1 Samuyele 29

Devedi mbwaakakakwa a Bafilisiti

¹ Lino Bafilisiti bakabunganya bamwi basilumamba babo ku Afeki, Baisilayeli bakayakide zivuka zyabo kumbali akasensa kaku Jezuliili. ² Nkabela bami ba Bafilisiti nibakali kweenda mumyaanda amuzyuulu, Devedi abantu bakwe bakali kuza buza musule antoomwe a Akisyi. ³ Basilutwe ba Bafilisiti bakati, “Ino bacita nzi aaba Bahibulu kuno?”

Akisyi wakati kuli basilutwe ba Bafilisiti, “Ooyu ngu Devedi mubelesi wa Saulu mwami wa Isilayeli. Wakkala andime kwamazuba amyaka yeelede, kuzwa naakasika taakwe nindakamujanina cibi mane kusikila sunu.”

⁴ Pele basilutwe ba Bafilisiti bakamunyemena Akisyi bakati kulinguwe, “Mupilusye ooyu muntu, kubusena bwakwe mbookamupa. Atainki aswebo kunkondo pe, nkaambo antela inga wayanzana abantu bakwe waba sinkondoma. Ino uyeeya kuti inga muntu ooyu bayanzana buti amwami wakwe Saulu? Tee muukukosola mitwe yabantu besu? ⁵ Sena ooyu teensi Devedi, ooyo ngubakali kwiimbila kumwi kabazyana akuti, ‘Saulu wakajaya bantu bali zyuulu, pele Devedi wakajaya bantu bali zyuulu zili makumi?’”

⁶ Mpoonya Akisyi wakaita Devedi akumwaambila kuti, “Mbubonya mbuli Mwami Leza mbwali muumi, yebo ulasyomeka. Kulindime taakwe bubi mbwindakujanina kuzwa kubuzuba mbookasika kulindime kusikila sunu. Nikuba boobo bami bamwi tabakuyandi. ⁷ Aboobo piluka buyo, uunke aluumuno, kuti utabisizyi bami ba Bafilisiti pe.”

⁸ Devedi wakati kuli Akisyi, “Ino ndacita nzi, ncibi nzi ncimwajana mumubelesi wako kuzwa buzuba naakasika akutalika kukubelekela kusikila ono, kuti intainki akuyoolwana basinkondo basimalelo wangu mwami?”

⁹ Akisyi naakamvwa Devedi wakati, “Ndilizi kuti tolubizizye uli mbuli mungelo. Nikuba boobo basilutwe ba Bafilisiti baamba kuti, ‘Takooinka aswebo kunkondo pe.’ ¹⁰ Lino ufume cifumo-fumo ababelesi bamwami aabo bakaza anduwe, utalike kweenda kakucisiya-siya ansi, uunke.”

¹¹ Nibwakaca Devedi wakafuma abantu bakwe kubweeda kunyika ya Bafilisiti. Bafilisiti bakainka ku Jezuliili.