1 Samuyele 8
Baisilayeli mbubakakumbila kuba aa Mwami
1 Lino Samuyele naakacembaala wakabikka bana bakwe baalumi kuba babetesi mu Isilayeli. 2 Mwanaakwe mutaanzi wakali Joweli, wabili wakali Abija, mbibakali kubeteka ku Biyasyiba. 3 Nikuba boobo tiibakali kutobela nzila yawisi. Bakatalika buyo kutandila mpindu, bakali kutambula masinka mulomo, tiibakali kubeteka milandu buluzi.
4 Mpawo bapati ba Baisilayeli boonse bakabungana antoomwe akuunka kuli Samuyele ku Lama, 5 baakwaamba kuti, “Langa, yebo wacembaala, bana bako tabatobeli nzila zyako pe. Aboobo yebo utubikkile mwami uutinootweendelezya mbubonya mbuli misyobo imwi.” 6 Pele Samuyele wakabijilwa mukukumbila kwabo kwakuti ababikkile mwami abalele, nkaako wakakomba ku Mwami Leza. 7 Nkabela Mwami Leza wakati kuli Samuyele, “Swiilila kwaamba kwabantu mulizeezyo zyoonse zintu nzebakumbila. Toli nduwe ngobakaka bakaka ndime. Tabayandi kuti kandicibalela. 8 Kuzwa ciindi ciya nindakabagwisya kuzwa mu Ijipiti bakandikaka akukomba baleza bambi, lino bacicita akulinduwe. 9 Aboobo baswiilile buyo, pele ubacenjezye cini-cini akubapandulwida mbuli bami babo mbobati kabacite.”
10 Mpawo Samuyele wakabaambila bantu aabo bakali kukumbila kuti bapegwe mwami, makani oonse Mwami Leza ngaakamwaambila. 11 Samuyele wakati, “Mboobu, mwami wanu ooyo mbwayoocita. Bana banu balombe uyoobacita basilumamba, bamwi babo bayooba basinkalaki, bamwi bayooba basimabbiza, eeyi njemilimo njebayoomumanina. 12 Alimwi bamwi uyoobacita basilutwe babasilumamba bali cuulu, nkabela bamwi bayooba basilutwe babasilumamba bali makumi osanwe. Bana banu balombe mbabayoolima myuunda yakwe, kutebula zilyo zyakwe, kupanga zilwanyo azibelesyo zyankalaki zyakwe. 13 Bana banu basimbi banooyooenga tununkilizyo, kumukutaukila muŋanda bayooba basyaŋanda bakwe. 14 Uyoomunyanga myuunda yanu mibotu yansaansa ayamaoliva, uyooipa kuli balupati-pati bakwe. 15 Alimwi unootola kwakkumi kuzwa kumaila aanu akunsaansa zyanu kapa balupati-pati bakwe ababelesi bamwi balupati-pati mubulelo bakwe. 16 Uyootola babelesi baalumi abakaintu, basune banu babotu ambongolo, eelyo zyoonse eezi uyoozibelesya mwami ooyo. 17 Akwalo kumbelele uyootola kwakkumi. Nkabela nywebo lwanu muyooba bazike bakwe. 18 Eeco ciindi caakusika muyoolilauka kapati akaambo kamwami wanu ooyo walo ngomuyoolisalila, pele Mwami Leza takooyoomuswiilila pe.” 19 Pele bantu aaba taakwe nibakamuswiilila Samuyele. Bakamwiingula kuti, “Peepe. Swebo tuyanda mwami utweendelezya. 20 Kutegwa aswebo tube mbuli misyobo imwi, tube amwami wesu uunootusolweda munkondo.” 21 Samuyele wakaswiilila nzobakali kwaamba zyoonse, mpawo wakainka akuyooambila Mwami Leza. 22 Walo wakaingula kuti, “Bacitile buyo eeco ncobayanda, ubape mwami.” Mpoonya Samuyele wakaambila baalumi boonse ba Baisilayeli kuti bapilukile kuminzi yabo.