1 Samuyele 24

Devedi mbwaatakajaya Saulu

¹ Lino Saulu naakapiluka kuzwa kukulwana Bafilisiti, wakaambilwa kuti, “Bona, Devedi uli munkanda yaku Engedi.” ² Saulu wakatola basilumamba bakasalidwe bali zyuulu zyotatwe kuzwa mu Baisilayeli boonse, bakainka kuyooyandaula Devedi abantu bakwe, bakatozya ku Myaala yanjeleele. ³ Saulu wakasika kuzibaya zyambelele zyakali mumugwagwa, ooko kwakali mpangala, wakanjila kuti aye kusokwe. Lino Devedi abantu bakwe bakalikkede mukati mwini mwampangala. ⁴ Bantu ba Devedi bakati kulinguwe, mboobu buzuba oobo Mwami Leza mbwaakati kulinduwe, “Bona, njooaba sinkondonyoko kulinduwe uyoomucita eeco ciyookubotela.” Mpoonya Devedi wakanyamuka akutenda kabotu-kabotu moombe wacisani ca Saulu. ⁵ Devedi wakamupenzya moyo nkaambo wakatenda moombe wacisani ca Saulu. ⁶ Wakati kubantu bakwe, “Mwami Leza andikasye kucita cibi kumwami wangu, munanike wa Mwami Leza, nkaambo ngomunanike wa Mwami Leza.” ⁷ Aboobo Devedi wakakombelezya bantu bakwe amajwi aaya, alimwi taakwe naakabazumizya kuti balwane Saulu.

Saulu wakazwa mumpangala akutalika lweendo lwakwe. ⁸ Musule aakooku awalo Devedi wakazwa mumpangala akwiita Saulu kuti, “O Mwami simalelo wangu.” Nkabela Saulu naakacebukila musule, Devedi wakakotamika mutwe wakwe mukulemeka. ⁹ Amane Devedi wakati kuli Saulu, “Nkaambo nzi noswiilila majwi aabantu baamba kuti, ‘Bona, Devedi uyandaula kukucisa?’ ¹⁰ Walibonena buno buzuba ameso aako kuti Mwami Leza wali kwaabide kulindime omuya mumpangala. Bamwi bandaambilide kuti nkujaye, pele ndakufwida luse. Ndaamba kuti, ‘Nsikonzyi kubikka janza lyangu kuli simalelo wangu nkaambo ngomunanike wa Mwami Leza.’ ¹¹ Taata, langa moombe wacisani cako mujanza lyangu, kaambo nkindautendela akutakujaya nkakuti uzibe akubona kuti nsikwe bubi naa mulandu wakukubukila. Taakwe nendakakubisizya pe, nikuba kuti uyanda kundijaya. ¹² Mwami Leza abone uulubizizye kuti nguni akati kako andime, alimwi Mwami Leza akubweedezezye bubi, pele mebo lwangu nsikakucisi aasyoonto pe. ¹³ Mbubonya mbuli mbokaamba kasimpi kabasikale kati, ‘Bubi bulacitwa abantu babi.’ Pele lwangu tandikakucisi aasyoonto pe. ¹⁴ Ani nguni mwami wa Isilayeli ngwazabutobela? Ino nguni ngoza butanda? Mubwa uufwide, utobela njina buyo. ¹⁵ Lino Mwami nguutibone kuti uulubizizye nguni akati kandime anduwe. Andikwabilile kuzwa kulinduwe.”

¹⁶ Ciindi Devedi naakamana kwaambaula majwi aaya kuli Saulu, Saulu wakati, “Sena nduwe mwanaangu, mwanaangu Devedi?” Mpawo Saulu wakoongolola akutalika kulila. ¹⁷ Wakati kuli Devedi, “Yebo uliluleme kwiinda ndime, nkaambo wandijokezya bubotu, kakuli kuti mebo ndakakujokezya bubi. ¹⁸ Sunu watondezya bubotu bwako mukuti toondijaya. Wandilwiida mboondicitila kabotu muciindi cakundijaya Mwami Leza naandaabide kulinduwe. ¹⁹ Nkaambo kuti naa muntu wajana sinkondonyina, sena inga wamuleka kuti ainke kabotu alimwi? Aboobo Mwami Leza akupe bulumbu bubotu kuli ceeci ncoondicitila sunu. ²⁰ Lino ndaziba kuti ncobeni nduwe uyooba mwami, abulelo bwa Isilayeli buyooima nji mumaanza aako. ²¹ Nkaako ndikonkezya mu Mwami Leza kuti ndaakufwa tokooyoomaninizya lunyungu lwangu mukuti zina lyangu alyataata litakazimaani.” ²² Devedi wakakonkezya eeci Saulu kamvwide,

Mpoonya Saulu wakapiluka kumunzi, pele Devedi abantu bakwe bakapilukila kumpangala.