1 Makani 22

¹ Mpawo Devedi wakati, “Ŋanda ya Mwami Leza iyakubeda waano, acipaililo ncobanootentela Baisilayeli.”

Mbubakalibambila kuyaka ŋanda ya Mwami Leza

² Lino Devedi wakalailila kuti boonse bamasi bakkala mu Isilayeli babunganyizigwe. Kuzwa kulimbabo wakasala basikubeza mabwe kuti babambe mabwe aakuyasya ŋanda ya Leza. ³ Wakapa lubulo lunji lwakupanzya mpikili zyakubambya zitendele zyakumanjililo azijatilizyo. Wakapa mukuba watakali kukonzya kweelekwa. ⁴ Wakapa zisamu zyamulombe zitabaliki. Nkaambo Basidoni a Bataya bakaleta milwi-milwi yazyo kuli Devedi. ⁵ Devedi wakati, “Mwanaangu Solomoni ucili muniini alimwi tajisi luzibo kakuli ŋanda eeyo iitiyakilwe Mwami Leza yeelede kweebeka, yampuwo alimwi mbotu kubantu bamanyika oonse. Nkankakaako nceelede kwiibambilila limwi.” Mbombuboobu Devedi mbwaakakutauka katanafwa.

⁶ Lino Devedi wakaita mwanaakwe Solomoni akumulailila kuti akayake ŋanda ya Mwami Leza wa Isilayeli. ⁷ Devedi wakaambila Solomoni kuti, “Mwanaangu, cali kumoyo wangu kuti ndiyake ŋanda yakukombela Mwami Leza wangu. ⁸ Pele ngaaya majwi aazwa ku Mwami Leza ngindakaambilwa, ‘Wakajaya bantu banji-banji akulwana nkondo zinji. Nkaako toelede kuyaka ŋanda njenookombelwa, nkaambo wakajaya bantu banji-banji munyika nkelibwenene. ⁹ Pele uyooba aamwana mulombe uubateme siluumuno alimwi ndiyoocita kuti aliibe kuzwa kuli basinkondonyina boonse. Uyooitwa kuti Solomoni, nkaambo uyooletela Baisilayeli luumuno akuliiba mukulela kwakwe. ¹⁰ Ngonguwe uuyooyaka ŋanda iiyooitwa zina lyangu, uyooba mwanaangu, ambebo njooba wisi. Alimwi njookkazikizya bulelo bwakwe mu Isilayeli kukabe kutamani.’

¹¹ “Lino mwanaangu Mwami Leza abe aanduwe. Uzwidilile mukuyaka ŋanda ya Mwami Leza wako, mbuli mbwaakasyomezya. ¹² Mwami Leza akakupe busongo bunji waakuba mweendelezi wa Baisilayeli mukuti ukabambe mulawo wa Mwami Leza wako. ¹³ Kuti ukacite bwaamba malailile amilawo Mwami Leza njaakapa Baisilayeli kwiindila muli Mozesi uyoozwidilila. Zyandamana ube sicamba. Utayoowi nikuba kutyompwa. ¹⁴ Ndakalipenzya kapati kuti ndijane zintu eezi zyaŋanda ya Mwami Leza, mwaanda wazyuulu zyamatalenta aangolida, zyuulu zili cuulu zyamatalenta aansiliva, milwi-milwi yamukuba alubulo lutakonzyi kweelekwa, kubikkilizya azisamu amabwe. ¹⁵ Ulakonzya kuyungizya ali nzizyo yebo. Ulijisi babelesi banji-banji aaba basikubeza mabwe, basikuyasya mabwe, babezi, antoomwe abasibuuya mumilimo imwi, ¹⁶ mbuli ngolida ansiliva, mukuba alubulo, bauya banji-banji. Lino talika mulimo awalo Mwami Leza ulakuleleka.”

¹⁷ Kuzwa waawo Devedi wakalailila basololi Baisilayeli boonse kugwasya Solomoni mwanaakwe. ¹⁸ Wakabaambila kuti tee kayi Mwami Leza ulaandinywe, alimwi wamupa luumuno kuzwa kumabazu oonse? Wakacita oobu naakaaba bantu bamunyika eeyi kulindinywe. Sunu balaswiilila Mwami Leza antoomwe abantu bakwe. ¹⁹ Nkaako lipe lwako omwini amoyo woonse ku Mwami Leza mukumubelekela. Talika kuyaka ŋanda ya Mwami Leza. Ndendilyo noyooleta bbokesi lyacizuminano ca Mwami Leza azibelesyo zisalala zya Leza oomo muyoobikkwa zina lya Leza.