2 Bakolinti 2

¹ Nkaambo kaako ndakayeeya kuti nsyeelede kuboola kuzoomuswaya akumukatazya alimwi pe. ² Nkaambo kuti naa ndamupenzya, ino nguni uunga ulakonzya kundikkomanisya? Mbabaabo mbabonya mbendipenzya. ³ Ndakamulembela mbuli mbwindakacita, kuti ndaakusika nditakausigwi nsoni abantu aabo beelede kundikkomanisya. Nkaambo ndasyoma kuti ciindi nenkondwa anywebo mulakondwa. ⁴ Ndakamulembela cakupenga kuciswa mumoyo kapati amisozi minji, kutali kumuusya nsoni, pele kuti muzibe luyando lupati ndwejisi mulindinywe.

Muntu wakabisya mbweelede kuboozegwa

⁵ Pele kuti naa umwi wakausya nsoni mweenzinyina, taakausya ndime nsoni pe, pele kutaamba cakubeja wakausya ndinywe nyoonse. ⁶ Kwazulila kuti bunji bwanu mwamusubula muntu uuli boobo. ⁷ Aboobo lino muleelede kulekelela muntu uuli boobo. ⁸ Lino ndamukumbila kuti mumuboozye kutondezya kuti mulamuyanda. ⁹ Nkankakaako ncindakamulembela, kuti ndimusunke ndizibe naa mulaaswiilila malailile aangu oonse. ¹⁰ Kufumbwa ngomulekelela, ambebo ndamulekelela mbubonya. Nkaambo kuti ndalekelela, naa kuli ngweelede kulekelela, Kilisito ulizi kuti ndacita oobo nkaambo kanu. ¹¹ Tulizi bucenjezu bwa Saatani alimwi tatuyandi kuti atucenjelele.

Paulu mbwaakakatazigwa mu Tilowasi

¹² Lino nindakasika ku Tilowasi akukambauka Makani Mabotu aa Kilisito ndakajboa kuti Mwami wandijalwida mulyango kuti ndibeleke. ¹³ Pele moyo wangu tuuwakakkede kabotu, nkaambo taakwe nindakamujana mukwesu Taitasi ooko pe. Aboobo ndakabalaya ndakainka ku Masedoniya.

Kilisito ulapa luzundo kubantu bakwe

¹⁴ Pele aalumbwe Leza, uutupa luzundo muli Kilisito. Mulindiswe Leza uzibya bantu boonse zya Kilisito, eelyo cizibyo eeco cilimwaikide koonse-koonse mbuli bweema. ¹⁵ Nkaambo tuli mbuli bweema bwatununkilizyo Kilisito ntwapa kuli Leza. Bweema oobo bulamvwigwa abaabo bayoofutulwa alimwi akuli baabo basweekede. ¹⁶ Kuli baabo basweekede bweema oobo mbwalufu alimwi buyoobajaya, pele kuli bamwi tuli bweema buponya buleta buumi. Ino nguni uukonzya mulimo ooyu? ¹⁷ Tatuli mbuli banji baulisya Majwi aa Leza. Pele mukuti tuli muli Kilisito, tulakambauka zyabwini. Twakatumwa a Leza kuti mukuyanda kwakwe tukaambe Mulumbe wa Kilisito.