1 Makani 12
Batobeli ba Devedi bataanzi kumusyobo wa Benjamini
1 Mbaaba baalumi basintanze bakaza kuli Devedi ku Zikilagi kuzoomugwasya kulwana ciindi naakali kuyubaila kuzwa ku mwami Saulu mwanaa Kisyi. 2 Aaba bakali Babenjamini baluzubo lwa Saulu bakacibwene kulwanya mata mukufusa mivwi akufusa nkwibba kululyo naa kulumwensi. 3 Mbaaba basololi babo: Ahiyeza a Jowasyi bana ba Syemaa Mugibeya, Jeziyeli a Peleti bana ba Azimaveti, Belaka a Jehu Muanatoti, 4 a Isyimaiya Mugibeyoni sintanze wabaabo bali makumi otatwe alimwi nguwakali musololi wabo. Jelemiya, Jahaziyeli, Johanani, Jozabadi Mugedela, 5 Eluzayi, Jelimoti, Beyaliya, Syemaliya a Syefatiya, Muhalufu. 6 Elikana, Isyiya, Azaleli, Joyeza a Jasyobeyamu Bakola, 7 Joela a Zebadiya, bana ba Jelohamu bazwa ku Gedoo.
Batobeli ba Devedi bazwa kumusyobo wa Gadi
8 Mbaaba basilumamba basintanze bakazwa kumusyobo wa Gadi bakatijila kuli Devedi kumpangala munkanda. Bakalicibwene kulwana kapati kulwanya masumo antobo, bakali mbuli basyuumbwa babutambo, alimwi bakali kuzuza mbuli njeleele. 9 Eza wakali ngosilutwe wabili ngu Obadiya watatu ngu Eliyabu, wane ngu 10 Misyimana, wasanu ngu Jelemiya, 11 wacisambomwe ngu Atayi, waciloba ngu Eliyeli. 12 Walusele ngu Johanani, wafuka ngu Elizabadi, 13 wakkumi ngu Jelemiya, wakkumi aumwi ngu Makibanayi. 14 Bamwi babaalumi aaba bazwa kumusyobo wa Gadi bakali basololi bapati babasilumamba, nkabela basololi bakali kweendelezya bali mwaanda, bapati aaba bakali kweendelezya bakali cuulu. 15 Aaba mbabaabo bakalanduka mulonga wa Jolodani mumwezi mutaanzi, ciindi eeco mulonga ooyu wakalifwasukide, mbombubo oobu mbubakamwaya bakali kukkala mumakkuti kujwe akumbo.
Batobeli bazwa kumisyobo ya Benjamini a Juda
16 Lino bamwi baalumi bamisyobo ya Benjamini a Juda bakaza kumpangala ooko nkwaakali kukkala Devedi. 17 Devedi wakainka kuyoobaswaanya akuyooti, “Kuti kamuli mwaza caluumuno kuzoondigwasya mbubo ndamutambula munkamu yesu. Pele kuti kamuli basikundaaba kuli basinkondoma, mebo neenyina mulandu, Leza wabasikale besu amubone akumusubula.”
18 Mpoonya aawo muuya wa Leza wakasikila Amasayi ooyo silutwe wababaya bali makumi otatwe wakati,
“Devedi tuli bako, omwanaa Jese tulaanduwe.
Uzwidilile yebo. Bakugwasya, abalo bazwidilile.
Kayi Leza uyookugwasya.”
Aawo Devedi wakabatambula akubacita kuti babe bapati babasikusaala.
Batobeli bazwa kumusyobo wa Manase
19 Lino abamwi basilumamba bamusyobo wa Manase bakaza kuli Devedi ciindi walo naakali a Bafilisiti kukulwana Saulu. Nikuba kuti walo abantu tiibakagwasilizya Bafilisiti nkaambo baleli babo nibakabuzya-buzya bakamupilusya. Bakati ulaba natusandukila kuti aye kuli Saulu simalelo wakwe. 20 Mbaamba basilumamba bakazwa kumusyobo wa Manase bakaya kuli Devedi naakali ku Zikilagi, Adina, Jozabadi, Jadiyayeli, Mikayeli, Jozabadi, Elihu alimwi a Ziletayi. Aaba mbabakali basololi bankamu zyabantu bali cuulu mucisi ca Manase. 21 Bakagwasilizya Devedi kulwana bavumpi, alimwi bakali basicamba mukulwana. Devedi wakabacita kuti babe balailili kumpi yakwe. 22 Buzuba abuzuba kwakali baabo bakali kuzoogwasya Devedi kusikila limwi wabaa ampi mpati njumu.
