2 Bakolinti 6

¹ Lino mbuli mbotuli basimilimonyina a Leza, tulamukumbila kuti zileleko zyaluse lwa Leza mutazitambuli cabuyo pe. ² Nkaambo walo wakati,

“Muciindi ceelede ndakamuswiilila,

ndakamugwasya mubuzuba bwakufutula.”

Amuswiilile cino nceciindi ceelede, sunu mbobuzuba bwalufutuko.

³ Swebo tatuyandi kuti bantu basampaule ncotucita, akujana kampenda mumulimo wesu. ⁴ Pele muli zyoonse tulalitondezya kuti tuli babelesi ba Leza, mulukakatilo lupati, mumapenzi, mumakatazyo, mubuyumu-yumu, ⁵ mukuumwa, mukwaangwa, mumapyopyongano, mumapakasyo, mukutoona kabotu, amunzala. ⁶ Alimwi tulalitondezya kuti tuli babelesi ba Leza mubusalali, muluzibo, mulukakatilo, muluzyalo, mu Muuya Uusalala, muluyando lwini-lwini, ⁷ mumajwi aabwini, amunguzu zya Leza. Tulabelesya zibelesyo zyabululami mumaanza oonse obilo lyalulyo niliba lyalumwensi. ⁸ Bantu balatulemeka akutusampaula. Batwaamba bubi abubotu. Batucita mbuli babeji, pele tatubeji pe. ⁹ Batucita mbuli batazizilwe nikuba kuti tulizizilwe kapati. Batubona mbuli bantu bayanda kufwa, nikuba boobo tulapona. Batubona mbuli bantu beelede kusubulwa, nikuba boobo tatujaigwi. ¹⁰ Batubona mbuli bantu bauside, nikuba boobo tulakondwa lyoonse. Batubona mbuli bantu bacete, nikuba boobo twavubya banji. Batubona mbuli bantu batajisi, nikuba boobo tulijisi zintu zyoonse.

¹¹ Nywebo no Bakolinti, tulaamba andinywe cakulikwaya, moyo wesu ulijulidwe. ¹² Takuli kuti swebo twakamusinkila, pele nywebo mwakasinkilwa amyoyo yanu iini. ¹³ Lino ndamwaambila mbuli bana, atucitilane mbubonya, anywebo amutujulile myoyo yanu.

Basyomi mbubateelede kuvwelaana abatasyomi

¹⁴ Mutavwelaani abakunze. Ino bululami inga bwaswaangana buti abubi? Naa mumuni ulavwelaana buti amudima? ¹⁵ Sena Kilisito a Saatani balakonzya kuzuminana? Naa musyomi ujisi lubazu nzi ayooyo uutasyomi? ¹⁶ Ncizuminano nzi ŋanda ya Leza nciijisi abaleza bapange? Nkaambo swebo tuli ŋanda ya Leza muumi, mbuli Leza mbwaamba kuti,

“Ndizooba mubantu bangu akukkala akati kabo,

nzooba Leza wabo, abalo bazooba bantu bangu.

¹⁷ Aboobo amuzwe muli bakunze, amube nyolikke,”

mbwaamba Mwami Leza.

“Mutagumi cintu citondwa, nenzoomutambula.

¹⁸ Nkabela nzooba Uso,

eelyo anywebo muzooba bana bangu balombe abasimbi,

mbwaamba Mwami Leza Singuzuzyoonse.”