2 Bakolinti 13

Kucenjezya akujuzya kwamamanino

¹ Lino ndwatatu ndweza kulindinywe. Malembe alati, “Makani oonse aali buti aleelede kusinizigwa abakamboni bobilo naa botatwe.” ² Ndakabacenjezya aabo bakabisya abamwi boonse, alimwi ndabacenjezya lino nentako, mbuli mbundakacita nindakamuswaide lwabili, kuti ciindi neyooboola alimwi nsikooyoobeengelela pe. ³ Eelyo ndendilyo nemuyoobona citondezyo ncomuyanda cakuti Kilisito nguukanana mulindime. Tali muteteete kuli zeezyo nzyacita kulindinywe, pele ulabonesya nguzu zyakwe mulindinywe. ⁴ Nkaambo walo wakakankaminwa mubuteteete, pele ulapona munguzu zya Leza. Tuli bateteete mulinguwe, pele tuyooba aabuumi anguwe munguzu zya Leza, twaakubeleka akati kanu.

⁵ Amulilingule lwanu nobeni, mubone kuti naa mulijisi lusyomo. Amulisunke lwanu nobeni. Sena tamuzi kuti Jesu Kilisito ulikkede mulindinywe? Kuti naa tamuli boobo nkokuti mwakacilwa! ⁶ Ndasyoma kuti mulakonzya kubona kuti tiitwakacilwa swebo pe. ⁷ Tulamukombela kuli Leza kuti mutabisyi. Kutaamba kuti tulibonye mbuli kuti twakainda, pele kuti nywebo mucite eeco ciluleme, nikuba kuti kamutulanga mbuli kuti swebo twakacilwa. ⁸ Nkaambo swebo tatukonzyi kucita cintu citeendelani azyabwini, tuleelede kucita zyabwini. ⁹ Tee kayi tulabotelwa ciindi ncotubula nguzu, nkabela nywebo inga muli bayumu. Ncotukombela lyoonse nkuti nywebo muzwidilile kabotu. ¹⁰ Ndamulembela eezi nketanasika ooko kuti ndaakusika, kutakabi cintu cindiletela bukali mukubelesya bulelo bwangu. Mwami wakandipa bulelo oobu kuti njumye mbungano, kutali kwiimwaya pe.

¹¹ Lino ndamana, nobakwesu, mbubo, kamusyaala kabotu. Amuswiilile malailile aangu, alimwi amululamike buumi bwanu. Amumvwane, amukkale muluumuno, nkabela Leza siluyando, siluumuno uyooba aandinywe.

¹² Amujuzyanye muluyando lwini-lwini.

Basyomi boonse balamujuzya.

¹³ Luse lwa Mwami Jesu Kilisito aluyando lwa Leza, aluswaanganyo lwa Muuya Uusalala zibe aandinywe nyoonse.