Mweelwe wabasilumamba ba Devedi
23 Ngooyu mweelwe wabaabo bakonzya kulwana bakaza kuli Devedi naakali ku Hebuloni. Bakazoonanika Devedi bwami bwa Saulu mbubonya mbuli mbwaakaambide Mwami Leza. 24 Baalumi bakazwa kumusyobo wa Juda bakajisi ntobo amasumo zyakulwanya, bakali zyuulu zili cisambomwe amyaanda iili lusele. 25 Baalumi bakazwa kumusyobo wa Simiyoni bakalibambilide kulwana bakali zyuulu zili ciloba amwaanda omwe. 26 Baalumi bakazwa kuli Levi bakali zyuulu zili zyone amyaanda iili cisambomwe, 27 kubikkilizya a Jehoiyada musololi wamukwasyi wa Aloni bakali zyuulu zyotatwe amyaanda iili ciloba. 28 Kwakali a Zadoki silumamba mukubusi sicamba kuzwa kumukwasyi wakwe kwakali balailili bali makumi obilo ababili. 29 Baalumi bakazwa kumusyobo wa Benjamini baluzubo lwa Saulu bakali zyuulu zyotatwe, bamwi babaaba bakacili kutobela Saulu. 30 Baalumi basicamba bazizilwe bakazwa kumusyobo wa Efulemu bakali zyuulu zili makumi obilo amyaanda iili lusele. 31 Baalumi bakazwa kucisela camusyobo wa Manase kuzoonanika Devedi kuba mwami bakali zyuulu zili kkumi alusele. 32 Baalumi bakazwa kumusyobo wa Isakaa bakazi zyaciindi a Baisilayeli mbobeelede kucita bakali myaanda yobilo antoomwe abasazinyina. 33 Baalumi bakazwa kumusyobo wa Zebuluni bakacibwene kulwanya zilwanyo zili zyoonse bakali zyuulu zili makumi osanwe. 34 Baalumi bakazwa kumusyobo wa Nafutali bakali balailili bakali cuulu. Basilumamba bacibwene kulwanya ntobo amasumo bakali zyuulu zili makumi otatwe aciloba. 35 Baalumi bakazwa kumusyobo wa Dani bacibwene kulwana bakali zyuulu zili makumi obilo alusele amyaanda iili cisambomwe. 36 Baalumi bakazwa kumusyobo wa Asya bacibwene kulwana bakali zyuulu zili makumi one. 37 Baalumi bakazwa kumisyobo ya Lubeni, Gadi, acisela camusyobo wa Manase yakali kujwe lyamulonga wa Jolodani bakali zyuulu zili mwaanda amakumi obilo. Abalo aaba bakali kukonzya kubelesya zilwanyo zyaandeene-andeene.
38 Basilumamba boonse aaba bakalyaabide bakaza kuli Devedi ku Hebuloni. Bakalikanzide kuti Devedi abe mwami wa Baisilayeli boonse. Bantu boonse bakali kamantene camoyo omwe. 39 Baalumi aaba bakatola mazuba otatwe ooko a Devedi kabalya akunywa calutangalo cakulya ncibakabambilidwe. 40 Bakaleta zyakulya bakali beenzinyina bakazwa kulaale ku Isakaa, Zebuluni aku Nafutali. Bakaziletela ambongolo, nkamela, mamyuulu abasune. Bakaleta zintu zinji mbuli busu, zibunge zyankuyu, nsaansa ziyanikidwe, waini, mafuta, ŋombe ambelele. Kwakali kutangala mu Isilayeli yoonse.