1 Samuyele 31

Lufu lwa Saulu abana bakwe balombe

¹ Lino Bafilisiti bakalwana Isilayeli, eelyo Baisilayeli bakatija. Nkabela banji bakajaigwa mucilundu ca Gilibowa. ² Aawo Bafilisiti bakeenzya Saulu abana bakwe balombe, Bafilisiti bakajaya Jonatani, Abinadabu a Milikisyuwa bana ba Saulu. ³ Nkondo yakamukomenena Saulu cakuti basimata bakamweenzya, bamucisa. ⁴ Mpoonya Saulu wakati kuli sikumubwezela zilwanyo, “Gwisya panga lyako, undijaye andilyo, nkaambo antela inga aaba batapalwidwe baboola kuzoondisobanya akundijaya.” Pele sikumubwezela zilwanyo taakwe naakacita oobo pe, nkaambo wakaliyoowede. Nkaako Saulu wakabweza panga lyakwe mwini akuwida alindilyo. ⁵ Sikumubwezela zilwanyo naakabona kuti Saulu wafwa, wakawida apanga lyakwe akufwa anguwe. ⁶ Mbombuboobu Saulu mbwaakafwa abana bakwe balombe botatwe asikumubwezela zilwanyo abantu bakwe boonse mubuzuba oobo mbubonya. ⁷ Lino Baisilayeli bakali kubbazu limwi lyakkuti, abaabo bakali kutala lya Jolodani nibakabona kuti Baisilayeli batija akuti Saulu abana bakwe balombe bafwa, bakasiya minzi yabo akutija. Bafilisiti bakasika kuzookkala mulinjiyo.

⁸ Lino nibwakaca ciindi Bafilisiti nibakaboola kuzoosaala zintu zyabaabo bakajaigwa, bakajana Saulu abana bakwe balombe botatwe kabafwide mucilundu ca Gilibowa. ⁹ Bafilisiti bakakosola mutwe wa Saulu akugwisya zilwanyo zyakwe, akutuma bantu munyika yoonse ya Bafilisiti kuti bazoobweze makani mabotu kwaatola kumituni yabo akubantu. ¹⁰ Mpawo bakabikka zilwanyo zya Saulu muŋanda yakupailila Asyitaloti, alimwi bakaangilila mutumba wakwe kubwaanda bwa Betisyani. ¹¹ Bantu bakkala ku Jabesyi Giliyadi, nibakamvwa Bafilisiti ncibakacita kuli Saulu, ¹² boonse baalumi basinguzu bakanyamuka akweenda masiku oonse, bakatola mutumba wa Saulu amitumba yabana bakwe balombe kuzwa kubwaanda bwa Betisyani. Bakasika ku Jabesyi kuzoobatentela nkuko. ¹³ Bakabweza zifuwa zyabo kuyoozizikka munsi aamusamu uulya mu Jabesyi baliimya kulya kwamazuba aali ciloba.