwami kulikke, pele akubantu.
22 Antoomwe ambabo twatuma aumwi mukwesu, ngutwasunka kanji-kanji akujana kuti mmusungu muzintu zinjaanji. Nkaambo ulamusyoma kapati ulayandisisya kuboola ooko. 23 Kwaamba Taitasi mmweenzuma, alimwi tubelekela antoomwe. Pele bamwi bakwesu aabo batumwa ambungano, eelyo Kilisito ulalemekwa akaambo kabo. 24 Aboobo amubatondezye luyando lwanu, kuti mbungano zimwi zilubone. Bazibe kuti tatulubizizye notulikankaizya akaambo kanu.