2 Bakolinti 7
1 Lino nomuyandwa, mukuti tulijisi zisyomezyo eezi, atulisalazye lwesu tobeni kuzwa kuli zyoonse zisofwaazya mibili amyoyo. Alimwi mukulemeka Leza, tusole kukkala buumi bulondokede busalala.
Lutangalo lwa Paulu
2 Amutujulile myoyo yanu. Taakwe muntu ngotwakabisizya, naa kumunyonyoona, naa kumucenga. 3 Takuli kuti nindaamba boobu nsola kumujanina kaambo pe. Ndakamwaambila kale kuti muli bayandisi mumyoyo yesu, nikuba mulufu, nikuba mubuumi tuli aandinywe lyoonse. 4 Ndijisi lusyomo lupati mulindinywe, ndalisumpula kapati nkaambo kandinywe. Mumapenzi eesu oonse ndicili aacamba, alimwi nditangede kapati.
5 Nikuba ciindi ncitwakasika mu Masedoniya, tiitwakali kukonzya kulyookezya, pele twakali kupenzegwa munzila zinji-zinji. Anze twakali kulwanwa abasinkondoma, mukati twakaliyoowede. 6 Pele Leza uuyumya-yumya batyompedwe wakatuyumya-yumya lyakasika Taitasi. 7 Kutali buyo kukusika kwakwe, pele kapati amajwi aakwe aamba mbuli mbumwakamuyumya-yumya. Wakatwaambila kuti mundifwide nyota, alimwi muli uside amapenzi aangu, mulilibambilide kundigwasya. Ncenciceeco ncindatangala kapati.
8 Nikuba kuti lugwalo lwangu lwakamuusya nsoni tacindipenzyi kuti ndakalulemba. Ndakali uside nindakamvwa kuti lugwalo oolo lwakamuusya nsoni kwakaindi kaniini buyo. 9 Lino ndakondwa, kutali kaambo kakuti mwakausigwa nsoni pe, pele nkaambo kakuti nsoni zyanu zyakamuletela kweempa. Nsoni zyanu zyakali kutambulika a Leza, aboono tiitwakamubisizya aasyoonto pe. 10 Nkaambo nsoni zitambulika a Leza zilaleta kweempa kucita kuti muntu afutulwe. Muntu ooyo tacimvwi limbi nsoni. 11 Amubone nsoni zyanu zitambulika a Leza ncizyamucitila. Zyamuletela busungu, bunkutwe bwakulisalazya lwanu, kunyema nkaambo kacinyonyoono, kuyoowa, kusukamina kuti mundibone alimwi akuyandisisya kusubula sizinyonyoono. Muli zyoonse mwalitondezya kuti tamujisi kampenda kumakani aaya pe.
12 Aboobo nikuba kuti ndakamulembela lugwalo oolo, nsiindakalemba nkaambo kayooyo wakabisya buyo, naa nkaambo kayooyo wakabisigilwa, pele ndakamulembela kuti busungu bwanu kulindiswe Leza abubone. 13 Nkaako swebo twayumizigwa kapati.
Kutali buyo boobo, pele twakakondwa kapati alimwi, nkaambo kakubotelwa kwa Taitasi, mukuti nywebo nyoonse mwakamukkomanina. 14 Ndakamwaambila kuti ndalisumpula nkaambo kandinywe. Nsiindakausigwa nsoni pe. Mbubonya mbuli mbozyakali zyamasimpe nzindakamwaambila, mbubonya oobo kwaboneka kuti nzindakaambila Taitasi zyakulisumpula akaambo kandinywe zyakali zyakasimpe azyalo. 15 Nkabela moyo wakwe uli kulindinywe ciindi nayeeya mbumwakaswiilila majwi aangu nyoonse, ambuli mbumwakamutambula cakumulemeka akulibombya. 16 Ndakondwa, nkaambo ndijisi lusyomo lumaninide mulindinywe.