1 Samuyele 23
Devedi mbwaakavuna munzi wa Kiila
1 Lino bakaambila Devedi kuti, “Bona, Bafilisiti balwana munzi wa Kiila, alimwi babba maila aamumatala.” 2 Devedi wakabuzya Mwami Leza kuti, “Sena ngunke kuti nkalwane Bafilisiti?”
Mwami Leza wakati kuli Devedi, “Koya ukalwane aba Filisiti ukavune Kiila.” 3 Pele bantu ba Devedi bakamwaambila kuti, “Bona, swebo tulayoowa muno mucisi ca Juda. Ino kuyooba buti naa twainka ku Kiila kuyoolwana basilumamba baba Filisiti?” 4 Mpoonya Devedi wakabuzya Mwami Leza alimwi. Eelyo Mwami Leza wakamwiingula kuti, “Koya ku Kiila, nkaambo njooaba ba Filisiti kulinduwe.” 5 Aawo Devedi abantu bakainka ku Kiila kuyoolwana Bafilisiti, nkabela wakasaala ŋombe zyabo akujaya banji babo. Mbombuboobu Devedi mbwaakavuna bantu baku Kiila.
6 Ciindi Abiyata mwana wa Ahimeleki naakatijila kuli Devedi ku Kiila wakeetelezya akasani kabupaizi mumaanza aakwe.
7 Lino Saulu wakaambilwa kuti Devedi wasika ku Kiila, mpawo Saulu wakati, “Lino Leza wamwaaba kulindime, nkaambo walijalila lwakwe mwini mukunjila mumunzi uujisi milyango azipingizyo. 8 Eelyo Saulu wakabunganya bantu boonse kuti baye kunkondo ku Kiila baka sinkilizye Devedi abantu bakwe.”
9 Lino Devedi wakaziba kuti Saulu ulimukanzide bubi, eelyo wakaamba kuli Abiyata mupaizi kuti, “Leta kuno kabaki kabupaizi.” 10 Mpoonya Devedi wakati, “O Mwami Leza wa Isilayeli, ndemubelesi wako ndamvwa kuti Saulu uyanda kuboola ku Kiila, kuzoomwaya munzi nkaambo kandime. 11 Sena bantu baku Kiila balandaaba kulinguwe? Sena Saulu ulasika ncobeni mbubonya mbuli mubelesi wako mbwamvwide? O Mwami Leza, Leza wa Isilayeli, ndakukumbila, koambila mubelesi wako.”
Eelyo Mwami Leza wakati, “Ulasika.”
12 Mpoonya Devedi wakati, “Sena bantu baku Kiila balandaaba kuli Saulu antoomwe abantu bangu?”
Nkabela Mwami Leza wakali, “Balamwaaba.”
13 Mpoonya Devedi abantu bakwe bakatisike kumyaanda iili cisambomwe bakazwa ku Kiila cakufwambaana, bakainka kufumbwa nkubakali kukonzya. Mpawo Saulu naakaambilwa kuti Devedi wakazwa ku Kiila, taakainka.
Devedi munyika yazilundu
14 Nkabela Devedi wakakkala mumampangala muzilundu zyamunkanda zyaku Zifu. Saulu wakali kumuyandaula lyoonse, nikuba boobo Mwami Leza taakwe naakamwaaba kulinguwe pe. 15 Devedi wakaliyoowede nkaambo Saulu wakali kuyanda kumujaya.
Ciindi eeco Devedi wakali munkanda yaku Zifu ku Holesyi. 16 Jonatani mwanaa Saulu wakanyamuka, wainka kuli Devedi ku Holesyi akumuyumya-yumya mu Mwami Leza. 17 Nkabela wakati kulinguwe, “Utayoowi, nkaambo Saulu taata takooyookujaya pe. Uyooba mwami wa Isilayeli, mebo nzooba wabili kulinduwe. Saulu taata awalo ulizi oobo.” 18 Eelyo bobilo boonse bakapangana cizuminano kumbele lya Mwami Leza, Devedi wakasyaala ku Holesyi, Jonatani wakabweeda kumunzi.
19 Mpoonya Bazifu bakainka kuli Saulu ku Gibeya, baakuti, “Devedi uliyubide kucisi cesu mumampangala aaku Holesyi mucilundu caku Hacila cili kumusanza lya Jesyimoni. 20 Nkaako boola, o mwami mbubonya mbuli mbokanzide kumujata, swebo tuyoomwaaba ku mwami.”
21 Saulu wakati, “Mwami Leza amuleleke, nkaambo mwandibeda aaluse. 22 Lino kamuya, mukabonesye, mukazibe ciyubilo cakwe nkocibede, alimwi nguni wakamubona okuya, nkaambo ndilizi kuti ngusimaanu kapati. 23 Nkaako mukabone, mukalangisisye mumasena oonse ngayubila, mwamana mukaboole kulindime amakani aazulide. Mebo ndizooinka anywebo kuti naa kali munyika eeyo ncobeni, nzoomujana ndizoomulangaula akati kazyuulu zyaba Juda.”
24 Eelyo bakanyamuka akuunka ku Zifu, Saulu katana unka. Lino Devedi abantu bakwe bakali munkanda yaku Maoni mu Alaba kumusanza lya Jesyimoni. 25 Saulu abantu bakwe bakainka kuyoomuyandaula. Devedi naakaambilwa boobo, wakainka kumwaala uuli munkanda ya Maoni. Saulu naakamvwa oobo, wakamutobela munkanda ya Maoni. 26 Saulu wakainka kumwi kubbazu lyacilundu, Devedi abantu bakwe kabali kubbazu limbi lyacilundu. Lino Devedi wakafwambaana kutija, mukuti Saulu abantu bakwe bakali kuyanda kooba Devedi abantu bakwe kuti babajaye. 27 Mutumwa wakasika kuli Saulu wakati, “Fwambaana kusika, nkaambo Bafilisiti baboola kuzoosaala nyika.” 28 Aboobo Saulu wakapiluka kuzwa kukutobela Devedi, wakainka kuyoolwana Bafilisiti. Nkaako oobo busena bwakaitwa kuti Mwaala wa Lwaandaano. 29 Kuzwa kooko Devedi wakainka kuyookkala mumampangala aaku Engedi.