1 Makani 5
Bana ba Lubeni
1 Mbaaba bana ba Lubeni mwana wakusaanguna wa Isilayeli, ooyu nguwakusaanguna kuzyalwa, pele akaambo kakuti wakanjila muŋanda yawisi, bupati bwakwe bwakapegwa kubana ba Josefa mwana wa Isilayeli. Ncenciceeco ncatajaniki mubusena bweelede mbuli kuzyalwa kwakwe. 2 Nikuba kuti bamusyobo wa Juda bakali basinguzu kwiinda babunyina, alimwi mwami wakazwa mumusyobo wabo, Josefa wakapegwa ceelelo camwana wakusaanguna. 3 Lino bana ba Lubeni mwana wa Isilayeli wakusaanguna mbaa: Hanoki, Palu, Heziloni a Kaami. 4 Balunyungu lwa Joweli mbaa: Syemaiya, Gogi, Syimeyi, 5 Mika, Leyaiya, Baali, 6 Beela, ooyo Tigilatipilesa mwami wa Asiliya ngwaakatola mubuzike. Beela wakali ngomusololi wa Balubeni.
7 Bapati baziinga zyabo kweendelana amazyalani mbaa: Jeyiyeli mupati wabo, Zekaliya, 8 Bela mwana wa Azazi mwanaa Syema mwanaa Joweli. Bakali kukkala kutalikila ku Aloyeli kuyoosika ku Nebo aku Baalimeyoni. 9 Kulubazu lwakujwe bakalikkede kuyoosika kumatalikilo aankanda eeyo iili kumulonga wa Yufuletisi, nkaambo kakuti zivubwa zyabo zyakavuzyanya mu Giliyadi.
10 Lino muciindi ca Mwami Saulu, musyobo wa Lubeni wakalwana Bahagili akubazunda, eelyo bakakkala mubakakkede mucisi coonse kujwe lya Giliyadi.
Lunyungu lwa Gadi
11 Lino musyobo wa Gadi wakakkede kumbali aa Balubeni mu Basyani kuyoosika kujwe ku Saleka. 12 Joweli nguwakali mupati wabo kumane ngu Syafani, kumane ngu Janayi kuzwa waawa ngu Syafati mu Basyani. 13 Lino bapati bamikwasyi yabo mbaa: Mikayeli, Mesyulamu, Syeba, Jolayi, Jakani, Ziya, a Eba. Antoomwe bakali ciloba. 14 Mbaaba bana ba Abihaili mwanaa Huli, mwanaa Jaloya, mwanaa Giliyadi, mwanaa Mikayeli, mwanaa Jesyisyayi, mwanaa Jado, mwanaa Buzi. 15 Ahi mwana wa Abudiyeli, mwanaa Guni, nguwakali mupati wamukwasyi wabo. 16 Bagadi bakali kukkala muminzi ya Giliyadi a Basyani, kubikkilizya atunzi tweengelede antoomwe amacelelo aaku Syaloni mane kuyoosikila nkwaagolela. 17 Makani aaya oonse akabambwa mumazuba Jotamu naakali mwami wa Juda awalo Jelobowamu naakali mwami wa Isilayeli.
Impi zya Baisilayeli
18 Balubeni, Bagadi, bacisela camusyobo wa Manase bakajisi baalumi basintanze bakali kukonzya kulwanya ntobo, mapanga amata bakacibwene ncobeni kulwana, kabali zyuulu zili makumi one aane, amyaanda iili ciloba amakumi aali cisambomwe. 19 Bakaya kunkondo kuyoolwana Bahagili, Jetuu, Nafisyi abaku Nodabu. 20 Aboobo Leza wakabagwasya akwaaba Bahagili abaabo mbibakali aabo bakaabwa ku Balubeni. Nkaambo kakuti bakalilila Leza nibakali kulwana, wakabavuwa nkaambo bakamusyoma. 21 Bakatola zivubwa zya Bahagili eezi: nkamela zili zyuulu zili makumi osanwe, mbelele zili zyuulu zili myaanda yobilo amakumi osanwe, mbongolo zili zyuulu zyobilo, abantu bali zyuulu zili mwaanda mubwaange. 22 Banji babo bakajaigwa nkaambo nkondo yakali ya Leza. Bakakkala mubusena bwabo mane kusikila balo lwabo nibakatolwa mubuzike.
Bacisela camusyobo wa Manase
23 Bantu bacisela camusyobo wa Manase bakakkala munyika bakali banji kuzwida ku Basyani kuyoosika ku Baalihemoni nkokuti Senii kucilundu ca Hemoni. 24 Aaba mbibakali bapati bamikwasyi yabo: Efa, Isyi, Eliyeli, Aziliyeli, Jelemiya, Hodaviya a Jadiyeli, bakali baalumi basintanze badumide alimwi bakali mbabapati bamikwasyi yabo. 25 Pele tiibakali kusyomeka kuli Leza wabasikale babo, bakalisofwaazya mukukomba baleza babantu bamunyika eeyo, aabo Leza mbaakabanyonyweeda. 26 Nkaako Leza wa Isilayeli wakavundumusya Puli mwami waku Asiliya, uuli ngo Tigilatipilesa. Oyu wakatola Balubeni, Bagadi abacisela camusyobo wa Manase mubuzike. Wakaakubabikka ku Hala, Habo aku Hala akumulonga wa Gozani ooko nkobacibede asunu.