1 Samuyele 28
1 Lino mumazuba aayo Bafilisiti bakabunganya basinkondo boonse kuti balwane Baisilayeli. Eelyo Akisyi wakati kuli Devedi, “Lino komvwa, yebo abantu bako, uleelede kuunka kunkondo.”
2 Devedi wakati kuli Akisyi, “Mbubo, ncibotu, uyoobona eeco mubelesi wako ncayoocita.”
Akisyi wakati kuli Devedi. “Mbubo, ncibotu uyooba mulindizi wangu mubuumi bwangu boonse.”
Saulu mbwaakaya kumukaintu uuamba aamizimo
3 Samuyele wakalifwide, nkabela Baisilayeli boonse bakamulila akumuzikka mu Lama mumunzi wakwe. Saulu wakalibagwisizye baamba aa mizimo abasondi munyika.
4 Ciindi Bafilisiti nibakalibunga-bunga antoomwe, bakaza kuzooyaka zivuka ku Syunemu. Awalo Saulu wakabunganya Baisilayeli boonse bakayaka zivuka ku Gilibowa. 5 Ciindi Saulu naakabona basilumamba ba Bafilisiti, wakayoowa kapati, wakakankama. 6 Saulu naakabuzya Mwami Leza, Mwami Leza taakwe naakamwiingula pe, nikuba kuziloto, nikuba kucisolo, nikuba kubasinsimi. 7 Mpoonya Saulu wakati kuli balupati-pati bakwe, “Amundiyandawide mukaintu uuamba aamizimo kutegwa ndiinke kulinguwe nkasonde.”
Mpoonya balupati-pati bakwe bakati kulinguwe, “Langa, nkwali mukaintu uukonzya kwaamba aamizimo ku Endo.”
8 Mpawo Saulu wakalisandula akusama zibaki zimbi, wakainka lwakwe abaalumi bamwi bobilo, eelyo bakasika kumukaintu uulya ciindi camasiku. Mpawo Saulu wakati, “Ndiitila muzimo, kwaambisya ooyo ngwentikwaambile.”
9 Mukaintu wakati kulinguwe, “Ulizi eeco Saulu ncaakacita, mbuli mbwaakatanda basondi abaamba aamizimo kuzwa munyika. Ino nkaambo nzi nonditeya kakole undijazye?”
10 Pele Saulu wakamukombelezya muzina lya Mwami Leza, wakati, “Mbubonya mbuli Mwami Leza mbwali muumi, taakwe cisubulo ciyooba alinduwe akaambo kacintu eeci.”
11 Mpoonya mukaintu wakati, “Ino nguni ngwenti nkweetele?”
Walo wakati, “Ndeetela Samuyele.”
12 Ciindi mukaintu naakabona Samuyele, wakoongolola ajwi pati, wakati kuli Saulu, “Ino wandicengela nzi? Nduwe Saulu.”
13 Mpawo mwami Saulu wakati kulinguwe, “Utayoowi, ino wabona nzi?” Mukaintu wakati, “Ndabona muzimo kuuzwa munyika.”
14 Saulu wakati kumukaintu, “Uli buti?”
Walo wakati, “Ndabona mwaalumi munene kazwa, alimwi ulisamide ajansi.”
Aawo Saulu wakaziba kuti ngu Samuyele, eelyo wakakotamika busyu ansi akumulemeka.
15 Mpoonya Samuyele wakati kuli Saulu, “Ino nkaambo nzi ncoondinyonganya mukundibusya?”
Saulu wakaingula kuti, “Ndipengede, nkaambo Bafilisiti bayanda kundilwana awalo Mwami Leza wandisiya tacindivuwi pe, nikuba mubusinsimi nikuba kuziloto. Nkankakaako ncindakwiitila kuti undaambile cakucita.”
16 Samuyele wakati, “Ino undibuzizya nzi, kayi Mwami Leza wakusiya akuba sinkondonyoko? 17 Mwami Leza wakucitila mbubonya mbuli mbwaakandaambila, walo wakunyanzya bulelo wabupa kuli umbi, kuli Devedi. 18 Nkaambo taakwe nookaswiilila jwi lya Mwami Leza, alimwi Baameleki tookabanyonyweeda limwi mbuli mubukali bwa Leza, Mwami Leza ncaacitila ceeci sunu buzuba buno. 19 Kuyungizya kuli ceeci, Mwami Leza ulaaba Isilayeli alimwi anduwe ku Bafilisiti. Eelyo junza yebo abana bako balombe bazooba andime, alimwi Mwami Leza uyooaba basilumamba ba Isilayeli ku Bafilisiti.”
20 Mpawo Saulu wakawida ansi ddu, kayoowede akaambo kamajwi aa Samuyele. Wakatempukwa, nkaambo taakwe ncaakalide buzuba abusiku boonse. 21 Eelyo mukaintu uulya wakaboola kuli Saulu ciindi naakabona kuti wakaliyoowede, wakati, “Bona, mubelesi wako wakuswiilila, ndasanga buumi bwangu akuswiilila ceeco ncoondaambila. 22 Nkaako lino ayebo swiilila mubelesi wako. Nkoo ndikweetele cakulya cimwi, kutegwa ube anguzu wazootalika lweendo lwako.”
23 Pele wakakaka akwaamba kuti, “Nsikoolya.” Pele babelesi bakwe antoomwe amukaintu bakamukakatizya, mpawo wakaswiilila majwi aabo. Aboobo wakanyamuka kuzwa ansi, wakakkala abulo. 24 Mukaintu ooyu wakajisi moombe uuneneede kuŋanda. Mpoonya cakufwambaana wakamujaya, wakabweza busu bunante akubukanda, akujika cinkwa citakwe mimena. 25 Mpawo wakazipa kuli Saulu ababelesi bakwe, eelyo bakalya. Mpoonya bakanyamuka akuunka masiku aayo ngoonya.