1 Samuyele 27

Devedi akati ka Bafilisiti

¹ Lino Devedi wakati mumoyo wakwe, “Bumwi buzuba njoojaigwa aa Saulu, taakwe cintu cibotu ncendikonzya kucita kwiinda kuti nditijile kunyika ya Bafilisiti. Saulu natilengaane kundiyandaula mukati kaminyinza ya Isilayeli, mbwekonzya kulikwabilila oobo.” ² Aawo Devedi wakanyamuka wainka, lwakwe abaalumi bali myaanda iili cisambomwe aabo mbaakali aabo. Wakasika kuli Akisyi mwanaa Maoku, mwami wa Gati. ³ Devedi wakakkala a Akisyi mu Gati, abantu bakwe, boonse amikwasyi yabo, Devedi wakatolelezya abakaintu bakwe bobilo, Ahinowamu waku Jezuliili a Abigelo waku Kaameli, mukamufu Nabali. ⁴ Ciindi Saulu naakaambilwa kuti Devedi wakatijila ku Gati, taakwe naakacili kumuyandaula limbi pe.

⁵ Devedi wakati kuli Akisyi, “Kuti katuyanzene, undipe busena bumwi bwakukkala mumunzi umwi wacisi cako, kuti kandikkala ooko. Ino nkaambo nzi mubelesi wako nceelede kukkala mumunzi wabwami?” ⁶ Akisyi wakamupa Zikilagi, ncenciceeco Zikilagi ncuuli munzi wabami ba Juda kusikila kubuzuba buno. ⁷ Devedi wakakkala mucisi ca Bafilisiti kwamwaka amyezi yone.

⁸ Lino Devedi abantu bakwe bakainka kuyoosaala Bagesyu, Bagezili a Baameleki, aaba mbabakali kukkala mucisi eeci kwamyaka, bakali kusikila ku Syuu kunyika ya Ijipiti.

⁹ Devedi wakanyonyoona cisi coonse, taakwe muntu ngwaakasiya kali muumi naba mwaalumi naba mukaintu. Wakatola mbelele, ŋombe, mbongolo, nkamela, azibaki, amane wakapilukila kuli Akisyi. ¹⁰ Ciindi Akisyi naakali kubuzya kuti, “Ino nguni ngumwasaala sunu?” Devedi wakali kuti, “Twali kubbazu lyakumusanza kulwana Bajuda, naa kunyika ya Bajelamiili naa kunyika ya Bakeni.” ¹¹ Devedi taakwe naakali kusiya mwaalumi naba mukaintu kacipona, wakuleta makani ku Gati, kayeeya kuti, “Ambweni inga balatutola mpuwo yakuti, ‘Mboobu mbwaacita Devedi.’” Eeci ncicakali cilengwa cakwe ciindi coonse ncaakakkede mucisi ca Bafilisiti. ¹² Eelyo Akisyi wakasyoma Devedi kayeeya kuti, “Walibisya lwakwe mwini ku Baisilayelinyina, nkaako unooli mubelesi wangu lyoonse.”