1 Joni 4
Zya Muuya wa Leza amuuya wasinkondonyina Kilisito
1 Nobayandwa, mutali kusyomi kufumbwa muntu waamba kuti ulijisi Muuya Uusalala. Pele mumusole muntu ooyo kuti mubone kuti naa muuya ngwajisi nguwa Leza ncobeni. Nkaambo basinsimi babeji balimwaikide koonse-koonse. 2 Mboobu mbomuyooziba Muuya wa Leza, kufumbwa waamba kuti Jesu Kilisito wakaba muntu ncobeni, nguwa Leza. 3 Pele ooyo uutazumini Jesu Kilisito tali wa Leza. Ooyo ngonguwe ujisi muuya uuzwa kuli sinkondonyina Kilisito. Kayi mwakamvwa kuti ulaboola alimwi mwali kale munyika.
4 Nywebo nobana bangu, muli bakwe Leza, alimwi mwabazunda kale basinsimi babeji, nkaambo Muuya uuli muli ndinywe ulaanguzu kwiinda yooyo uuli mubantunsi. 5 Bansinsimi baya mbabuntunsi, azeezyo nzyobaamba nzyabuntunsi, alimwi bantunsi mbababaswiilila. 6 Pele swebo tuli bakwe Leza. Kufumbwa uuzi Leza ulatuswiilila, alimwi kufumbwa uutali wa Leza tatuswiilili pe. Oobu mbotwiindanya Muuya wabwini amuuya wabubeji.
Leza nduyando
7 Nobeenzuma, atuyandane nkaambo luyando luzwa kuli Leza. Kufumbwa uuyanda munyina mmwanaa Leza alimwi ulimuzi Leza. 8 Kufumbwa uutayandi, tamuzi Leza, nkaambo Leza nduyando. 9 Leza mboobu mbwaakatondezya kuti ulatuyanda, wakatutumina Mwanaakwe simuzyalwa alikke ansi aano kuti mulinguwe tukabe aabuumi. 10 Oolu ndoluyando lwini-lwini. Takuli kuti ndiswe twakasaanguna kuyanda Leza, pele walo nguwakatuyanda kusaanguna alimwi wakatuma Mwanaakwe kulungila milandu yesu.
11 Nobeenzuma, Leza mbwaakatuyandisisya boobo, tuleelede kuti aswebo tuyandane. 12 Taakwe muntu wakabona kale Leza. Kuti naa katuyandana, Leza ulikukkede muli ndiswe, alwalo luyando lwakwe lulizwide muli ndiswe.
13 Mboobu mbotuzi kuti tuli mulinguwe, awalo uli muli ndiswe nkaambo wakatupa Muuya wakwe. 14 Alimwi twakabona akwaambila bamwi kuti Leza Taata wakatuma Mwanaakwe kuti abe Mufutuli wanyika. 15 Kufumbwa waamba kuti Jesu Mwanaa Leza, Leza ulikkede mulinguwe awalo ulakkala muli Leza. 16 Aboobo swebo tulizi akusyoma kuti Leza ulatuyanda. Leza nduyando, nkabela kufumbwa ooyo uukkala muluyando, ukkede mulinguwe, awalo Leza ukkala mulinguwe. 17 Mboobu luyando mbolulondokede muli ndiswe kuti tukabe aacaamba mubuzuba bwalubeta, nkaambo mbuli mbwabede Kilisito, aswebo mbotubede munyika iino. 18 Muntu ulaaluyando tayoowi pe, nkaambo luyando lwini-lwini ndolugwisya kuyoowa. Nkaambo muntu kuti kayoowa, uyoowa cisubulo, alimwi ooyo uyoowa, talondokede muluyando pe.
19 Tulayandana nkaambo Leza wakatuyanda kusaanguna. 20 Kuti naa umwi wati, “Leza ndamuyanda,” kwamana katayandi munyina mmubeji. Ani inga ulamuyanda buti Leza ngwatanabwene akutayanda munyina ngwabona? 21 Ngooyu mulawo Leza ngwatupede, mulawo ooyu ngwakuti, uuyanda Leza ayande munyina awalo.