1 Timoti 2

Zyakukomba kwambungano

¹ Lino kusaanguna ndiyandisya kuti mukombele bantu boonse. Kukomba kwanu kube kwakulombela, kukumbilila, akulumbaizya Leza. ² Mukombele bami abaabo bali mubulelo kuti tukkale aabuumi bwaluumuno, bwabulemu, akulemeka Leza lyoonse. ³ Eezi nzibotu alimwi zilakkomanisya kuli Leza Mufutuli wesu, ⁴ walo uuyanda kuti bantu boonse bakafutulwe akuziba zyabwini. ⁵ Nkaambo kuli Leza omwe, alimwi kuli simwiimaakati ka Leza abantu omwe, muntu ooyo ngu Kilisito Jesu. ⁶ Wakalisanga mwini kuti anunune bantu boonse. Eeci cakali bumboni bwakuti ciindi ca Leza ceelede casika. ⁷ Ncenciceeco wakandibikka kuba mukambausi amutumwa. Ncobeni ngamba zyabwini, nsibeji pe. Njiisya bamasi zyalusyomo azyabwini. ⁸ Ndiyanda kuti baalumi kabakomba koonse-koonse amaanza aanyamwidwe amoyo uusalala kakutakwe kunyema nikuba kuzwangana. ⁹ Alimwi njanda kuti bakaintu kabasama bweelede, cabulemu akulibombya, kutaamba kuliluka masusu mukulibotya nikuba kugama kusama zisani zidula nituba tuwenge twangolida naa twangale. ¹⁰ Pele baleelede kulibotya amilimo mibotu mbubonya mbubeelede bakaintu Bakilisito. ¹¹ Bakaintu nobaiisigwa baleelede kulibatamika akuswiilisisya. ¹² Nsizumizyi mukaintu kwiisya nikuba kubalanga amutwe baalumi pe, pele kanga kaumwide buyo. ¹³ Kayi Adamu nguwakasaanguna kulengwa, munsi ngu Eva. ¹⁴ Alimwi tali Adamu wakacengwa, pele mukaintu nguwakacengwa alimwi nguwakasotoka malailile aa Leza. ¹⁵ Nikuba boobo mukaintu uyoofutulwa mukutobela bukkale bweelede kuzyala bana, kuti naa wajatisya mulusyomo cakulibombya muluyando amukusalala moyo.