1 Samuyele 9
Saulu mbwaakaswaangana a Samuyele
1 Lino kwakali mwaalumi umwi wamusyobo wa Benjamini uuvubide wakali kwiitwa kuti Kisyi, mwana wa Abiyeli, mwanaa Zelo, mwanaa Bekolati, waciinga ca Afiya. 2 Wakalijisi mwana mulombe wakali kutegwa Saulu, wakali mubotu akweebeka. Kakutakwe naba omwe mu Baisilayeli wakali mubotu mbuli nguwe. Wakali mulamfu kwiinda bantu boonse.
3 Lino mbongolo zya Kisyi zyakalisweekede, eelyo Kisyi wakaambila mwanaakwe Saulu kuti, “Utole umwi wababelesi, mukayandaule mbongolo.” 4 Lino bakainka mane bakaakusika kunyika yatulundu-lundu ya Efulemu, kuyoosika ku Syalisya, pele taakwe nibakazibona, aboobo bakaindilila akuya kucisi ca Syalaimu, pele alimwi mbongolo tiizyakali kooko pe. Bamane bakaindilila alimwi akuya kucisi ca Benjamini, pele akwalo ooko tiizyakaliko. 5 Ciindi nibakaakusika kucisi ca Zufu, Saulu wakati kumubelesi wakwe, “Atupiluke buyo kumunzi, nkaambo antela bataata baleka akuyeeya mbongolo batalike kukatazigwa akaambo kesu.”
6 Pele mubelesi wakaamba kuti, “Swiilila! Kuli muntu wa Leza uulemekwa kapati, mumunzi ooyu, kufumbwa ncaaamba cilacitika ncobeni. Atweende kulinguwe, ambweni uyookonzya kutwaambila nkotunga tuyoozijana mbongolo.”
7 Mpawo Saulu wakabuzya kuti, “Kuti naa twaya kulinguwe ino tulamupa nzi? Taakwe acinkwa casyaala munkomo zyesu, taakwe cintu ncotukonzya kumutolela muntu wa Mwami Leza pe. Ino tujisi nzi?”
8 Mpawo mubelesi ooyo wakaingula kuti, “Ndijisi kadi kansiliva aako nkenjoopa muntu wa Leza, eelyo uyootwaambila nkotunga tuyoozijana mbongolo zyesu.”
9 Lino kale-kale mu Isilayeli kwakalikunga muntu nayanda kubuzya Leza, wakali kwaamba kuti, “Atweende, tukabone mulangi,” nkaambo kuciindi eeco musinsimi wakali kwiitwa kuti mulangi.
10 Saulu wakati, “Mbubo, Atweende.” Aboobo bakainka kumunzi, kwalo ooko muntu wa Leza nkwaakali kukkala. 11 Nibakacili kuya butanta kalundu kuya mumunzi, bakaswaanganya basimbi bakali kuya kukuteka maanzi. Bakabuzya basimbi aabo kuti, “Sena mulangi mwali mumunzi?”
12 Balo bakaingula kuti, “Iiyi, mpali. Naacizwa akuboola, amufwambaane nkaambo bantu sunu nobaya kukupaizya kucilundu. 13 Mwasika buyo mumunzi mulamujana tanainka kucilundu kuyoolya. Nkaambo bantu tabakonzyi kutalika kulya mane do asike kucilundu, nkaambo nguuelede kuleleka cipaizyo kusaanguna, wamana batambidwe nibalya. Lino kamuya, mulamujana ciindi cino nciconya.”
14 Mpawo bakainka mumunzi ooyo, nkabela nibakali kunjila mumunzi, bakabona Samuyele kaza kulimbabo mulweendo lwakuya kucilundu.
15 Lino Saulu katanasika, muli bwajilo Mwami Leza wakayubunwide Samuyele kuti, 16 “Junza mbuli eeno ndiyookutumina mwaalumi uuzwa kucisi ca Benjamini, ngonguwe ooyo ngoelede kunanika kuti abe mwami wabantu bangu Baisilayeli. Nkabela uyoobavuna ku Bafilisiti, nkaambo ndakubona kupenga kwabantu bangu, alimwi ndamvwa kulila kwabo kuti bagwasigwe.”
17 Lino Samuyele naakabona Saulu, Mwami Leza wakamwaambila kuti, “Ooyu ngomwaalumi ngwindakali kukwaambila. Ngonguwe uutilele bantu bangu.” 18 Mpoonya Saulu wakaswena aafwiifwi kuli Samuyele kumbali aamulyango mupati wamunzi akumubuzya kuti, “Ndabuzya, ino ŋanda yamulangi ili kuli?”
19 Mpawo Samuyele wakaingula kuti, “Ndendime mulangi.” Amusolole kumbele lyangu, tuye kucilundu. Nywebo nyoonse nyobilo sunu tuyoolida antoomwe. Nkabela junza cifumo-fumo nenjoomwaambila cili kumoyo wanu. 20 Lino mbongolo nzyookasweekelwa mazuba otatwe aainda, utapengi pe, zyajanwa kale. Ino nguni ooyo Baisilayeli ngobayandisisya kunze lyanduwe amukwasyi wauso?
21 Mpawo Saulu wakaingula kuti, “Mebo ndizwa kumusyobo wa Benjamini, musyobo muniini kwiinda misyobo yoonse mu Isilayeli. Ndizwa kumukwasyi uutazizilwe kapati muciinga ca Benjamini. Ani inga wandaambila zintu zili boobu buti?”
22 Mpoonya awo Samuyele wakatola Saulu amubelesi wakwe muŋanda mpati akubabikka mubusena butaanzi kutebule ooko nkobakakkede bakatambidwe. Antoomwe bakali makumi otatwe. 23 Nkabela Samuyele wakaambila syaŋanda kuti, “Leta cituli canyama eeyo njindakupa akukwaambila kuti, ‘Uibikke ambali.’ 24 Mpawo syaŋanda wakabweza mweendo acituli cakali mpawo, wazibikka kumbele lya Saulu. Mpawo Samuyele wakati, ‘Langa, nceeci ncobambilidwe. Kolya cabikkilidwe nduwe kuti uzoocilye ciindi ecino antoomwe abantu aaba mbindakatamba.’”
Aboobo Saulu wakalya antoomwe a Samuyele mubuzuba oobo. 25 Eelyo bakaseluka acilundu mpobakalikupaizizya Saulu wakabambilwa bulo mujulu atala.
Samuyele mbwaakananika Saulu
26 Lino buce buyo, cifumo-fumo Samuyele wakaita Saulu kuzwa mpaakalede atala wakati, “Libambile uunke kulindinywe.” Mpawo Saulu wakabuka, lino Samuyele wakazwida anze. 27 Nkabela nibakaakusika kumamanino aamunzi, Samuyele wakaambila Saulu kuti, “Ambila mubelesi wako kuti ainde kumbele lyesu.” Mpawo mubelesi ooyo wakeendela kumbele lyabo, Samuyele wakaamba kuti, “Kociima-ima nkwaambile candaambila Mwami Leza.”