1 Makani 27
Malizi aabasilumamba
1 Ngooyu mundandanda mumikwasyi, balailili babasilumamba ba zyuulu abamyaanda kubikkilizya abalupati-pati babo aabo bakali kugwasilizya mwami mukusala basilumamba mwezi amwezi mumwaka. Bulizi bomwe-bomwe bwakajisi basilumamba basika kuzyuulu zili makumi obilo azine.
2 Mumwezi mutaanzi, wakali mulailili wankamu yabulizi wakali Jasyobeyamu mwanaa Zebudiyeli. Nkamu yakwe yakajisi baalumi basika kuzyuulu zili makumi obilo azine. 3 Jasyobeyamu wakali walunyungu lwa Pelezi. Nguwakali kulanga basilumamba balupati-pati boonse.
4 Mumwezi wabili, wakali mulailili wankamu yabulizi wakali Dodayi Muahohi. Mikiloti nguwakali kuccilila yooyu. Nkamu yakwe yakajisi baalumi basika kuzyuulu zili makumi obilo azine.
5 Mumwezi watatu, wakali mulailili wankamu yabulizi wakali Benaiya mwanaa Jehoiyada mupaizi. Wakali ngomupati, nkamu yakwe yakajisi baalumi basika kuzyuulu zili makumi obilo azine. 6 Benaiya ngonguyuulya wakali musololi wabali makumi otatwe. Amizabadi mwanaakwe nguwakatola busena bwakwe. 7 Mumwezi wane, wakali mulailili wankamu yabulizi wakali Asaheli munyina Jowabu. Zebadiya mwanaakwe nguwakatola busena bwakwe. Nkamu yakwe yakajisi baalumi basika kuzyuulu zili makumi obilo azine.
8 Mumwezi wasanu, wakali mulailili wankamu yabulizi wakali Syamuhuti walunyungu lwa Izila. Nkamu yakwe yakajisi baalumi bali zyuulu zili makumi obilo azine.
9 Mumwezi wacisambomwe, wakali mulailili wankamu yabulizi wakali Ila mwana wa Ikesyi Mutekowa. Nkamu yakwe yakajisi baalumi basika kuzyuulu zili makumi obilo azine.
10 Mumwezi waciloba, wakali mulailili wankamu yabulizi wakali Helezi Mupeloni wamusyobo wa Efulemu. Nkamu yakwe yakajisi baalumi basika kuzyuulu zili makumi obilo azine.
11 Mumwezi walusele wakali mulailili wankamu yabulizi wakali Syibekayi Muhusyati, waciinga ca Zela. Nkamu yakwe yakajisi baalumi basika kuzyuulu zili makumi abilo azine.
12 Mumwezi wafuka, wakali mulailili wankamu wakali Abiyeza Muanatoti, wamusyobo wa Benjamini. Nkamu yakwe yakajisi baalumi basika kuzyuulu zili makumi obilo azine.
13 Mumwezi wakkumi, wakali mulailili wankamu wakali Mahalayi Munetofati, waciinga ca Zela. Nkamu yakwe yakajisi baalumi basika kuzyuulu zili makumi obilo azine.
14 Mumwezi wakkumi aumwi, wakali mulailili wankamu yabulizi wakali Benaiya Mupilatoni, wamusyobo wa Efulemu. Nkamu yakwe yakajisi baalumi basika kuzyuulu zili makumi obilo azine.
15 Mumwezi wakkumi aibili, wakali mulailili wankamu yabulizi wakali Helidayi Munetofati walunyungu lwa Otiniyeli. Nkamu yakwe yakajisi baalumi basika kuzyuulu zili makumi obilo azine.
Balupati-pati bamisyobo ya Isilayeli
16 Balupati-pati aabo bakali kweendelezya Baisilayeli mumisyobo yabo mbaaba: wakali kweendelezya Balubeni ngu Eliyezaa mwanaa Zikili. Wakali kweendelezya Basimiyoni ngu Syefatiya mwanaa Maaka.
17 Wakali kweendelezya Balevi ngu Hasyabiya mwanaa Kemuyeli. Wakali kweendelezya balunyungu lwa Aloni ngu Zadoki.
18 Wakali kweendelezya Bajuda ngu Elihu munyina Devedi. Wakali kweendelezya Baisakaa ngu Omuli mwanaa Mikayeli.
19 Wakali kweendelezya Bazebuluni ngu Isyimaiya mwana wa Obadiya. Wakali kweendelezya Banafutali ngu Jelimoti mwana wa Aziliyeli.
20 Wakali kweendelezya Baefulemu ngu Hesyeya mwana wa Azaziya. Wakali kweendelezya bacisela camusyobo wa Manase ngu Joweli mwanaa Pedaiya.
21 Wakali kweendelezya bacisela cimwi camusyobo wa Manase ku Giliyadi ngu Ido mwanaa Zekaliya. Wakali kweendelezya Babenjamini ngu Jaasiyeli mwana wa Abina. 22 Wakali kweendelezya Badani ngu Azaleli mwanaa Jelohamu. Oobu mbubakabede balupati-pati ba Baisilayeli.
23 Mwami Devedi taakabala baalumi aabo batakanasisya myaka iili makumi obilo pe, nkaambo Mwami Leza wakasyomezya kuti bayoovula mbubonya mbuli nyenyezi zyakujulu. 24 Jowabu mwanaa Zeluiya wakatalika kubala baalumi, nikuba boobo taakabamanizya pe. Akaambo kakubala ooku Leza wakanyemena Baisilayeli, nkaako mweelwe ooyu ngubakajene tiibakuulemba mubbuku lyaamba zya mwami Devedi.
Bakali kulanga zintu zyamwami Devedi
25 Wakali kulanga ziyobwedo zyaŋanda yamwami ngu Azimaveti mwana wa Adiyeli. Wakali kulanga ziyobwedo zyamuminzi mipati amutunzi tumwi kubikkilizya amaanda aabasilumamba ngu Jonatani mwanaa Uziya. 26 Wakali kulanga babelesi bakali kulima myuunda ngu Ezula mwanaa Kelubu. 27 Wakali kulanga myuunda yamisaansa ngu Syimeyi Mulamati. Wakali kulanga zyansaansa zicelwa kubambya waini ngu Zabidi Musyifumi.
28 Wakali kulanga zyamaoliva ankuyu kunselelo lyatulundu-lundu tuli kumbo ngu Baalihanani Mugeda. Wakali kulanga zyakweenga mafuta ngu Jowasyi.
29 Wakali kulanga zyaŋombe zicela ku Syaloni ngu Syitilayi Musyaloni. Wakali kulanga zyamatanga aacelela mumakkuti ngu Syafati mwanaa wa Adilayi.
30 Wakali kulanga zyankamela ngu Obili Muisyimayeli. Wakali kulanga zyambongolo ngu Jedaiya Mumelonoti.
31 Wakali kulanga zyamatanga ngu Jazizi Muhagili. Boonse aabo mbibakali bapati balanga zyalubono lwa mwami Devedi.
Balailili ba Devedi
32 Jonatani wisi umwi Devedi wakali mulailili musongo alimwi wakali mulembi. Walo a Jehiyeli mwanaa Hakimoni mbibakali kwiisya bana balombe bamwami. 33 Ahitofeli wakali mulailili wa mwami, eelyo Husyayi Mualiki wakali mweenzinyina mwami. 34 Jehoiyada mwanaa Benaiya a Abiyata mbibakatola busena bwa Ahitofeli. Wakali silutwe wampi yamwami ngu Jowabu.