1 Timoti 1

¹ Ndime Paulu, mutumwa wa Kilisito Jesu, nindakabikkwa akulailila kwa Leza Mufutuli wesu, a Kilisito uutupa lulangilo.

² Ndakujuzya Timoti mwanaangu mwini-mwini mulusyomo. Leza Taata a Kilisito Jesu Mwami wesu bakubede aaluse alweengelelo akukupa luumuno.

Acenjele abamayi babeji

³ Mbubonya mbuli mbwindakakulailila ciindi ncindakali kuya ku Masedoniya, ukkale mu Efesusi akulesya aabo baiisya bumbi. ⁴ Ubaambile kuti baleke kugamide twaano buyo akubanda mazina amazyalani aanyina masimpilo. ⁵ Muzeezo wangu mukukupa malalilile aaya ngwakuti kube luyando luzwa mumoyo uusalala, kuyeeya kululeme, alusyomo lwini-lwini. ⁶ Bantu bamwi bakazwa muli zeezi akulubila nibakaccilila nkazyanyo zyabuyo. ⁷ Balayandisya kuba baiyi bamilawo, pele tabazizi nzyobaamba niziba eezyo nzyobazumina pe.

⁸ Lino swebo tulizi kuti Mulawo mmubotu kuti naa muntu uubelesya bweelede. ⁹ Tweelede kuziba kuti milawo tiili yabaabo baluleme, pele njabaabo bataswiilili, basigama, bantu babi abatakombi Leza, batasalali, basofweede, bantu bajaya bamawisi abamanyina alimwi abamwi, ¹⁰ basibwaamu bacita zitaambiki abalombwananyina, abasikubba bantunyina, babeji, basikukonka cakubeja, abaabo bacita zintu zimwi zili boobo ziteendelani anjiisyo mbotu. ¹¹ Njiisyo eezi zilajanwa mu Makani Mabotu aabulemu aaamba zya Leza uulemekwa wakandipa ngawo kuti ngaiisye.

Ulalumba Leza nkaambo kaluzyalo lwakwe

¹² Ndamulumba Kilisito Jesu Mwami wesu wakandipa nguzu. Ndamulumba nkaambo wakandisyoma akundipa mulimo wakumubelekela, ¹³ nikuba kuti kale-kale ndakali kumusampaula, kumupenzya, akumutukila. Pele Leza wakandeengelela nkaambo ndakali kucita eezi cakutaziba nketanasyoma. ¹⁴ Mwami Leza wakandibeda aaluse lunji, eelyo wakandipa lusyomo aluyando nzyotujisi nkaambo tuli muli Kilisito Jesu. ¹⁵ Majwi aaelede kutambulwa akusyomwa ngaaya, “Kilisito Jesu wakaboola ansi aano kuzoofutula basizibi.” Muli baaba mebo ndime eeindide. ¹⁶ Pele wakandibeda aalubomba kuti mulindime sizibi kwiinda boonse, abonye lweengelelo lwakwe lupati. Wakayanda kuti mbe citondezyo kuli boonse bayoomusyoma mukuti bakajane buumi butamani. ¹⁷ Lino ku Mwami walyoonse, uutafwi, uutaboneki, uuli ngo Leza alikke, alemekwe akupegwa bulemu mane kukabe kutamani. Akube boobo.

¹⁸ Mwanaangu Timoti, ndakupa malailile aaya kweendelana amajwi abasinsimi ngobakakanana kwaamba zyanduwe. Majwi aaya abe zilwanyo nzyolwanya nkondo mbotu. ¹⁹ Ujatisye lusyomo alimwi ube amoyo uunyina kaambo. Bamwi tiibakaswiilila manjezeezya aabo naakabakazya, aboobo lusyomo lwabo lwakanyonyooka. ²⁰ Muli baaba kuli Haimeneyusi a Alekizandaa aabo mbindaaba kuli Saatani. Eeci ciyoobaiisya kuti batasampauli limbi Leza.