1 Samuyele 4

Mbulyakajatwa bbokesi lyacizuminano ca Mwami Leza

¹ Lino cimwi ciindi Baisilayeli bakainka kuyoolwana a Bafilisiti, Baisilayeli bakayaka zivuka zyabo ku Ebeneza, Bafilisiti bakayakila ku Efeki. ² Bafilisiti bakalibambila kuti balwane a Baisilayeli. Ciindi nkondo niyakavuta, Baisilayeli bakazundwa, basilumamba bakajaigwa munkondo eeyo bakatisike kuzyuulu zyone. ³ Ciindi basilumamba nibakapiluka kuzivuka zyabo, bapati ba Baisilayeli bakati, “Ino nkaambo nzi Mwami Leza naacita kuti sunu tuzundwe a Bafilisiti? Atukalete bbokesi lyacizuminano ca Mwami Leza ku Syilo kutegwa lyuunke andiswe ndendilyo Mwami Leza nayootuvuna kuli basinkondoma.” ⁴ Mpawo bakatuma bamwi ku Syilo, bakaakulijana bbokesi lyacizuminano ca Mwami Leza Singuzuzyoonse uukkala akati kabakelebu. Bana ba Eli ba Hofuni a Fineyasi, bakasika kabayumwide bbokesi lyacizuminano ca Mwami Leza.

⁵ Lino bbokesi lyacizuminano ca Mwami Leza nilyakasika ku zivuka zyabo, boonse Baisilayeli bakavutuka kapati cakuti nyika yakazungaana. ⁶ Lino Bafilisiti nibakamvwa kuyobeka ooko bakati, “Ino kuyobeka koonse ooko kuzivuka zya Bahibulu nkwanzi?” Bafilisiti nibakaziba kuti bbokesi lya Mwami Leza balileta kuzivuka zya Baisilayeli ⁷ bakayoowa bakati, “Umwi wabaleza wasika kuzivuka zyabo, Maawe! Twamana. Taakwe nicakacitikide kale cili mbuli ceeci. ⁸ Maawe! Ino nguni uukonzya kutuvuna kuzwa kunguzu zyabaleza aaba bayumu? Mbaaleza aabo bakajaya Baijipiti munkanda acuumo. ⁹ Amuyume, mube baalumi bazyandamene Nobafilisiti, buyo-buyo inga tulaba bazike ba Bahibulu mbubonya mbuli mbubakali bazike besu. Aboobo amulwane mbuli baalumi bazyandamene.” ¹⁰ Nkabela Bafilisiti bakalwana canguzu, eelyo Baisilayeli bakazundwa, bakabweeda kuminzi yabo batija. Basilumamba basimaulu bakajaigwa buzuba oobo bakali banji, bakasika kuzyuulu zili makumi otatwe. ¹¹ Alimwi bbokesi lya Mwami Leza lyakajatwa, abalo bana ba Eli ba Hofuni a Fineyasi, bakajaigwa.

Lufu lwa Eli

¹² Lino buzuba mbubonya oobo umwi mwaalumi wamusyobo wa Benjamini wakatija kuzwa kunkondo yakali kulwanwa, waya ku Syilo akuyoosika mubuzuba oobo mbubonya. Kutondezya mause aakwe, wakadelaula zisani akulamba vu kumutwe. ¹³ Naakasika Eli wakalikkede mucuuno cakwe kumbali lyamugwagwa, kalangilila. Wakalipengede kapati akaambo kabbokesi lya Leza. Lino mwaalumi ooyo naakanjila mumunzi wakaambilizya cakacitika, nkabela munzi woonse wakabunga dilwe. ¹⁴ Eelyo Eli naakamvwa koomoka ooko, wakabuzya wati, “Ino nkoomoka nzi ooku?” Lino mwaalumi ooyo wakafwambaana kuya kuli Eli kuyoomwaambila makani oonse. ¹⁵ Ciindi eeco Eli wakalijisi myaka iili makumi aali fuka alusele, alimwi ciindi eeci wakali kuya boofwaala. ¹⁶ Mpoonya mwaalumi ooyo wakati, “Ndatija kuzwa kunkondo, ndaboola ndizabuzuza.” Eli wakamubuzya kuti, “Ino ncinzi cacitika mwanaangu?” ¹⁷ Sikuleta makani wakaingula kuti, “Baisilayeli batija kuzwa ku Bafilisiti. Banji besu bajaigwa. Abalo bana bako ba Hofuni a Fineyasi bajaigwa, alimwi abbokesi lya Mwami Leza lyatolwa.”

¹⁸ Mwaalumi ooyo naakaamba makani aa bbokesi lya Mwami Leza, Eli wakawa nsalamwa kuzwa acuuno cakwe kumbali lyamulyango. Mukuti wakalicembeede akuneneya kapati nsingo yakatyoka mpawo wakafwa. Wakali musololi mu Isilayeli kwamyaka iili makumi one.

Lufu lwamukaintu wa Fineyasi

¹⁹ Mukamwana wa Eli, mukaintu wa Fineyasi, wakali minsi, alimwi ciindi cakutumbuka cakali aafwiifwi. Ciindi naakamvwa kuti bbokesi lya Mwami Leza lyatolwa, akuti wisizyala amulumi wakwe boonse balifwide, wakamyongwa kapati cakuti cakakatazya. ²⁰ Lino kayanda kufwa, basikumutumbusya bakati, “Utatyompwi. Ulaamwana mulombe.” Pele wakacinyina mputo taakaingula pe. ²¹ Kumane mwanaakwe wakamuulika zina lya Ikabodi, lyaamba kuti, “Bulemu bwa Mwami Leza bwazwa mu Isilayeli.” Wakaamba oobo nkaambo bbokesi lya cizuminano lyakatolwa, alimwi wisizyala amulumaakwe bakafwa. ²² Wakati, “Bulemu bwa Mwami Leza bwazwa mu Isilayeli, nkaambo bbokesi lya Mwami Leza lyatolwa.”