1 Makani 21
Devedi mbwaakabala bantu
1 Lino Saatani wakayanda kuwisya Baisilayeli, nkaako wakacitya Devedi kuti abale bantu. 2 Mpawo Devedi wakati kuli Jowabu akuli basilutwe babasilumamba aabo bakali aanguwe, “Kamuya mumisyobo yoonse ya Isilayeli kuzwa ku Dani kusikila ku Biiyasyeba, kamuya mubale bantu bakonzya kuya kunkondo kutegwa ndizibe naa bali bongaye.”
3 Pele Jowabu wakatongookela mwami wati, “Mwami Leza wako avuzye bantu aabo ziindi zili mwaanda kwiinda mbobabede sunu. Lino O Mwami simalelo wangu, sena boonse aaba tabali bantu bako? Nkaambo nzi yebo ncoyanda kucita eeci? Nkaambo nzi ncoyanda kuleta bubi ku Baisilayeli?”
4 Nikuba boobo jwi lyamwami ndilyakamvwigwa. Mpawo Jowabu wakainka mucisi coonse ca Isilayeli alimwi akupilukila ku Jelusalemu kuyoobala bantu.
5 Lino wakaambila mwami Devedi mweelwe wabasilumamba. Antoomwe bakali zyuulu zili cuulu azyuulu zili mwaanda bakali kukonzya kulwanya mapanga. Mu Juda bakali zyuulu zili myaanda yone amakumi aali ciloba.
6 Pele Jowabu taakabalilizya Balevi a Babenjamini, nkaambo taakazuminana amalailile aamwami.
7 Lino malailile a Devedi taakabotelwa Leza. Nkaako wakasubula Baisilayeli. 8 Aawo Devedi wakati kuli Leza, “Ndabisya kapati nindacita ceeci. Akaka ndakukumbila, ndilekelela mulandu ooyu. Ndacita cabufuba-fuba.”
9 Mwami Leza wakati kuli Gadi, musinsimi wakali kulanga Devedi, 10 “Koya ukaambile Devedi kuti, ‘Mboobu mbwaamba Mwami Leza, kuli zintu zyotatwe alinzizyo, usale comwe nceticite.’”
11 Aboobo Gadi wakasika kuli Devedi akumwaambila kuti “Mboobu, mbwaamba Mwami Leza, sala mulizeezi zyotatwe, 12 sena kube nzala munyika yako kwamyaka yotatwe? Naa myezi yotatwe yakuti kotija basinkondonyoko kabakutandaanya amapanga? Naa mazuba otatwe aacuumo ca Mwami Leza citiletwe amungelo wakwe uunyonyoona mu Isilayeli yoonse? Koyeeya lino akuziba cintu eeco ncenjooambila ooyo wandituma.”
13 Mpoonya Devedi wakati kuli Gati, “Ndili mumapenzi mapati. Lino andaabwe buyo mumaanza aa Mwami Leza, nkaambo luse lwakwe ndupati, pele nditaabwi mumaanza aabantu.”
14 Aboobo Mwami Leza wakatuma bulwazi mu Isilayeli. Nkabela kwakafwa baalumi bali zyuulu zili makumi aali ciloba. 15 Lino Leza wakatuma mungelo kuti anyonyoone Jelusalemu. Nkabela mungelo naakali kucita oobo, Mwami Leza wakamulesya akwaamba kuti kulinguwe, “Mbubo lino, leka.” Wakaleka. Ooyo mungelo wakali kumbali acuumino ca Alauna Mujebusi.
16 Lino Devedi wakalungumana wabona mungelo wa Mwami Leza uliimvwi akati kajulu anyika atala aa Jelusalemu kajisi apanga mujanza lyakwe. Eelyo Devedi abalupati-pati bakwe bakasama masaka bavuntama.
17 Ciindi Devedi naakabona mungelo wakali kujaya bantu, wakati ku Mwami Leza, “Mebo ndime ndakabisya kucita cintu eeci cipati cakubazya bantu, pele bantu aaba, ino bacita nzi? Noosubula ndime amukwasyi wangu. Pele utaleki cuumo eeci kuti cikkalilile abantu bako.”
18 Lino Gadi wakasika kuli Devedi buzuba oobo mbubonya, wakaamba kuti kulinguwe, “Koya ukayakile Mwami Leza cipaililo kucuumino ca Alauna Mujebusi. 19 Mpawo Devedi wakainka mbubonya mbuli Mwami Leza mbwakalailila kwiindila muli Gadi.”
20 Nkabela Alauna naakalikuuma maila wakacebuka akubona mungelo. Bana bakwe balombe bali bone bakayuba. 21 Lino Devedi naakasika, Alauna wakasiya cuumino camaila akukotamina Devedi.
22 Devedi wakati kulinguwe, “Mbuti kuti wandipa busena bwacuumino cako kuti ndiyakile Mwami Leza cipaililo. Ndendilyo cuumo cakwe kubantu nocitileke. Nduuzizya muulo waco wini-wini.”
23 Lino Alauna wakati kuli Devedi, “Ino kuti ocitola buyo O mwami simalelo wangu akucita mbuli mboyeeya. Bona, ndilapa basune bakupaizya azilayi zyakuumya zibe nkuni aalo maila alaba cituuzyo. Ndilapa zyoonse eezi.”
24 Pele mwami Devedi wakati kuli Alauna, “Peepe, ndiyanda kuzyuula buya, nsikonzyi kupaizya cipaizyo cakutenta ku Mwami Leza wangu ncindataula pe.”
25 Aboobo Devedi wakabbadela Alauna masyekeli aangolida aali myaanda iili cisambomwe. 26 Eelyo Devedi wakayakila Mwami Leza cipaililo kuya, wakapaizya zipaizyo zyakutenta azipaizyo zyalumvwano. Wakaita Mwami Leza, Mwami Leza wakamwiingula naakatuma mulilo kuzwa kujulu acipaililo cazipaizyo zyakutenta.
27 Lino Mwami Leza wakaambila mungelo kuti apilusye panga lyakwe, aawo wakabweedezya panga mucikutu calyo. 28 Ciindi eeco Devedi naakaziba kuti Mwami Leza wamumvwa kucuumino ca Alauna Mujebusi, wakapaizya ooko. 29 Tente lya Mwami Leza eelyo Mozesi ndyaakaluka munkanda antoomwe acipaililo cakutentela zyakali kubusena bukombelwa ku Gibeyoni. 30 Pele Devedi taakabuzya-buzya Leza kwiindila mulindilyo. Nkaambo wakali kuyoowa panga liya lyamungelo wa Mwami Leza.