2 Bakolinti 10

Paulu mbwaakakwabilila butumwa bakwe

¹ Mebo lwangu nde Paulu ndamukumbila, ndime yooyo bamwi ngobati mubombe nali aandinywe, pele ulamutapatila natawo. Ndamukumbila akaambo kalubomba aluzyalo lwa Kilisito, ² kuti mutandiciti kuti nzoobe aacamba cakumutapatila ndazoosika kulindinywe. Nkaambo nsidonaiki kuti ndilaacamba cakuti ndilakonzya kutapatila baabo batuyeeyela kuti tulacita milimo mbuli bantunsi. ³ Iiyi, tuli bantu, pele tatulwani nkondo mbubucita bantunsi. ⁴ Zilwanyo zyesu tazili zyaansi pe, pele nzyanguzu zya Leza zyakunyonyoona ziyubilo ziyumu. ⁵ Tulamanya kukazyanya akulisumpula koonse kusola kulesya bantu kuti bazibe Leza. Tulcita mizeezo yoonse mukuti iswiilile Kilisito. ⁶ Nywebo mwaziba mbomweelede kuswiilila Kilisito, ndililibambilide kusubula kufumbwa ooyo uutaswiilili.

⁷ Amulange zimucitikila. Kuti naa kuli muntu uuyeeya kuti nguwa Kilisito, ooyo muntu aibaluke kuti mbuli mbwali muntu wa Kilisito walo, aswebo tuli bantu ba Kilisito. ⁸ Nikuba kuti ndaindilizya buniini kulikankaizya akaambo kabulelo bwesu mbotwakapegwa a Mwami kuti tumuyake kutaamba kuti tumumwaye, nsiusi nsoni pe. ⁹ Nsiyandi kuboneka kuti ndamukonga amagwalo aangu pe. ¹⁰ Ambweni inga umwi ulati, “Magwalo aakwe malemu, alijisi nguzu, pele alibonya mutete, alimwi kwaamba kwakwe nkuuba.” ¹¹ Pele muntu uuyeeya boobo azibe kuti ncotwaamba mumagwalo ciindi ncetutawo, ncencico ncotucita ciindi ncotuliwo.

¹² Tatuli mbuli baabo baliiminina alimwi tatusoli akulyeezyanya ambabo. Pele nobalyeeleka muli cabo beni akulyeezyanya balitondezya kuti mbafuba-fuba. ¹³ Swebo tatukooyoolikankaizya kwiinda mbotweelede, pele tuyoobamba cipimyo Leza ncaakatupa, anywebo muli mukati mwacipimyo eeco. ¹⁴ Aboobo tiitwakaindilizya nitwakasika kulindinywe. Kwaamba masimpe, ndiswe twakasaanguna kuza kulindinywe akumuletela Makani Mabotu aa Kilisito. ¹⁵ Tatulikankaizyi kwiinda mbokweelede mumilimo yabamwi bakali kubeleka akati kanu. Kapati tulangila kuti lusyomo lwanu lulakomena akuti mulimo wesu akati kanu uyookomena kapati, ¹⁶ kuzwa waawo tuyookonzya kukambauka Makani Mabotu mumasi aali kumbele lyanu, kakutakwe kulikankaizya mumilimo yakacitwa aumbi pe. ¹⁷ Mbuli Malembe mbwaati, “Ooyo uulikankaizya alikankaizizye zyakacita Mwami Leza.” ¹⁸ Nkaambo ooyo uulilumbaizya mwini teensi nguutambulika pe, pele uutambulika nguyooyo uulumbaizigwa a Mwami.