1 Joni 1
Zya Majwi aabuumi
1 Tulamulembela zya Majwi aapa buumi aakaliwo kuzwa kumatalikilo, ngutwakamvwa alimwi twakaabona ameso, iiyi, twakaalanga akwaaguma amaanza. 2 Buumi oobu bwakayubununwa, eelyo twakabubona. Tulamuzibya akumulungulwida nywebo zya buumi oobu butamani bwalo bwakali a Taata, nkabela bwakalibonya. 3 Eeco ncitwakabona akumvwa ncotumwaambila kutegwa nywebo antoomwe andiswe tuswaangane a Taata a Mwanaakwe Jesu Kilisito. 4 Twalemba makani aaya kutegwa kukondwa kwesu kuzulile.
Leza ngomumuni
5 Lino mulumbe ngutwakamvwa kulinguwe ngwakuti Leza mmumuni. Mulinguwe taakwe mudima aasyoonto pe. 6 Kuti naa twaamba kuti tuliswaangene anguwe, kwamana katweenda mumudima, tulabeja, anzyotucita tazili zyabwini. 7 Pele kuti naa katweenda mumumuni, mbubonya mbuli mbwali mumumuni walo tuliswaangene umwi aumwi, alimwi bulowa bwa Jesu Kilisito Mwanaakwe mbobutusanzya kugwisya zinyonyoono zyesu zyoonse.
8 Kuti naa twaamba kuti tatukwe zibi, tulalicenga lwesu tobeni, eelyo bwini tabuli muli ndiswe. 9 Pele kuti naa twalyaamba zibi zyesu, walo ulasyomeka mmululami, ulatulekelela zibi zyesu akutusalazya kuli zyoonse zitaluleme. 10 Kuti naa twaamba kuti tatukwe zinyonyoono, twamubona mbuli mubeji, aalo majwi aakwe taamo mulindiswe.