2 Bakolinti 1

¹ Ndime Paulu mutumwa wa Kilisito Jesu kwiindila mukuyanda kwa Leza, tuli a Timoti mukwesu.

Ndamujuzya nywebo nombungano ya Leza iili ku Kolinti, abasyomi boonse bali mucisi ca Akeya coonse.

² Leza Taata a Mwami Jesu Kilisito amubede aaluse aluumuno.

Paulu ulalumba Leza

³ Aalumbwe Leza Wisi wa Mwami wesu Jesu Kilisito, Taata siluzyalo, uutuumbulizya. ⁴ Ulatuumbulizya mumapenzi eesu oonse, kutegwa aswebo tukonzye kuumbulizya baabo bali mumapenzi naali buti oonse, mbubonya mbuli Leza mbwatuumbulizya. ⁵ Nkaambo mbubonya mbotumvwa macise a Kilisito, mbubonya oobo Kilisito mbwatuumbulizya kapati. ⁶ Kuti naa katupenga, nkuti nywebo muumbulizigwe eelyo kwamana mukafutulwe. Kuti katuumbulizigwa nkuti anywebo muumbulizigwe kwamana mutambule nguzu zyakuyuma ciindi ncomuli mumapenzi aali mbubonya mbuli ngotupenga aswebo. ⁷ Lusyomo lwesu mulindinywe taluzungaani pe. Tulizi kuti mbubonya mbomumvwa macise mbuli ndiswe mbubonya oobo muyooumbulizigwa mbotuumbulizigwa aswebo.

⁸ Nobakwesu, tuyanda kuti muzibe mapenzi ngitwakajana mu Asiya. Mukuli wamapenzi wakatulemena kapati kwiinda mbutwakali kukonzya, cakuti tiitwakazi kuti tucinoopona. ⁹ Twakasyomede kuti tulaafwiifwi kufwa. Eeco cakaba kuti tutalitembi lwesu tobeni, pele tusyome Leza uubusya bafu. ¹⁰ Wakatuvuna kuzwa muntenda zibyaabi zyalufu, alimwi ucinooyootuvuna. Twakabikka lusyomo lwesu loonse mulinguwe kuti uciyootuvuna kumbele. ¹¹ Anywebo muleelede kutugwasya akukomba kwanu. Ndendilyo banji nibayoolumbaizya Leza nkaambo kazeezyo nzyatucitila muluse lwakwe.

Zyalweendo lwa Paulu

¹² Lino cintu ncotukonzya kulisumpwida nceeci, cakuti moyo wesu ulazumina kakunyina akweezeezya kuti kuli koonse nkutwakainda, kapati akati kanu, Leza wakatupa buumi busalala butali bwabuzangi. Buumi oobo tiibwakali boobo nkaambo kamaanu aabantu, pele nkaambo kaluse lwa Leza. ¹³ Twamulembela zyalo nzyomukonzya kubala akumvwa. Ndasyoma kuti mulazimvwisya, ¹⁴ nikuba kuti mulizi aasyoonto lino. Ndasyoma kuti mubuzuba bwa Mwami Jesu muyoolisumpula akaambo kesu, aswebo akaambo kanu.

¹⁵ Nkaambo kakuti ndakasyoma boobu, ndakali kuyanda kuti ndisaangune kuboola kulindinywe kutegwa muzoolelekwe ziindi zyobilo. ¹⁶ Ndakali kuyanda kuti ndizoomuswaye ciindi cakuya ku Masedoniya, alimwi ndapiluka mundigwasye mulweendo lwangu lwakuya ku Judiya. ¹⁷ Nindakayeeya kucita boobo, sena muyeeya kuti ndakali kucita zyabuyo? Sena ndilakanza mbuli simalabali uuti “Iiyi” naa “Peepe” ciindi comwe? ¹⁸ Ndakonka muli Leza kuti majwi ngotumwaambila taali buyo “Iiyi” naa “Peepe.” ¹⁹ Jesu Kilisito Mwanaa Leza, ooyo swebo, Silivanusi a Timoti ngutwakamukambaukila taakali “Iiyi” naa “Pe” ciindi comwe, pele lyoonse wakali “Iiyi” kweendelana akuyanda kwa Leza. ²⁰ Nkaambo muli “Iiyi,” Leza ulacita zyoonse nzyaakasyomezya. Ncencico eeco muli Kilisito tulazuminana azeezi notuti “Akube boobo,” mukulemeka Leza. ²¹ Leza nguusinizya kuti swebo andinywe tuli bakwe Kilisito. Ngonguwe wakatutuma, ²² wabikka cizibyo cakwe aalindiswe akutupa Muuya Uusalala mumyoyo yesu kuti abe citondezyo cazeezyo ziciza.

²³ Leza ulizi kuti nsibeji. Ulizi kuti ncindakaboolela ku Kolinti nkuti nditamujazyi nsoni. ²⁴ Tatusoli kumulailila nzyomweelede kusyoma. Kwaamba zyalusyomo lwanu, mulisimide ncobeni. Ncotuyanda nkugwasyanya andinywe kuti mukondwe.