1 Makani 18

Devedi mbwaakazunda

¹ Kusule azeezi Devedi wakalwana Bafilisiti akubazunda, alimwi wakatola munzi wa Gati ayeeyo iizingulukide kuzwa ku Bafilisiti aabo. ² Alimwi wakazunda Bamowabu. Aboobo wakabacita kuti kabatela kulinguwe. ³ Alimwi Devedi wakazunda Hadadeza mwami wacisi ca Zoba, kusikila ku Hamati, ciindi Hadadeza naakali kukwakwabula cisi cakwe kusikila kumulonga wa Yufuletisi. ⁴ Mpoonya Devedi wakatola kuzwa kulinguwe basimabbiza bali cuulu amyaanda iili ciloba, abasilumamba bali zyuulu zili makumi obilo, eelyo wakakosoola misisa yamabbiza oonse, wakaleka buyo aankalaki zili mwaanda. ⁵ Nkabela ciindi Baalamu baku Damasikasi nibakasika kuzoogwasya Hadadeza, Devedi wakajaya baalumi baku Siliya bali zyuulu zili makumi obilo azibili. ⁶ Mpoonya wakabikka basilumamba mu Siliya yamu Damasikasi, nkabela Baalamu bakaba bazike ba Devedi akutalika kutela. Eelyo Leza wakagwasya Devedi kuti azunde kufumbwa ooko nkwaaya. ⁷ Aboobo Devedi wakatola ntobo zyangolida eezyo zyakabwezedwe abazike ba Hadadeza wazileta ku Jelusalemu. ⁸ Nkabela kuzwa ku Tibati aku Kuni, minzi ya Hadadeza, Mwami Devedi wakabweza mukuba munji kapati ooyo Solomoni ngwaakabelesya mukubumba cibumbe caziba, zicinda, azibelesyo zimwi zyamukuba zyamuŋanda ya Leza. ⁹ Lino ciindi Toyi mwami wa Hamati naakamvwa kuti Devedi wakazunda basilumamba boonse ba Hadadeza, mwami wa Zoba, ¹⁰ wakatuma mwanaakwe Hadolamu kumwami Devedi kuti akamujuzye akumusangalazya nkaambo wakalwana Hadadeza akumuzunda nkaambo kakuti Hadadeza lyoonse wakajisi nkondo a Toyi. Nkabela Hadadeza wakali kunga wakatolelezya azintu zyansiliva, ngolida azyamukuba. ¹¹ Lino zyoonse eezi Devedi wakazipa ku Mwami Leza antoomwe amali ansiliva, amali angolida eezyo nzyaakasaala kuzwa kumisyobo yoonse njaakazunda eeyi: Edomu, Mowabu, Baamoni, Bafilisiti a Bameleki.

¹² Abisyai mwanaa Zeluiya wakajaya Baedomu bali zyuulu zili kkumi alusele mukkuti lya munyo. ¹³ Wakabikka basilumamba mu Edomu nkabela boonse Baedomu bakaba bazike bakwe. Mwami Leza wakagwasya Devedi kuti azunde koonse nkwaaya.

¹⁴ Mbombuboobu Devedi mbwaakeendelezya mu Isilayeli yoonse, Devedi wakali kubeteka bantu bakwe boonse cabululami. ¹⁵ Jowabu mwanaa Zeluiya ngowakali silutwe wabasilumamba, Jahosyafati mwana wa Ahiludi ngowakali mulembi wamakani. ¹⁶ Zadoki mwana wa Ahitubi a Ahimeleki mwana wa Abiyata mbibakali bapaizi, Syavusya ngowakali mulembi, ¹⁷ Benaiya mwanaa Jehoyada wakali ngosilutwe wa Bakeleti a Bapeleti, eelyo bana balombe ba Devedi bakali balailili.